Эфеслилер

5 Шейлеликде, сөйгүли чагалар кимин Худайдан гөрелде алың. 2 Месихиң бизи* сөйши ялы, сиз-де сөйгүде гезиң. Ол өз җаныны якымлы ыслы гурбан хөкмүнде бизиң* үчин Худая хөдүрледи.

3 Араңызда ахлаксызлыгың*, хер хили хапалыгың я-да ачгөзлүгиң ады-да агзалмасын, себәби бу затлар мукаддеслере ярашян дәлдир. 4 Өзүңизи утанчсыз адамлар ялы алып бармаң, бош гүррүңлерден ве ярамаз дегишмелерден гача дуруң. Булар сизе ярашян дәлдир, муңа дерек Худая миннетдарлык айдың. 5 Себәби сиз хич бир ахлаксызың*, йигренҗиниң, ачгөз, ягны бутпараз адамың Месихиң ве Худайың Патышалыгыны мирас алмаҗакдыгыны билйәнсиңиз, муңа долы гөз етиренсиңиз.

6 Гой, хич ким сизи бош сөзлер билен алдамасын. Чүнки бу затлар себәпли, гулак асмаян адамлара Худайың газабы инҗекдир. 7 Шонуң үчин шейле адамлар билен хич хили гатнашык этмәң. 8 Сиз бирвагтлар гараңкылыкдадыңыз, инди болса Халыпамыза дегишли болуп ягтылыга чыкдыңыз. Шонуң үчин ягтылыгың чагалары кимин мундан бейләк-де ягтылыкда гезиң. 9 Себәби ягтылыгың мивеси хер дүрли ягшылыкдан*, догрулыкдан ве хакыкатдан ыбаратдыр. 10 Худая нәмәниң яраяндыгыны элмыдама билҗек болуң. 11 Гараңкылыгың өли ишлерине гатнашмагыңызы бес эдиң, гайтам, олары паш эдиң. 12 Биз оларың гизлинликде эдйән ишлерини айтмага-да утанярыс. 13 Нәдогры ишлериң хеммеси ягтылык аркалы паш эдилйәндир, себәби аян болан хер бир зат ягтылыкдыр. 14 Худай шейле диййәр: «Оян, эй уклап ятан адам, өлүмден дирел. Шонда Месихиң ягтылыгы үстүңе нур сачар».

15 Өзүңизи алып баршыңыза үнсли болуң. Акылсызлар ялы дәл-де, акылдарлар ялы яшаң. 16 Вагтыңызы пейдалы уланың*, себәби биз эрбет гүнлерде яшаярыс. 17 Акылсыз адамлар ялы болмаң-да, Ехованың* ислегиниң нәмеден ыбаратдыгына дүшүнҗек болуң. 18 Шерапдан серхош болмаң, себәби ол азгын* ишлере элтйәндир, гайтам, мукаддес рухдан долы болуң. 19 Бир-бириңизе мезмурлар, Худая өвгүлер, рухы нагмалар айдың, йүреклериңизде саз чалып, Ехованы* айдым билен шөхратландырың. 20 Халыпамыз Иса Месихиң ады аркалы Атамыз болан Худая әхли зат үчин элмыдама миннетдарлык айдың.

21 Месихе чуңңур хормат гойяндыгыңыз үчин, бир-бириңизе табын болуң. 22 Гой, аяллар әрлерине Месихе табын болшы ялы табын болсунлар. 23 Себәби бедениң халасгәри болан Месихиң йыгнагың башы болшы ялы, әр хем аялың башыдыр. 24 Йыгнагың Месихе табын болшы ялы, аяллар хем хер затда әрлерине табын болмалыдыр. 25 Эй әрлер, Месихиң йыгнагы сөйүп, онуң үчин җаныны гурбан эдиши ялы, сиз хем аялыңызы элмыдама сөйүң. 26 Месих йыгнагы мукаддес этмек үчин, оны сув билен, ягны Худайың сөзи билен ювуп арассалады. 27 Ол муны йыгнагың өз өңүнде пәк, тегмилтсиз, йыгыртсыз я-да шоңа меңзеш кемчиликсиз, ягны мукаддес ве биркемсиз болмагы үчин этди.

28 Әрлер хем аялыны өз беденини сөйши ялы сөймелидир. Аялыны сөййән адам өзүни сөййәндир. 29 Хич бир адам беденини йигренйән дәлдир, гайтам, оны иймитлендирип аладасыны эдйәндир. Месих хем йыгнага шейле гараяндыр. 30 Себәби биз онуң бедениниң агзаларыдырыс. 31 «Эркек адам ата-энесини гоюп, аялы билен биригер* ве икиси бир беден болар». 32 Бу мукаддес сыр өрән бейикдир. Мен Месихиң йыгнак билен гатнашыгы хакда айдярын. 33 Шонуң үчин хер бириңиз аялыңызы өзүңизи сөйшүңиз ялы сөйүң; аял хем әрине чуңңур хормат гойсун.