Римлилер
4 Онда беден боюнча атамыз Ыбрайым хакда нәме дийсе болар? 2 Ол эден ишлери үчин догры адам хасапланды. Онуң өвүнмәге себәби болса-да, Худайың өңүнде өвнүп билмезди. 3 Язгыларда нәме дийилйәр? «Ыбрайым Ехова* иман эдендиги үчин догры адам хасапланды». 4 Ишлейән адама хак төлененде, совгат* хөкмүнде дәл-де, борч хөкмүнде берилйәр. 5 Эмма адам эден ишлерине бил багламан, гайтам, гүнәли адамлары догры дийип ыглан эдйән Худая иман этсе, ол гүнәли болса-да, догры хасапланяндыр. 6 Хава, Худай адамың эден ишлерине гарамаздан, оны догры хасаплаяр. Шейле адамың багтлыдыгыны Давут хем айдыпды: 7 «Эден эрбетликлери багышланан ве гүнәлери өтүлен* адам багтлыдыр. 8 Ехова* кимиң гүнәлерини хасаба алмаса, шол адам багтлыдыр».
9 Онда диңе сүннетлененлер багтлымы я-да сүннетленмедиклерем? Биз өң хем: «Ыбрайым иманы үчин догры адам хасапланды» дийипдик. 10 Худай оны хачан догры адам хасаплады? Сүннетлененден соңмы я-да сүннетленмәнкә? Худай оны сүннетленмедик вагты догры сайыпды. 11 Ол Ыбрайыма сүннетленмелидигини айтды. Бу аламат* онуң догры адамдыгыны гөркезйәрди. Себәби ол сүннетсиз вагты иман эдипди. Шейдип, ол иман эден әхли сүннетленмедик адамларың атасы болды ве Худай олары догры хасаплады. 12 Шейлеликде, ол сүннетленен неслиң, ягны диңе бир сүннетленмәге берк эерйәнлериң дәл-де, эйсем, сүннетленмәнкә иман эден атамыз Ыбрайым ялы иман ёлундан йөрейәнлериң хем атасы болуп билер.
13 Себәби Ыбрайыма ве онуң несиллерине* Мусаның кануны аркалы дәл-де, иман эдендиги үчин дүнйәниң мирасдүшери болмак вада берилди. 14 Эгер Мусаның канунына эерйәнлер мирасдүшер болан болса, онда иман эдениң бидерек боларды, вада хем ятырыларды. 15 Аслында, Мусаның кануны Худайың гахар-газабыны дөредйәндир. Эмма канун ёк болса, онда кануны бозянлар хем ёкдур.
16 Ыбрайым иман эдендиги үчин, оңа вада берилди ве Худайың мерхемети аян болды. Шейлеликде, Ыбрайымың неслине-де* вада берилди. Ол диңе бир Мусаның канунына берк эерйәнлере дәл, эйсем, әхлимизиң атамыз болан Ыбрайым ялы иман эдйән адамлара-да берилди. 17 Себәби: «Мен сени көп халкларың атасы эдип белледим» дийип язылгыдыр. Худайың вадасының ерине етҗекдиги шүбхесиздир. Себәби Ыбрайым өлүлери дирелдип билйән, хатда болмадык зады болан ялы айдып билйән* Худая бил баглады. 18 Ол мүмкин дәл ялы болуп гөрүнсе-де, умыт аркалы көп халкларың атасы болуп билҗекдигине иман этди. Себәби ол: «Сениң неслиң* хем шейле көп болар» дийлен сөзлере ынанды. 19 Иманы говшак болмаса-да, ол өз беденини өли хасаплаярды, себәби ол 100 яшларындады ве Сараның чага догруп билмеҗекдигини* билйәрди. 20 Эмма ол Худайың вадасына иман эдип, асла шүбхеленмеди. Гайтам, иманда беркәп, Худайы шөхратландырды. 21 Шейле-де ол Худайың вадасының ерине етҗекдигине долы ынанярды. 22 Шол себәпли «ол догры адам хасапланды».
23 Эмма «ол догры адам хасапланды» диен сөзлер диңе онуң үчин язылмады. 24 Олар бизиң үчин хем айдылды, себәби биз Халыпамыз Исаны өлүмден дирелден Худая иман этдик. 25 Иса бизиң гүнәлеримиз үчин берилди. Бизи догры адам хасапламак үчин, Худай оны өлүмден дирелтди.