2 Коринфлилер
9 Мукаддеслере көмек* этмек бабатда айтсам, аслында, бу барада сизе язмак хем герек дәл. 2 Себәби мен сизиң көмек этмәге тайындыгыңызы билйәрин, мунуң үчин македониялы месихчилериң өңүнде сизе гуванярын. Мен олара сизиң Ахаяда тутуш бир йыллап хөвес билен көмек эдендигиңизи айтдым. Сизиң ыхласыңыз оларың көпүсине тәсир этди. 3 Эмма сизе болан буйсанҗымызың бидерек болмазлыгы ве сизе айдышым ялы, көмек этмәге тайяр болмагыңыз үчин яныңыза доганлары иберйәрин. 4 Эгер мениң билен македониялы доганлар бармалы болса, сиз хем тайяр болмасаңыз, онда сизе болан ынамымыз бидерек болуп, сиз хем, биз хем утанҗа галарыс. 5 Шейлеликде, берен сөзүңизе гөрә җомартлык билен берйән садакаңыз тайын болар ялы, мен доганлары яныңыза бизден өң бармага хөвеслендирдим. Шонда садаканы меҗбуры дәл-де, җомартлык билен берйәндигиңиз белли болар.
6 Эмма гысганып экйән адам аз орар, җомартлык билен экйән болса көп орар. 7 Гой, хер кес хөвессиз я-да меҗбурлык билен дәл-де, йүрегинде ниетлән задыны берсин. Себәби Худай шатлык билен берйән адамы сөййәндир.
8 Галыберсе-де, герек задыңыз элмыдама етерликли болуп, ягшы ишлери этмәге задыңыз бол болар ялы, Худай сизе бүтин мерхеметини боллук билен бермеги башаряндыр. 9 Себәби: «Ол җомартлык билен пайлады, гарыплара берди. Онуң догрулыгы эбеди унудылмаз» дийип язылгыдыр. 10 Ол сизе экҗек тохумыңызы боллук билен берер, ийҗек чөрегиңизи-де үпҗүн эдер, экҗек тохумыңызы көпелдер ве догрулык ишлериңизден бол хасыл алмага көмек эдер. 11 Сиз хер ягдайда җомарт болар ялы, Худай сизе берекедини боллук билен берйәр ве бизиң бу бабатда эдйән тагалламыз адамлары Худая миннетдар болмага хөвеслендирйәр. 12 Себәби сизиң эдйән гуллугыңыз диңе бир мукаддеслериң зерурлыкларыны канагатландырман, эйсем, ол аркалы энчеме адамлар Худая көп миннетдарлык айдарлар. 13 Бу гуллугың нетиҗесинде олар Худайы шөхратландырярлар. Себәби сиз Месих хакда вагыз эдйән хош хабарыңыза табын болярсыңыз ве олара-да, хеммелере-де җомартлык билен садака берйәрсиңиз. 14 Олар сизи сөййәндиклери үчин, сиз хакда Худая дога эдйәрлер, себәби Худай сизе чәксиз мерхемет эдйәр.
15 Гелиң, шейле аҗайып совгады берен Худая миннетдар болалың.