Титус
2 Эмма сен хемише сагдын* таглымата гөрә өврет. 2 Яшулы адамлар өзүне* эрк эдйән, аграс*, сагдын дүшүнҗели болмалы. Олар иманда, сөйгүде ве чыдамлы болмакда берк болсунлар. 3 Улы яшлы аяллар хем өзлерини мукаддеслере мынасып тәрде алып барсын. Олар төхмет атмаян, көп шерап ичмейән* ве ягшы затлары өвредйән болмалы. 4 Шонда олар яш гелин-гызлара янёлдашыны ве чагаларыны сөймеги маслахат берип* билерлер. 5 Шейле-де сагдын дүшүнҗели, пәк, өй ишлерини йүрекден эдйән, говы эдим-гылымлы ве янёлдашына табын болмалы. Шонда Худайың сөзүне дил етирилмез.
6 Шонуң ялы-да яш доганлары сагдын дүшүнҗели болмага хемише хөвеслендирип дур. 7 Өзүң хем әхли ягдайларда ягшы ишлери эдип, гөрелде гөркез. Пәк затлары ыхлас* билен өврет*. 8 Хич ким сени танкытламаз ялы, пейдалы* затлары гүррүң бер. Шонда гаршы чыкян адамлар утанып, биз барада хич хили эрбет затлары айдып билмезлер. 9 Гуллар өз хоҗайынларына әхли ягдайларда табын болуп, гөвнүнден турмага чалышсынлар ве хич хили гайтаргы бермесинлер. 10 Оларың хич задыны огурламасынлар, гайтам, ынама мынасып адамдыгыны гөркезсинлер. Шонда олар Халасгәр Худайымызың таглыматыны әхли ягдайларда безәп билерлер.
11 Себәби Худайың әхли адамлары халас эдйән мерхемети аян болды. 12 Бу мерхемет бизе хәзирки дөвүрде* Худайың ислегине гаршы гелйән затлардан ве дүнйәниң хөвеслеринден йүз өвүрмеги, сагдын дүшүнҗели болмагы, догрулыкда яшамагы хем-де Худая вепалы болмагы өвредйәр. 13 Булары шатлыклы умыда ве Гудратыгүйчли Худайың хем-де Халасгәримиз Иса Месихиң аҗайып шөхратының аян болмагына гарашян дөврүмизде өвренйәрис. 14 Месих бизи әхли эрбет ишлерден азат этмек үчин өзүни гурбан берди*. Ол бизи ягшы ишлере ыхласлы ве өзүне дегишли айратын халк этмек үчин арассалады*.
15 Бу затлары айтмагыңы довам эт, себәби саңа табшырык бермәге, хөвеслендирмәге, кәемәге долы ыгтыяр берилди. Хич киме өзүңе гөвнүетмезчилик билен гарамага ёл берме.