1 Петрус

4 Месих ынсан беденинде эҗир чекипди, шоңа гөрә-де сизем өзүңизи онуң пикир эдиши ялы пикирленмәге тайярлаң*. Себәби эҗир чекйән адам гүнә этмегини гойяндыр. 2 Шонда ол галан өмрүне ынсан хөвеслерине эерип дәл-де, Худайың ислегини ерине етирип яшар. 3 Сизиң өң хаясыз* ишлерде, ахлаксыз хөвеслерде, серхошлыкда, кейпи-сапалы отурылышыкларда, ичхә-ичишликде ве йигренҗи бутпаразлыкда гезип, дүнйәдәки адамларың ислегине гөрә яшаныңыз етерликдир. 4 Олар инди өзлери билен азгын ишлере гатнашмаяндыгыңыза гең галып, сизе сөгйәрлер. 5 Эмма шейле адамлар дирилери ве өлүлери хөкүм этҗек Месихиң өңүнде җогап берерлер. 6 Шонуң үчин хош хабар өлүлере-де* ыглан эдилйәр. Себәби олар ынсанлар тарапындан хөкүм эдилен болсалар-да, Худайың рухуның көмеги билен яшап билерлер.

7 Әхли задың соңы голайландыр. Шонуң үчин сагдын дүшүнҗели болуп, дога этмәге хемише тайяр* болуң. 8 Эсасан-да, бири-бириңизи йүрекден сөйүң, себәби сөйги көп гүнәлериң үстүни өртйәндир. 9 Бирек-биреге игенмән мыхмансөер болуң. 10 Худай сизе ягшы ве җогапкәрли хызматкәрлер хөкмүнде дүрли ёллар билен мерхемет эдйәр. Шоңа гөрә хер ким алан укыбына* гөрә бирек-биреге хызмат этсин. 11 Бири геплесе, Худайың хабарыны айдып геплесин; башгалара хызмат эдйән адам Худайың гүйҗүне бил баглап хызмат этсин. Шонда Худай Иса Месих аркалы әхли затда шөхратланар. Гой, шөхрат хем-де гүйч бакы ве эбеди Худайыңкы болсун. Омын.

12 Эзиз доганларым, агыр* сынаглара учраныңызда, үйтгешик бир зат боляндыр өйдүп гең галмаң. 13 Гайтам, Месих ялы гөрги гөрйәндигиңизе бегениң. Шонда онуң шөхратының аян болан дөврүнде-де бегенип, хас көп шатланарсыңыз. 14 Эгер сизи Месихиң ады үчин масгаралаян* болсалар, онда багтлысыңыз, себәби Худайың шөхратлы рухы сизиң үстүңизе инйәндир.

15 Эмма араңызда хич ким ганхор, огры, җенаятчы я-да башгаларың ишине гошулян адам хөкмүнде эҗир чекмесин. 16 Эгер бири месихчи болуп гөрги гөрйән болса утанмасын, гайтам, ол гөтерйән адына мынасып яшап, мундан бейләк хем Худайы шөхратландырсын. 17 Себәби Худайың хөкүми белленилен вагтда гелип, Онуң өз өйүнден башланар. Эгер ол илки бизден башланян болса, онда Худайың хош хабарыны кабул этмейән адамлара нәме болар? 18 «Эгер догры адам зордан гутулян болса, онда худайсыз ве гүнәкәр адама нәме болар?» 19 Шол себәпли Худайың ислегине гөрә эҗир чекйәнлер ягшылык эдип, өзлерини* вепалы Ярадыҗының элине табшырсынлар.