Римлилер
16 Мен сизиң яныңыза Кенхреядакы йыгнагың гуллукчысы* болан уямыз Фибияны ёллаярын. 2 Оны Халыпамыз Исаның шәгирди хөкмүнде мукаддеслере мынасып тәрде гаршылаң ве оңа герекли затлары берип көмек эдиң. Себәби ол көп доганлары, шол санда мени-де горапды.
3 Месих Исада мениң ишдешлерим болан Приска* билен Акила салам айдың. 4 Олар мениң үчин җанларыны ховп астына салдылар. Шол себәпли олара диңе мен дәл, эйсем, башга халклардан болан йыгнакларың әхлиси-де миннетдарлык айдярлар. 5 Шейле-де оларың өйүндәки йыгнага салам айдың. Азияда* Месихиң илкинҗи шәгиртлериниң бири болан Эпенетоса хем салам айдың. 6 Сизиң үчин көп зәхмет чекен Меръеме-де салам айдың. 7 Гарындашларым ве биле туссаглыкда болан ёлдашларым Андроникус билен Юния хем салам айдың. Олар менден өң Месихиң шәгирди болупдылар, ресуллар олары говы танаярлар.
8 Месихде сөйгүли доганым болан Амплиятуса хем салам айдың. 9 Месихде ишдешимиз болан Урбана ве эзиз доганым Стахисе салам айдың. 10 Месихе вепалы галан Апеллисе ве Аристобулусың өйүндәкилерине салам айдың. 11 Гарындашым Хиродиона ве Халыпамыз Исаның шәгирди болан Нергизиң өйүндәкилерине-де салам айдың. 12 Халыпамыз Иса үчин ыхласлы зәхмет чекен уяларымыз Трифена билен Трифоса ве мәхрибан уямыз Персисе салам айдың. Ол хем Халыпамыз Иса үчин ыхласлы зәхмет чекипди. 13 Халыпамыз Исаның гуллукчысы хөкмүнде сайланан Руфуса ве онуң эҗесине салам айдың. Ол мениң хем эҗемдир. 14 Асинкритоса, Флегона, Гермесе, Патробаса, Эрмаса ве бейлеки доганлара-да салам айдың. 15 Филологос билен Юлия, Неревуса ве онуң уясына, Олимпаса хем-де олар билен бирликде әхли мукаддеслере салам айдың. 16 Бир-бириңиз билен мәхирли* саламлашың. Сизе Месихиң әхли йыгнаклары салам айдяр.
17 Доганлар, бөлүнишик дөредйән ве өвренен таглыматларыңыза гаршы чыкып, бүдремегиңизе себәп болянлардан сересап болмагы үндейәрин. Шейле адамлардан гача дуруң. 18 Себәби олар Халыпамыз Месихиң дәл-де, өз эрбет хөвеслериниң* гулларыдыр. Олар сүйҗи гүррүңлери ве яранҗаң сөзлери билен говшак йүрекли адамлары аздырярлар. 19 Сизиң вепалылыгыңыз хеммелере аяндыр, мен муңа бегенйәрин. Эмма мен сизиң ягшылык этмекде пайхаслы, эрбетлик этмекде сада болмагыңызы ислейәрин. 20 Тизден парахатлык Худайы сизе Шейтаны мынҗыратмага ыгтыяр берер. Гой, Халыпамыз Исаның мерхемети сизиң билен болсун.
21 Ишдешим Тимотеос, шейле-де гарындашларым Лукус, Ясон ве Соспатер дагылар сизе салам айдярлар.
22 Шу хаты Павлус маңа, ягны Тертия яздыртды. Мен Халыпамыз Исаның шәгирди хөкмүнде сизе салам айдярын.
23 Мени ве тутуш йыгнагы мыхман алан Гай сизе салам айдяр. Шәхериң иш доландырыҗысы Эрастос ве онуң доганы Квартос хем сизе салам айдяр. 24 *——
25 Мениң ыглан эдйән хош хабарым ве Иса Месих барадакы вагыз ишим Худайың сизи беркидип билйәндигини гөркезйәр. Гой, Оңа шөхрат болсун. Бу хош хабар Худайың аян эден мукаддес сыры билен баглыдыр. Бу сыр узак вагтлап гизлин галыпды. 26 Эмма хәзир ол сыр ачылды. Язгылардакы пыгамберликлер аркалы ве бакы Худайың буйругы билен бу мукаддес сыра әхли халклар дүшүндилер. Себәби Худай әхли халкларың Оңа иман эдип, гулак асмакларыны ислейәр. 27 Еке-тәк акылдар Худая Иса Месих аркалы эбедилик шөхрат болсун. Омын.