2 Коринфлилер
10 Мен Павлус, Месихиң гөрелдесине эерип, сизе юмшаклык ве мәхир билен йүзленйәрин. Араңыздакам сиз мени говшак адам хасаплаярсыңыз, ёк вагтым болса маңа батыргай диййәрсиңиз. 2 Йөне яныңыза баранымда, бизи дүнъеви гарайышлы адам хасаплаянлара гаршы берк чәре гөрмели болмарын дийип умыт эдйәрин. 3 Биз шу дүнйәде* яшасак-да, сөвешимиз шу дүнйәдәки адамларыңкы ялы дәлдир. 4 Себәби бизиң сөвеш ярагларымыз дүнйәден дәл-де, Худайдандыр ве биз онуң берйән гүйчли яраглары аркалы ислендик берк галаны йыкяндырыс. 5 Биз ялан дүшүнҗелери ве Худай хакдакы билиме гаршы чыкян ислендик бейиклиги юмурярыс. Хер бир пикири есир эдип, оны Месихе гулак асар ялы эдйәрис. 6 Сиз бүтинлей гулак асяндыгыңызы гөркезениңизде, биз гулак асмак ислемейән хер бир адама темми бермәге тайындырыс.
7 Сиз хер задың даш кешбине гөрә баха берйәрсиңиз. Эгер бири өзүни Месихиң шәгирди хасаплаян болса, гой, ол шу барада ойлансын: онуң Месихиң шәгирди болшы ялы, биз хем онуң шәгирдидирис. 8 Эгер мен Халыпамызың берен ыгтыярына ченденаша буйсанып, сизи рухдан дүшүрмән, гайтам, иманыңызы беркиден болсам, онда утанҗа галмарын. 9 Аслында, мен язан хатларым билен сизи горкузмак ислемейәрин. 10 Себәби кәбирлери: «Ол хатларыны тәсирли ве ынандырыҗы язяр, йөне арамыздака говшак, гепләп башланда болса сөзүни диңләр ялы дәл» диййәрлер. 11 Гой, шейле адам хатларымызда нәме айдян болсак, араңыздакак хем шол айдянларымызы иш йүзүнде гөркезҗекдигимизи билсин. 12 Биз өзүни бейгелдйән я-да өзүни өңе сүрйән адамлар ялы болмага милт эдип хем билмерис. Хава, шейле адамлар өзлерини өз өлчеглери билен өлчейәрлер ве өзлерине өз дүшүнҗелерине гөрә баха берип, дүшүнҗесиздигини гөркезйәрлер.
13 Эмма биз өзүмизе берленден артык эдйәндигимизе буйсанман, гайтам, Худайың табшыран чәгинде вагыз эдип, хатда сизе-де барып етендигимизе буйсанярыс. 14 Аслында, биз яныңыза баранымызда, өзүмизе табшырыландан артык хич зат этмәндик, гайтам, Месих барадакы хош хабары сизе илкинҗи болуп вагыз этдик. 15 Биз табшырылан ишден артык эдип, кимдир бириниң чекйән зәхмети билен өвүнмейәрис. Гайтам, сизиң иманыңызың артмагы билен, биз сизиң араңызда ве өзүмизе табшырылан ерлерде хас-да көп зәхмет чекҗекдигимизе умыт эдйәрис. 16 Шонда биз хош хабары сизден башга юртларда-да вагыз эдип билерис ве башга бириниң эден ишлери билен өвүнмерис. 17 «Йөне, гой, өвүнйән адам Ехова* билен өвүнсин». 18 Себәби Ехова* мен-менлик эдйән адамы дәл-де, Оны разы эдйән адамы бейгелдйәндир.