2 Коринфлилер
11 Мен акылсыз ялы болуп гөрүнсем-де, маңа сабырлы болмагыңызы ислейәрин. Йөне, аслында, сиз маңа эййәм сабырлы болярсыңыз! 2 Мен сизи Худайың габанҗаңлыгы* билен габанярын. Себәби мен сизи пәк гыз хөкмүнде бир әре, ягны Месихе гелин эдип бермеги сөз бердим. 3 Эмма йыланың Хов энәни мекирлик билен алдайшы ялы, сизиң хем пикирлериңиз заяланып, Месихиң өңүнде гөркезмели акйүреклилиги ве пәклиги йитирерсиңиз өйдүп горкярын. 4 Шейлеликде, кимдир бири бизиң вагыз эден Исамыздан башга бирини вагыз этсе я-да сизиң кабул эден хош хабарыңыздан башга хабары айтса, сиз оны кабул эдйәрсиңиз. Я-да пикириңизе тәсир эден гүйчден башга бир гүйч тәсир этсе, оңа эерйәрсиңиз. 5 Мен сизиң «абрайлы» ресулларыңыздан бирҗе затда-да ыза галян дәлдирин. 6 Йөне геплемекде өкде болмасам-да, билимде өкдедирин. Биз муны әхли ягдайда ве хер затда сизе айдың гөркезендирис.
7 Мен Худайың хош хабарыны сизе хөвес билен вагыз этдим ве мунуң үчин сизден хич зат алмадым. Эйсем, сизи бейгелтҗек болуп, өзүми песелтмек билен, гүнә этдимми? 8 Мен башга йыгнакларың җомартлык билен берен көмегини кабул эдип, сизе гуллук этмек үчин олары талан ялы болдум. 9 Эмма мен яныңыздакам, мәтәчлик чексем-де, хич киме йүк болмадым. Себәби Македониядан гелен доганлар мениң зерурлыкларымы артыгы билен канагатландырдылар. Хава, мен сизе хич затда йүк болмаз ялы өз аладамы өзүм этдим ве мундан бейләк хем шейле эдерин. 10 Месихиң шәгирди хөкмүнде тутуш Ахая бабатда буйсанмагыма маңа хич зат пәсгел бермез. 11 Онда мен сизе нәме үчин йүк болмак ислемедим? Сизи сөймейәнлигим үчинми? Сизи сөййәндигими Худай билйәндир.
12 Кәбирлери өзүни бизиң ялы ресул хасаплап өвүнйәрлер. Эмма олара өвүнмәге эсас болмаз ялы, мен хемишеки эдйән ишлерими этмегими довам эдерин. 13 Себәби шейле адамлар ялан ресуллардыр; олар башгалары алдаярлар ве хакыкы йүзлерини гизләп, өзлерине Месихиң ресулы диййәрлер. 14 Мен муңа гең галмаярын, себәби Шейтаның өзи-де нур перишдесиниң кешбине гирйәндир. 15 Шонуң үчин онуң гуллукчыларының хем өзлерини догрулыгың гуллукчылары ялы алып бармагы гең галдырмаяр. Эмма оларың соңы эден ишлерине гөрә болар.
16 Мен ене-де айдярын, гой, хич ким маңа акылсыздыр өйтмесин. Эгер сиз мени, догрудан-да, акылсыз хасаплаян болсаңыз, онда мен бираз өвнүп билер ялы, мени акылсыз адам хөкмүнде кабул эдиң. 17 Мен булары Халыпамызың гөрелдесине эерип дәл-де, өзүне ынамлы болан бир акылсыз адам ялы буйсанып айдярын. 18 Көп адамларың дүнъеви затлара өвнүши ялы, мен хем өвнерин. 19 Сиз шейле бир «акыллы» велин, акылсызлары хөвес билен кабул эдйәрсиңиз. 20 Аслында, сиз өзүңизи гул эдйән, элиңизден эмләгиңизи алып, задыңызы талаян ве өзлерини сизден ёкары тутуп, йүзүңизе урян адамлара сабырлы болярсыңыз*.
21 Бу бизиң үчин утанчдыр, себәби шейле диймек билен, биз говшаклык эдйән ялы болуп гөрүнмегимиз мүмкин.
Егер башгалар батыргай херекет эдйән болса, (мен муны акылсыз адам ялы айдярын) онда мен хем шейле батыргайлыгы гөркезип билерин. 22 Олар еврейми? Мен хем еврей. Олар ысрайыллымы? Мен хем ысрайыллы. Олар Ыбрайымың неслими?* Мен хем онуң несли. 23 Олар Месихиң гуллукчыларымы? Акылыны йитирен адам ялы җогап берйәрин, мен олардан хас бейикдирин. Себәби мен хас көп ишлери этдим, энчеме гезек түрмә басылдым, сансыз-саҗаксыз ургулара сезевар болдум, энчеме гезек өлүмиң бәри янындан гайтдым; 24 ехудылардан бәш сапар бири кем 40 гамчы ийдим; 25 үч гезек таяк билен урулдым, бир гезек дашландым, үч гезек гәми хеләкчилигине учрадым, бир гиҗе-гүндизи деңзиң җүммүшинде гечирдим; 26 көпленч сыяхат эдердим; талаңчылар, илдешлерим ве өзге миллетлер тарапындан, шәхерде, чөлде, деңизде, деряларда, ялан доганларың арасында ховп астында болдум; 27 дер дөкүп зәхмет чекдим, көпленч гиҗелерини ятман гечирдим, ач-сувсуз болдум, көп ягдайларда иере задым болмазды, совук ховада эгин-эшиксиз* галыпдым.
28 Мундан башга-да хер гүн әхли йыгнакларың аладасыны эгнимде гөтерйәрин. 29 Эйсем, бири эҗизләп-де, мен онуң билен биле эҗизлемейәринми? Бири бүдремәге себәп дөретсе, мен муңа гахарланмаярынмы?
30 Эгер өвүнмели болсам, онда говшак тарапымы гөркезйән затлар билен өвнерин. 31 Худайымыз ве Халыпамыз Исаның Атасы мениң ялан сөзлемейәндигими билйәндир. Оңа бакы шөхрат болсун. 32 Дамаскдакам, Арет патышаның голы астында болан хөкүмдар мени дамасклылара тутдурҗак болуп, шәхери габады. 33 Эмма доганлар шәхериң диварының әпишгесинден мени бир себетде ашак дүшүрдилер. Шейдип, мен оларың элинден сыпдым.