Еврейлер

3 Гөге чагырылан мукаддес доганлар, Иса хакда ойланың. Сиз оны ресул ве баш руханы хөкмүнде кабул эденсиңиз. 2 Мусаның Худайың бүтин өйүне вепалы болшы ялы, Иса хем өзүни беллән Худая вепалыды. 3 Себәби өйи гураның өйден хас көп хормата эе болшы ялы, Иса хем Мусадан хас көп шөхрата мынасып болды. 4 Элбетде, хер бир өйүң гуруҗысы бардыр, әхли зады гуран болса Худайдыр. 5 Муса Худайың бүтин өйүне хызматчы хөкмүнде вепалы болды. Онуң гуллугы Худайың гелеҗекде айтҗак затларына шаятлык эдйәрди. 6 Эмма Месих Атасының өйүне Огул хөкмүнде вепалы хызмат эдйәрди. Эгер бизем соңуна ченли умыдымыза берк япышып, ол хакда чекинмән* гүррүң берсек ве оңа буйсансак, Худайың өйи боларыс.

7 Мукаддес рух аркалы шейле язылгыдыр: «Шу гүн сиз мениң сесиме гулак асмак ислесеңиз, 8 онда ата-бабаларыңызың чөлде мени сынап, гахарымы гетириши ялы, кесирлик этмәң. 9 Чөлде ата-бабаларыңыз 40 йыллап эден ишлерими гөрселер-де, мени сынапдылар. 10 Ине, шонуң үчин хем мен бу несли йигренип: „Олар йүреклеринде менден элмыдама узакдадырлар, ёлларымы-да билмек ислемедилер“ дийдим. 11 Шонда мен гахар билен: „Олар мениң дынчлык ериме гирмезлер“ дийип ант ичипдим».

12 Доганлар, йүрегиңиз залым ве имансыз болуп, дири Худайдан дашлашмакдан сересап болуң. 13 Гүнәниң алдавына дүшүп, кесир болмаз ялы, «Шу гүн» дийилйән вагты бир-бириңизи хер гүн рухландырың. 14 Эгер биз башдакы ынамымызы соңуна ченли берк сакласак, Месих билен биле боларыс. 15 Себәби Худай: «Шу гүн сиз мениң сесиме гулак асмак ислесеңиз, онда ата-бабаларыңыз ялы гахарымы гетирип, кесирлик этмәң» дийипди.

16 Худайың сесини эшидип, онуң гахарыны гетирен ким? Эйсем, Мусаның ёлбашчылыгы билен Мүсүрден чыканларың бары дәлми? 17 Галыберсе-де, Худай 40 йыллап кими йигренди? Эйсем, җесетлери чөлде галан гүнәкәрлери дәлми? 18 Ол — дынчлык ериме гирмерсиңиз — дийип, ким хакда ант ичипди? Эйсем, гулак асмадык адамлар хакда дәлми? 19 Гөршүмиз ялы, олар имансыз боландыклары үчин Худайың дынчлык ерине гирип билмедилер.