2 Коринфлилер
12 Мен өвүнмәге меҗбур болярын. Йөне мунуң пейдасы болмаса-да, мен Халыпамыздан алан гөрнүшлерим ве хабарларым хакда айтмак ислейәрин. 2 Мен Месихиң шәгирди болан бир адамы танаярын. Ол 14 йыл мундан өң, үчүнҗи гөге әкидилипди. Йөне онуң бедендеми я-да беденде дәлдигини билмейәрин, муны Худай билйәндир. 3 Хава, мен шейле адамы танаярын. Халыпамыз оны Җеннете әкитди. Йөне онуң бедендеми я-да беденде дәлдигини билмейәрин, муны Худай билйәндир. 4 Ол Җеннетде адамың айдып билмейән ве айтмага ругсат берилмейән сөзлерини эшитди. 5 Мен шейле адам хакда өвнерин, йөне өзүм бабатда айтсам, эҗизликлеримден башга хич задыма өвүнмерин. 6 Мен өвүнмек ислесем-де, акылсыз адам ялы болмарын, себәби хакыкаты айтмалы боларын. Йөне мен өвүнмекден сакланарын, шонда хич ким менде гөрйән я-да менден эшидйән затлары эсасында мен хакда артык пикир эдип билмез. 7 Шейлеликде, маңа аҗайып ылхамларың берлендиги үчин, хич ким мени бейгелдип билмез.
Өзүми ченденаша бейгелтмез ялы, беденимде бир тикен бар, хава, улумсы болмазлыгым үчин, маңа эзъет берйән* Шейтаның перишдеси берилди. 8 Бу тикени менден айырсын дийип, Худая үч гезек ялбардым. 9 Йөне ол: «Мениң саңа эден мерхеметим етерликдир, себәби эҗизликлериң аркалы мениң гүйҗүм долы аян боляндыр» дийди. Шол себәпли Месихиң гүйҗи чадыр кимин үстүми өртер ялы, эҗизликлериме хөвес билен өвнерин. 10 Мен эҗизликлериме бегенйәрин, Месихиң угрунда кемсидиленимде, мәтәчлик чекенимде, ызарламалара ве кынчылыклара учранымда, леззет алярын. Себәби мен эҗиз вагтым гүйчлүдирин.
11 Мен сиз зерарлы акылсыз адам ялы болдум. Себәби сиз мениң эден ягшы ишлерим хакда гүррүң бермедиңиз. Мен сизиң өңүңизде хич ким болсам-да, сизиң «абрайлы» хасаплаян ресулларыңыздан асла пес дәлдирин. 12 Аслында, мен энчеме кынчылыклара дөз гелип, аламатлардыр гудратлы ишлери гөркездим, өзүмиң ресулдыгымы сизе субут этдим. 13 Башга йыгнаклардан пес гөрүлйәндигиңизиң еке-тәк себәби, мен сизе йүк болмак ислемедим. Мунуң үчин мени йүрекден багышламагыңызы ислейәрин.
14 Ине, мен үчүнҗи гезек яныңыза бармакчы болярын, йөне бу гезегем сизе йүк болмарын. Себәби маңа сизиң эмләгиңиз дәл-де, өзүңиз герек; аслында, чагалар ата-энеси үчин дәл-де, ата-энелер чагалары үчин зат топламалыдыр. 15 Маңа гезек галса, бар затларымы, өзүми-де сизиң угруңызда хөвес билен харчларын. Эгер мен сизи шейле гүйчли сөййән болсам, онда сиз хем мени шейле сөймели дәлми нәме? 16 Йөне хер нәме-де болса, мен сизе йүк болмадым. Муңа гарамаздан, сиз мен хакда: «Ол мекир ве бизи алдава салды» диййәрсиңиз. 17 Эйсем, мен яныңыза иберен адамларым аркалы сизден, хей-де, бир зат алдыммы? 18 Мен Титусы яныңыза гитмәге хөвеслендирдим, онуң яны билен бир доганы-да ибердим. Эйсем, Титус сизден пейдаландымы? Элбетде, ёк. Биз агзыбирликде гезмедикми? Шол бир ёлдан йөремедикми нәме?
19 Сиз шу чака ченли биз өзүмизи гораяндырыс дийип пикир эдйәрсиңизми? Биз Месихиң шәгиртлеридирис, Худай бизиң хакыкаты айдяндыгымызы билйәндир. Йөне, эзиз доганларым, биз бу затларың барыны сизи рухландырмак үчин эдйәндирис. 20 Себәби мен баранымда, сизиң өзүңизи алып баршыңыз мениң ислейшим ялы болман, мениң хем гарайшым сизиң ислейшиңиз ялы болман, гайтам, араңызда дава-җенҗел, гөриплик, гахар-газап, агзалалык, төхмет, гыбат, улумсылык ве башына гиденлик ялы затлар болар өйдүп горкярын. 21 Яныңыза баранымда, белки-де, Худай мени сизиң өңүңизде утандырар ве мен өңки эден гүнәлерине, ахлаксызлыгына*, азгын хем-де хаясыз* ишлерине тоба этмедиклер үчин хасрат чекмели боларын өйдүп горкярын.