2 Коринфлилер

13 Ине, мен яныңыза үчүнҗи гезек бармакчы болярын. «Бириниң догры я-да ялан сөзлейәндиги ики, я үч шаядың сөзи билен тассыкланмалыдыр». 2 Хәзир яныңызда болмасам-да, айдянларымы икинҗи гезек яныңызда болан ялы кабул эдиң. Шол себәпли гүнә эденлере ве бейлекилере хем өң айдышым ялы ене-де дуйдурярын: мен баранымда, олар теммиден гачып билмезлер. 3 Шонда араңызда эҗиз дәл-де, гайтам, гүйчли болан Месихиң мен аркалы геплейәндигине гөз етирерсиңиз. 4 Догрудан-да, оны эҗиз боландыгы үчин пүрсе чүйледилер, йөне Худайың гүйҗи аркалы ол хәзир диридир. Биз хем онуң ялы эҗиз болсак-да, Худайың бизде херекет эдйән гүйҗи аркалы онуң билен яшарыс.

5 Иман эдйән затларыңыз боюнча яшаяндыгыңызы элмыдама барлап дуруң. Я-да Иса Месихиң сизиң билендигини билмейәрсиңизми? Эгер сиз Худайың разылыгыны йитирен болсаңыз, онда Месих сизиң билен болуп билмезди. 6 Мен Худайың бизи кабул эдендигине дүшүнерсиңиз дийип, йүрекден умыт эдйәрин.

7 Сиз нәдогры ишлери этмез ялы, биз Худая дога эдйәрис. Муны өзүмизиң кабул эдилендигимизи гөркезмек үчин этмейәрис. Гайтам, адамлар бизи кабул этмеселер-де, сизиң ягшы ишлери этмегиңизи ислейәрис. 8 Себәби биз хакыката гаршы хич зат эдип билмейәрис, гайтам, диңе хакыкат үчин эдйәрис. 9 Сиз гүйчликәңиз, биз эҗиз болсак-да, муңа элмыдама бегенйәрис. Ине, шол себәпли-де пикириңизи дүзетмегиңиз үчин дога эдйәрис. 10 Халыпамызың сизи рухдан дүшүрмек үчин дәл-де, беркитмек үчин берен ыгтыярыны рехимсизлик билен уланмаз ялы, мен булары яныңызда ёк вагтым язярын.

11 Шейлеликде, доганлар, сизе шуны үндейәрин: хемише шатланың, пикириңизи дүзедиң, бири-бириңизи рухландырың, бир пикирде болуң ве агзыбирликде яшаң. Шонда сөйги ве парахатлык Худайы сизиң билен болар. 12 Бир-бириңиз билен мәхирли* саламлашың. 13 Әхли мукаддеслер хем сизе салам айдяр.

14 Халыпамыз Иса Месихиң мерхемети, Худайың сөйгүси ве мукаддес рухы сизиң билен болсун.