2 Коринфлилер
2 Мен яныңыза индики гезек баранымда, сизи гынандырмазлыгы йүрегиме дүвдүм. 2 Эгер сизи гынандырсам, онда гынандыран адамымдан башга ким мени бегендирип билер? 3 Мен баранымда, бегендирмели адамларымы гынандырмайын дийип, шол затлары языпдым. Себәби мени бегендирйән задың сизи-де бегендирҗекдигине ынанярын. 4 Мен ол хатымы йүрегимде хасрат чекип, улы кынчылыкда ве энчеме гөзяшлар дөкүп языпдым; оны сизи гынандырмак үчин дәл-де, сизе болан чуңңур сөйгими билмегиңиз үчин этдим.
5 Кимдир бири гынанмага себәп дөреден болса, онда ол мени дәл-де, белли бир дереҗеде сизи гынандыряндыр. Йөне мен айдян затларым билен оны җуда гынандырмак ислемейәрин. 6 Шейле адамы көпчүлигиң язгараны-да етерликдир. 7 Ол ченденаша гынанып, гөвнүчөкгүнлиге дүшмез ялы, сиз оны йүрекден багышлап, теселли бермелисиңиз. 8 Шонуң үчин оны сөййәндигиңизи гөркезмегиңизи хайыш эдйәрин. 9 Шейле-де шол хатымы сизиң әхли затда гулак асяндыгыңыза гөз етирмек үчин языпдым. 10 Эгер сиз бириниң эден эрбетлигини багышласаңыз, мен-де оны багышлаярын. Аслында, мен оны багышласам-да, Месихиң өңүнде сизиң үчин багышлаярын. 11 Шейтсек, Шейтаның алдавына дүшмерис, чүнки биз онуң хилелеринден хабарсыз дәлдирис.
12 Мен Троаса Месих хакдакы хош хабары ыглан этмәге баранымда, Халыпамызың ишини ерине етирмек үчин улы мүмкинчилик дөреди*. 13 Мен доганымыз Титусы тапып билмәндигим үчин алада галдым. Шонда ол ердәки доганлар билен хошлашып, Македония ёла дүшдүм.
14 Бизи Месих билен дабаралы йөришде алып барян Худая миннетдардырыс. Бу йөриш еңши беллейән адамларың йөриши ялыдыр. Худай хакдакы билим якымлы ыс киминдир, ол әхли ерлере биз аркалы яйраяндыр!* 15 Себәби биз ве Месих хакдакы хабар Худай үчин якымлы ыс ялыдыр. Бу ыс халас болҗаклара-да, хеләк болҗаклара-да барып етйәндир. 16 Ол якымлы ыс хеләк болҗаклары өлүме элтсе, халас болҗаклары яшайша элтер. Эйсем, булары этмәге кимиң укыбы бар? 17 Биз көп адамлар ялы Худайың сөзүни сатмаярыс*, гайтам, Худайың иберен адамлары хөкмүнде оны ак йүрекден гүррүң берйәрис. Хава, оны Худайың өңүнде Месихиң шәгиртлери хөкмүнде айдярыс.