Эфеслилер

6 Чагалар, ата-энеңизе Худайың ислейши ялы гулак асың, себәби бу догрудыр. 2 «Ата-энеңе хормат гой» диен илкинҗи табшырык шу вада билен баглыдыр: 3 «Шонда сиз говы гүнлер гөрүп, ер йүзүнде узак яшарсыңыз». 4 Аталар, чагаларыңызы гахарландырмаң, гайтам, олары Ехованың* тербиеси ве өвүт-үндеви* билен улалдың*.

5 Гуллар, ер йүзүндәки хоҗайынларыңыза Месихе гулак асышыңыз ялы хормат ве горкы билен гулак асың. 6 Адамлара яранҗак болян ялы, диңе олар гөрүп дурка* дәл-де, Месихиң гуллары хөкмүнде Худайың ислегини йүрекден* берҗай эдиң. 7 Хоҗайынларыңыза адамлара дәл-де, Ехова* гуллук эдйән ялы хөвес билен хызмат эдиң. 8 Себәби гул болсун, азат болсун, ягшылык эдйән хер кеси Ехованың* сылаглаҗакдыгыны билйәнсиңиз. 9 Хоҗайынлар, сиз хем гулларыңыз билен өзүңизи шейле алып барың, олара хайбат атмаң. Себәби оларың хем, сизиң хем Хоҗайыныңыз гөклердедир, Ол йүз гөрйән дәлдир.

10 Шейлеликде, гой, Худай кувватлы гүйҗи аркалы сизи беркитсин. 11 Иблисиң хилелерине гаршы дуруп билер ялы, Худайың сөвеш үчин берйән әхли ярагларыны дакының. 12 Себәби бизиң сөвешимиз адамлара гаршы дәл-де, гөкдәки залым рухлардан ыбарат болан хөкүметлере, ыгтыярлыклара, шу гараңкы дүнйәниң хөкүмдарларына гаршыдыр. 13 Шол себәпли Худайың сөвеш үчин берйән әхли ярагларыны гейиң. Шонда сиз душман хүҗүм эденде*, оңа гайтавул берип билерсиңиз ве әхли зады айдылышы ялы берҗай эдйәндигиңиз үчин берк дурарсыңыз.

14 Шейлеликде, берк дуруң-да, билиңизе хакыкат гушагыны даңың, эгниңизе догрулык совудыны, 15 аякларыңыза болса аякгабыңызы гейип, парахатлык хош хабарыны айтмага тайын болуң. 16 Элиңизе улы иман галканыны хем алың. Шонда онуң билен душманың* әхли отлы окларыны* өчүрмеги башарарсыңыз. 17 Келләңизе халас эдйән тувалганы гейиң, элиңизе Худайың сөзи болан рухуң гылыҗыны алың. 18 Хер ягдайда хер хили дога ве ялбарма аркалы рухда* дога эдиң. Шоңа гөрә-де оя болуң ве мукаддеслериң әхлиси үчин элмыдама дилег эдиң. 19 Хош хабарың мукаддес сыры хакда сөз ачанымда, батыргай* вагыз эдип билер ялы, мениң үчин хем дога эдиң. 20 Себәби мен хош хабары зынҗырлар билен багланан илчи хөкмүнде вагыз эдйәрин. Шонда мен оны батыргай, ягны айтмалысы ялы вагыз эдип билерин.

21 Сөйгүли доганымыз ве Халыпамызың вепалы гулы болан Тихик мен барада хем-де эдйән ишлерим хакда сизе әхли зады гүррүң берер. 22 Ине, шу максат билен хем оны яныңыза иберйәрин. Шонда сиз бизиң ягдайларымыз хакда эшидип, йүреклериңиз ынҗалык тапар.

23 Доганлар, гой, Ата Худайымыз ве Халыпамыз Иса Месих сизе парахатлык, иман билен бирликде сөйги берсин. 24 Гой, Худайымызың мерхемети Халыпамыз Иса Месихи йүрекден сөййәнлериң әхлиси билен болсун.