Римлилер
6 Онда нәме диелиң? Худайың җомартлык билен мерхемет эдйәндиги үчин гүнә эдип йөрерисми? 2 Элбетде, ёк! Гүнәли ишлер үчин өлендигимизи билип-де, биз мундан бейләк гүнә эдип яшап билерисми? 3 Я-да бизиң хеммәмизиң Худайың рухуны алып, Месих Иса билен бирликдедигимизи ве Месих ялы өлмек үчин чүмдүрилендигимизи билмейәрсиңизми? 4 Биз хем Месих ялы өлмек үчин чүмдүрилип, онуң билен җайландык. Диймек, Атаның шөхратлы гүйҗи аркалы өлүмден дирелен Месих ялы биз хем тәзе яшайша башламалы. 5 Эгер биз онуң өлши ялы өлен болсак, онда онуң дирелиши ялы-да хөкман дирелерис. Шейдип, онуң билен бирликде боларыс. 6 Гүнәли тениң үстүмизден агалык этмезлиги үчин ве мундан бейләк гүнәниң гулы болмазлыгымыз үчин, өңки хәсиетлеримизиң* Месих билен бирликде пүрсе чүйленендигини билйәрис. 7 Себәби өлен адам гүнәден азат боляндыр.
8 Эгер биз Месих билен биле өлен болсак, онуң билен яшаҗакдыгымыза хем ынанярыс. 9 Себәби биз Месихиң дирелендигини, инди өлмеҗекдигини ве мундан бейләк өлүмиң онуң үстүнден агалык этмеҗекдигини билйәрис. 10 Месих гүнәни бир гезекде хемишелик айырмак үчин өлди, эмма хәзир ол Худай үчин яшаяр. 11 Шонуң ялы-да сизем гүнәли яшайыш үчин өзүңизи өли, эмма Месих Иса аркалы Худай үчин дири хасап эдиң.
12 Шол себәпли тен хөвеслерине боюн болмаз ялы, гүнә бедениңизиң* үстүнден патыша кимин хөкүм сүрмесин. 13 Шейле-де бедениңизи* гүнә этмек үчин эрбетлигиң ярагы дәл-де, догрулыгың ярагы хөкмүнде уланың. Худайың өңүнде өлен адамлар ялы дәл-де, өлүмден диреленлер ялы болуң. 14 Гүнә үстүңизден агалык этмесин. Себәби сиз канун астында дәл-де, Худайың мерхемети астындасыңыз.
15 Мундан нәхили нетиҗе чыкарса болар? Биз канун астында дәл-де, мерхемет астындадыгымыз үчин гүнә этсек болармы? Элбетде, ёк! 16 Сиз кимдир бирине хемише табын болян болсаңыз, онуң гулы боляндыгыңызы билйәнсиңиз. Эгер сиз гүнәниң гулы болсаңыз, өлерсиңиз. Эмма Худайың гулы болуп, оңа табын болсаңыз, догры адам боларсыңыз. 17 Йөне мен сизиң үчин Худая миннетдардырын. Себәби сиз өң гүнәниң гулы болуп, инди Худая йүрекден табын болярсыңыз ве онуң өвреден затларына эерйәрсиңиз. 18 Хава, сиз гүнәниң гулчулыгындан азат эдилип, догрулыгың гуллары болдуңыз. 19 Тениңизиң эҗиздиги себәпли, мен сизе сада сөзлер билен йүзленйәрин; өң беден агзаларыңызы биканун ишлери этмек үчин хапалыгың ве канунсызлыгың гулчулыгына беришиңиз ялы, инди олары мукаддес болмак үчин догрулыгың гулчулыгына бериң. 20 Себәби сиз гүнәниң гулы болан вагтыңыз, догрулыгың голы астында дәлдиңиз.
21 Сизиң өңки эден ишлериңиз нәхили миве берди? Хәзир сиз шол эден ишлериңизе утанярсыңыз, себәби олар өлүме элтйәр. 22 Инди сиз гүнәден азат эдилип, Худайың гулы болдуңыз ве мукаддеслигиң мивесини берйәрсиңиз. Бу болса эбеди яшайша элтйәр. 23 Себәби гүнәниң хакы өлүмдир, эмма Худайың совгады Халыпамыз Месих Иса аркалы эбеди яшайышдыр.