Римлилер
14 Иманы говшак адамы кабул эдиң. Кәбир меселелер бабатда пикириниң тапавутланяндыгы* үчин оны язгармаң. 2 Кимдир бириниң иманы оңа әхли зады иймәге ёл берйәндир, иманы говшак адам болса диңе гөк өнүм иййәндир. 3 Әхли зады иййән адам хемме зат иймейән адамы әсгермезлик этмесин. Гой, әхли зады иймейән адам-да хемме зады иййән адамы язгармасын, себәби Худай оны кабул эдйәндир. 4 Башга бириниң хызматкәрини язгарар ялы, сен ким болупсың? Ол сениң дәл-де, Худайың хызматкәридир, Худай хем онуң хоҗайыныдыр. Онуң ягшы я-да яман иш эдйәндигини Худай чөзйәндир. Аслында, ол Ехованы* разы эдип билер, себәби Ол шейле адама көмек эдйәр.
5 Кимдир бири бир гүни бейлеки гүнлерден хас ваҗып сайяндыр; башга бири болса хеммесини дең хасаплаяндыр. Гой, хер бир адам гелен карарының догрудыгына долы ынамлы болсун. 6 Белли бир гүнлери беллейән адам муны Ехова* үчин эдйәндир. Хемме зады иййән адам хем Ехова* үчин иййәндир, себәби бу затлар үчин ол Худая сагболсун айдяндыр. Хемме зады иймейән адам хем Ехова* үчин иййән дәлдир, ол хем мунуң үчин Худая сагболсун айдяндыр. 7 Аслында, бизиң хич биримиз диңе өзүмиз үчин яшаян дәлдирис ве хич биримиз диңе өзүмиз үчин өлйән дәлдирис. 8 Эгер биз яшаян болсак, Ехованың* шөхраты үчин яшаяндырыс, эгер өлйән болсак, Ехованың* шөхраты үчин өлйәндирис. Диймек, яшасак-да, өлсек-де, биз Ехованыңкыдырыс*. 9 Себәби Месих хем шу максат билен өлди, соңра дирелди. Шонуң үчин ол өленлериң-де, яшаянларың-да үстүнден хөкүм сүрйәндир.
10 Эйсем, сен нәме үчин доганыңы язгарярсың? Я-да нәме үчин доганыңы әсгермейәрсиң? Бизиң әхлимиз Худайың хөкүм күрсүсиниң өңүнде дурарыс. 11 Себәби: «Ехова* шейле диййәр: „Мен дири Худайдырын. Хер бир адам мениң өңүмде дыза чөкер ве мениң Худайдыгымы ачык боюн алар“» дийип язылгыдыр. 12 Шейлеликде, хер биримиз эден ишлеримиз үчин Худайың өңүнде җогап берерис.
13 Шонуң үчин, гелиң, мундан бейләк бири-биримизи язгарман, гайтам, доганымыза бүдреме дашы я-да бөвет болмазлыгы йүрегимизе дүвелиң. 14 Мен Халыпамыз Исаның шәгирди хөкмүнде шуны билйәрин ве ынанярын: хич бир зат өз-өзүнден хапа болян дәлдир. Эгер адам бир зады хапа сайса, ол диңе онуң үчин хападыр. 15 Эгер сен иййән задың билен доганың гөвнүне дегйән болсаң, диймек, сен оны сөймейәрсиң. Иймит зерарлы доганың иманына зыян етирме*, себәби онуң үчин Месих өлендир. 16 Сениң эдйән ягшы ишиңи адамлар эрбет хасап эдәймесинлер. 17 Адамың Худайың Патышалыгына гирмеги ийип-ичйән задына дәл-де, онуң догрулыгына, башгалар билен парахат яшаяндыгына ве мукаддес рухуң берйән шатлыгына баглыдыр. 18 Шейле хәсиетлери бар болан адам Месихиң гулы болса, ол Худайың хем-де адамларың берекелласыны аляндыр.
19 Шейлеликде, гелиң, парахатлыга элтйән ве бирек-биреги рухы тайдан беркитмәге көмек эдйән затлара ымтылалың. 20 Худайың гуран затларыны иймит зерарлы юмурмагыңызы бес эдиң. Аслында, хемме зат арассадыр, йөне адам иймит зерарлы башгаларың иманыны говшатса, бу догры дәлдир. 21 Эгер доганың бүдрейән болса, онда эт иймедигиң, шерап ичмедигиң я-да шуңа меңзеш затлары этмедигиң говудыр. 22 Эгер иманың бар болса, оны Худайың өңүнде өзүң үчин сакла. Эден зады үчин өзүни язгармаян адам багтлыдыр. 23 Эгер адам шүбхеленип иййән болса, ол өзүни эййәм язгарандыр, себәби ол имана гөрә иййән дәлдир. Аслында, имана гөрә эдилмедик затларың әхлиси гүнәдир.