Римлилер
3 Онда ехуды болмагың нәме артыкмачлыгы бар я-да сүннетленмегиң нәме пейдасы бар? 2 Элбетде, көп затда. Себәби Худайың мукаддес хабары илки олара ынанылды. 3 Эгер кәбир ехудылар иман этмегини бес эден болсалар нәме? Бу адамларың Худая бил баглап билмейәндигини аңладярмы? 4 Элбетде, ёк! Адам яланчы болса-да, Худай догручылдыр. Себәби: «Сениң сөзлериң догры болуп чыкар ве сен казыетде еңерсиң» дийип язылгыдыр. 5 Биз эрбет ишлери эденимизде, адамлар Худайың догручылдыгына гөз етирйәрлер. Онда Худай бизи җезаландыранда, бу онуң адалатсыздыгыны гөркезйәрми? (Мен булары адамларың гарайшына гөрә айдярын). 6 Ёк, бу асла мүмкин дәл! Эгер Худай адалатсыз болян болса, ол дүнйәниң үстүнден нәдип хөкүм чыкарсын?
7 Эгер мениң ялан сөзлемегим Худайың догручылдыгыны аян эдип, онуң шөхратланмагына гошант гошян болса, онда нәме үчин Худай мени гүнәкәр хасаплап хөкүм этсин? 8 Нәме үчин башгаларың биз хакда: «Ягшылык болар ялы, гелиң, эрбетлик эделиң» диен сөзлерини айдып билмейәрис? Шейле адамларың хөкүм эдилмеги адалатлыдыр.
9 Онда нәме, бизиң ягдайымыз оларыңкыдан хас говумы? Элбетде, ёк! Себәби хемме адамлар, ехудыларам, греклерем гүнә астындадыр. 10 Чүнки шейле язылгыдыр: «Екеҗе-де догручыл адам ёк. 11 Екеҗе дүшүнҗели адам хем ёк; Худайы агтарян-да ёк. 12 Әхли адамлар ёлдан совулдылар, оларың хич биринден пейда ёк. Ягшылык эдйән адам ёк, екеҗеси-де ёк». 13 «Оларың богазы ачык габырдыр. Олар диллери билен алдаярлар». «Додакларында алахөврениң зәхери бар». 14 «Оларың агзы гаргыш ве аҗы сөзлерден долы». 15 «Аягы ган дөкмәге ховлугяр». 16 «Олар элмыдама адамлара зыян етирип, эҗир чекдирйәрлер. 17 Парахат яшамагың нәмедигини билмейәрлер». 18 «Олар Худайдан горкмаярлар».
19 Биз Мусаның канунындакы әхли затларың шол Кануна эерйәнлере дегишлидигини билйәрис. Шонуң үчин олар өзлерини аклап билмезлер, чүнки бүтин дүнйә Худайың өңүнде гүнәкәрдир. 20 Шейлеликде, хич бир адам* кануның талапларыны берҗай эдип, Худайың өңүнде догры хасапланып билмез. Себәби биз канун аркалы гүнәниң нәмедигини анык билйәрис.
21 Эмма кануның ве пыгамберлериң шаятлык этмегине гөрә, инди кануны берҗай этмесең-де, Худайың өңүнде догры адам болуп боляр. 22 Хава, иманлы адамларың әхлиси Иса Месихе иман эдип, Худайың өңүнде догры болуп билйәрлер. Себәби Худай адамлары ала тутян дәлдир. 23 Чүнки хеммелер гүнә эдип, Худайың шөхратындан махрум болдулар. 24 Худай олары Месих Исаның төлег* гурбаны аркалы азат этди ве мерхемети билен олары догры хасаплаяр. 25 Худай Месихи төлег хөкмүнде хөдүрледи. Ол муны Оглуның ганына иман эдйән адамлар билен ярашмак үчин этди. Шейдип, Онуң догрулыгы аян болды, себәби ол адамларың гечмишде эден гүнәлерине сабырлы болуп, олары багышлады. 26 Ол хәзирем, хатда Иса иман эдйән адамы догры дийип ыглан эденде, Өз догрулыгыны аян эдйәр.
27 Онда өвүнмәге себәп бармы? Элбетде, ёк. Хайсы канун өвүнмәге себәп бермейәр? Ишлери талап эдйән канунмы? Ёк, иманы талап эдйән канун. 28 Себәби адам кануның талап эдйән ишлерини берҗай эдйәндиги үчин дәл-де, иманы аркалы догры хасапланяндыр. 29 Я-да Худай диңе ехудыларың Худайымы? Ол башга халкларың хем Худайы дәлми? Хава, ол башга халкларың хем Худайыдыр. 30 Себәби Худай бирдир, ол сүннетленен адамлары-да, сүннетленмедик адамлары-да иманы аркалы догры хасаплаяр. 31 Онда биз иман аркалы канундан йүз өвүрйәрисми? Элбетде, ёк! Гайтам, биз кануны голдаярыс.