Эфеслилер
3 Ине, шол себәпли-де Месих Исаның угрунда ве сизиң, ягны ехуды дәллериң пейдасы үчин түрмеде отуран мен Павлус... 2 Худайың мерхемети аркалы сизе көмек этмек үчин җогапкәрчилик аландыгымы эшиденсиңиз. 3 Хава, Худай маңа мукаддес сырыны аян эдипди. Мен бу хакда сизе өң гысгача языпдым. 4 Сиз оны оканыңызда, мениң Месих барадакы мукаддес сыра чуңңур дүшүнйәндигиме гөз етирерсиңиз. 5 Бу сыр гечен несиллере аян эдилмәнди. Хәзир болса Худай оны рухы аркалы мукаддес ресулларына ве пыгамберлерине аян этди. 6 Ол сыр шундан ыбарат: Месих Исаның өзге миллетден болан шәгиртлери Месихиң мирас алан задына шәрик болуп, шол бир бедениң агзалары боларлар. Олар хем бизиң ялы хош хабар аркалы Худайың вада эден затларына эе боларлар. 7 Худайың мерхемети билен мен сизе мукаддес сыры дүшүндирйән гуллукчы болдум. Худай шейле мерхемети маңа өз гүйҗи аркалы берендир.
8 Бу мерхемет мукаддеслериң иң кичиси болан маңа эдилди. Шонуң үчин мен адамлара Месих барадакы хош хабары, ягны чәксиз билими вагыз этмелидирин. 9 Шейле-де мен адамлара Худайың мукаддес сырының ерине етишини дүшүндирмели. Әхли зады ярадан Худай ол сыры асырлар бойы гизлин саклапды. 10 Өң шейле болан хем болса, хәзир Худай йыгнак аркалы акылдарлыгыны гөкдәки хөкүметлере ве ыгтыярлыклара дүрли ёллар билен аян эдйәр. 11 Худай муны Халыпамыз Месих Иса бабатдакы эбеди ниетине гөрә амала ашырандыр. 12 Шоңа гөрә-де биз Месихе иман эдйәндигимиз үчин, ол аркалы чекинмән* геплейәрис ве Худая ынам билен якынлашып билйәрис. 13 Шол себәпли сизе көмек этмек үчин чекйән мушакгатларым зерарлы рухдан дүшмезлигиңизи үндейәрин. Себәби бу сизе шөхрат гетирйәндир.
14 Ине, шонуң үчин хем мен Атамың өңүнде дыза чөкүп дога эдйәрин. 15 Себәби гөкдәки ве ердәки хер бир машгала Худайдан алан ады үчин оңа борчлудыр. 16 Мен шөхрата бай болан Худайдан рухы аркалы сизиң йүрегиңизи ве пикирлериңизи беркитмегини дилейәрин. 17 Шейле-де Месихиң өз сөйгүси билен иманыңыз аркалы йүреклериңизде месген тутмагыны дилейәрин. Иманда көк уруп, онда берк дуруң. 18 Шонда сиз әхли мукаддеслер билен билеликде хакыкатың гиңлигине, узынлыгына, бейиклигине ве чуңлугына долы дүшүнип билерсиңиз. 19 Шейле-де Худайың берйән әхли хәсиетлерине долы эе болмагыңыз үчин билимден-де ёкары болан Месихиң сөйгүсине гөз етирерсиңиз.
20 Догрудан-да, Худай бизде херекет эдйән гүйҗи аркалы сораян ве дүшүнйән әхли затларымыздан-да хас көп затлары эдип билйәр. 21 Гой, йыгнаклар хем-де Месих Иса аркалы Худая несиллер бойы бакы ве эбеди шөхрат болсун. Омын.