Эфеслилер
4 Шейлеликде, Халыпамызың угрунда түрмеде отуран мен Павлус, сизе Худайың чагырышы ялы, мынасып гезмегиңизи ялбарярын. 2 Шейле-де элмыдама песгөвүнли*, юмшак, сабырлы болуң ве бири-бириңизи сөйүп, оңшуклы яшаң. 3 Араңызда парахатлыгы саклап, мукаддес рух аркалы алан агзыбирлигиңизи горамага җан эдиң. 4 Сиз бир умыда чагырылышыңыз ялы, беден бирдир, рух бирдир; 5 Халыпамыз бирдир, иман бирдир, сува чүмдүрилиш хем бирдир; 6 хеммелериң Худайы ве Атасы бирдир. Онуң хеммелериң үстүнден ыгтыяры бардыр, хеммелер аркалы ве хеммелерде херекет эдйәндир.
7 Худай хер биримизе мерхемет эдйәр. Муны Месихиң арамызда пайлаян совгатларындан гөрсе боляр. 8 Себәби: «Ол ёкарык чыкып, туссагдакылары азат этди; йыгнаклара совгат хөкмүнде дүрли укыплы адамлары берди» дийилйәндир. 9 «Ол ёкарык чыкды» диен җүмле нәмәни аңладяр? Бу онуң ашак, ягны ере дүшендигини хем гөркезйәр. 10 Ере дүшениң хут өзи әхли затлары берҗай этмек үчин гөклерден-де хас ёкарык чыкандыр.
11 Ол йыгнаклара кәбирини ресул, кәбирини пыгамбер, кәбирини хош хабарың вагызчысы, кәбирини чопан ве мугаллым эдип берди. 12 Ол муны мукаддеслере дүзедиш бермек, башгалара хызмат этмек ве Месихиң беденини* беркитмек үчин этди. 13 Әхлимизиң иманымыз бир болуп, Худайың Оглы хакда догры билим алянчак, олар бу иши ерине етирерлер. Шонда биз Месих ялы долы етишен адам болуп билерис. 14 Мундан бейләк чагалар ялы болмалың, адамларың ялан таглыматларына эерип, деңизде эйләк-бейләк чайканян ве ел билен хер тарапа ковулян гайык ялы болмалың. 15 Гайтам, хакыкаты айдалың ве әхли затда бедениң башы болан Месихден гөрелде алып, сөйги аркалы етишен адам болалың. 16 Месих аркалы бүтин беден өзара сазлашыклы бирлешйәр ве бедениң хер бир агзасы бири-бириниң зерурлыкларыны канагатландырмага көмек эдйәр. Хер агзаның кадалы ишлемеги бүтин бедениң өсмегине, ягны сөйгүде беркемегине ярдам эдйәндир.
17 Мен муны айтмак билен, Халыпамызың адындан сизе шуны үндейәрин: мундан бейләк шу дүнйәниң адамлары ялы бош пикирлере эерип яшамаң. 18 Оларың аң-дүшүнҗелери гараңкырап, Худайың берйән эбеди яшайыш умыдындан дашлашдылар, йүреклериниң гатылыгы* зерарлы Худайы танамак ислемейәрлер. 19 Олар ахлак кадаларындан йүз өврүп, өзлерини хаясыз ишлере* бердилер ве хер дүрли хапа ишлери ачгөзлүк билен эдйәрлер.
20 Йөне сиз Месихи шейле адам хөкмүнде танамадыңыз. 21 Эгер сиз, хакыкатдан-да, Исаны эшидип, хакыкаты онуң өвредиши ялы өвренен болсаңыз, 22 онда өңки хәсиетлериңизи* эгниңизден чыкарың. Себәби олар сизи алдавчы хөвеслериңиз аркалы эрбетлиге итерйәр. 23 Пикириңизи ве гарайшыңызы* элмыдама тәзеләп дуруң. 24 Шейле-де Худайың ислегине лайык гелйән* хакыкы догрулыга ве вепалылыга эсасланан тәзе хәсиетлере гейниң.
25 Шейлеликде, ялан сөзлемегиңизи бес эдип, хер бириңиз якыныңыза догрыңызы айдың, себәби биз бир бедениң агзаларыдырыс. 26 Гахарлансаңыз-да, гүнә этмәң; Гүн яшянча, гахарыңыз ятсын. 27 Иблисе өзүңизе тәсир этмәге ёл бермәң. 28 Огурлык эден адам, гой, инди огурлык этмесин; гайтам, мәтәчлер билен пайлашып билер ялы, өз эллери билен зәхмет чекип, ягшылык этсин. 29 Агзыңыздан хич хили гөвне дегиҗи* сөзлер чыкмасын, гайтам, диңлейәнлере пейдалы болар ялы, герекли вагты диңе рухландырыҗы сөзлери айдың. 30 Шейле-де Худайың мукаддес рухуны гынандырмаң. Себәби сиз гутулыш гүни төлег* аркалы халас болар ялы, шол рух билен мөхүрлененсиңиз.
31 Өзүңизден хер хили өйке-кинәни, гахар-газабы, гыкылыгы, хапа сөзлери* хем-де әхли эрбетлиги айрың. 32 Гайтам, бир-бириңизе мәхирли ве рехим-шепагатлы болуң. Худай Месих аркалы сизи нәдип багышлан болса, сиз хем бири-бириңизи йүрекден багышлаң.