Якуп
3 Доганларым, хас агыр хөкүме сезевар болҗакдыгымызы билйәндигиңиз үчин хеммәңиз мугаллым болмаң. 2 Бизиң әхлимиз көп ялңышярыс*. Эгер ким сөзүнде ялңышмаса, онда ол кәмил ве тутуш беденине эрк эдип* билйән адамдыр. 3 Биз атлара баш өвретмек үчин агзына агыздырык салсак, оларың бүтин гөвресине-де эрк эдип билйәндирис. 4 Шейле-де гәмилере үнс бериң: олар өрән улы болуп, гүйчли ел билен херекет эдйән хем болса, оны кичи рул билен ислән тарапыңа гөнүкдирип боляр.
5 Шонуң ялы-да дил бедениң кичиҗик агзасы болса-да, ченденаша өвүнйәр. Кичиҗик от хем, гөр, нәхили улы токайы якып билйәр! 6 Дил хем отдур. Ол беден агзаларының ичинде иң залымыдыр. Дил тутуш бедени хапалап, адамың бүтин дурмушыны якяндыр, ол эдил Җәхеннем* оды ялы әхли зады ёк эдйәндир. 7 Хер дүрли йыртыҗы хайванлары, гушлары, сүйренҗилери ве деңиз хайванларыны элдекилешдирип боляр. Хава, олары адамлар элдекилешдирйәр. 8 Эмма хич бир адам дилини саклап билмейәр. Дил адама эйгертмейәр, хеммелере зыян етирйәр, ол зәхерден долудыр. 9 Биз онуң билен хем Атамыз Ехованы* шөхратландырярыс, хем «Худайың кешбинде» ярадылан адамлара гаргаярыс. 10 Шейлеликде, шол бир агыздан хем алкыш, хем гаргыш чыкяр.
Доганларым, бу бейле болмалы дәл. 11 Эйсем, бир чешмеден хем сүйҗи, хем аҗы сув акярмы? 12 Доганларым, инҗир агаҗы зейтун мивесини я-да үзүм агаҗы инҗир берип билйәрми? Шор чешме хем сүйҗи сув берип билмейәр.
13 Сизиң араңызда акылдар ве дүшүнҗели адам бармы? Гой, ол бу хәсиетлерини юмшаклык билен, ягны өзүниң ягшы эдим-гылымы ве эдйән ишлери билен гөркезсин. Себәби юмшаклык акылдарлыгың мивесидир. 14 Эмма йүрегиңизде гөриплик ве игенҗеңлик* бар болса, онда өзүңизи акылдар сайып өвүнмәң. Ёгсам, ялан сөзледигиңиз болар. 15 Ол гөкден инйән акылдарлык дәл-де, җынлара, тен хөвеслерине эерйән адамлара ве бу дүнйә махсус болан акылдарлыкдыр. 16 Себәби гөриплигиң, игенҗеңлигиң бар еринде тертипсизлик ве хер хили эрбетлик хем бардыр.
17 Эмма гөкден инйән акылдарлык, илки билен, пәк, соңра парахат, пайхаслы*, гулак асмага тайын, рехимдарлыга ве ягшы ишлере бай, ала тутмаян хем-де икийүзли дәлдир. 18 Галыберсе-де, парахатлыгы саклаян адамлар догрулык мивесини парахат шертлерде экйәндир*.