ЯХЯ ГЕЛЕН ЫЛХАМ

1 Худай өз гулларына тизден нәмәниң болҗакдыгыны аян этмек үчин Иса Месих аркалы шу ылхамлы сөзлери берди. Иса хем перишдесини иберип, муны гөчме маныдакы гөрнүшлер аркалы гулы Яхя гүррүң берди. 2 Яхя Худайың берен сөзүне ве Иса Месихиң эден шаятлыгына, хава, гөрен әхли затларына гүвә гечди. 3 Шу пыгамберлик сөзлерини сесли окаян, оны эшидйән ве ондакы язылан затлары берҗай эдйән адам багтлыдыр, себәби белленен вагт голайлады.

4 Мен Яхя, булары Азиядакы* еди йыгнага язярын:

«Хәзир хем, өң хем бар болан, гелеҗекде-де болҗак Худайың» ве онуң тагтының өңүнде дуран еди рухуң мерхемети хем парахатлыгы сизиң билен болсун. 5 Шейле-де «Вепалы шаят», «өлүмден илкинҗи болуп дирелен» ве «ер йүзүниң патышаларының Хөкүмдары» Иса Месихден сизе мерхемет хем парахатлык болсун.

Ол бизи сөйүп, ганы аркалы гүнәлеримизден азат этди, 6 Ата Худайымызың өңүнде патышалар хем-де руханылар эдип белледи. Бакы шөхрат ве гүйч онуңкы болсун. Омын.

7 Ине, ол булутлар билен гелер, хер кес оны гөрер, оны найза билен санҗанлар хем гөрерлер; ол себәпли ер йүзүндәки әхли тайпалар хасрат чекип, гурсагына урарлар. Хава, бу хөкман болар. Омын.

8 Ехова* Худай шейле диййәр: «Мен Алфа ве Омега*, хәзир хем, өң хем бар болан, гелеҗекде-де болҗак Гудратыгүйчли Худайдырын».

9 Мен, доганыңыз Яхя, Исаның шәгирди хөкмүнде сизиң ялы кынчылыклара душ гелйәрин, чыдамлы болярын ве патышалыга умыт эдйәрин. Мен Худай ве Иса барада шаятлык эдйәндигим үчин Патмос адасына дүшдүм. 10 Мукаддес рух мени Халыпамызың гүнүне алып гитди. Шонда мен аркамдан бириниң сурнай кимин гүйчли сесини эшитдим. 11 Ол маңа: «Гөрен затларыңы голязма язып, еди йыгнага, ягны Эфесе, Смирна, Пергама, Тиятира, Сардиния, Филаделфия, Лаодикия ибер» дийди.

12 Мен өзүм билен геплешип дураны гөрмек үчин ызыма өврүленимде, алтындан ясалан еди саны шемдан гөрдүм. 13 Оларың ортарасында ынсан оглуна меңзеш бири дурды. Онуң топугына етйән узын доны ве дөшүне етип дуран алтын гушагы барды. 14 Шейле-де келлесиндәки сачлары ак йүң ве гар ялы ап-акды, гөзлери болса одуң ялны ялыды. 15 Аяклары отлы печден чыкан арасса мис киминди, сеси болса бейик шарлавугың гүйчли сеси ялыды. 16 Онуң саг элинде еди йылдыз барды, агзындан йити, узын ве ики тарапы кесгир гылыч чыкып дурды, йүзи болса гүйчли нур сачян Гүн киминди. 17 Мен оны гөренимде, өли кимин аягының өңүне йыкылдым.

Шонда ол саг элини үстүме гойды-да, шейле дийди: «Горкма, мен Илкинҗи ве Соңкудырын. 18 Мен диридирин. Мен өлүпдим, йөне, ине, бакы ве эбеди яшарын. Өлүмиң ве Габрың* ачарлары мендедир. 19 Шонуң үчин гөрен затларыңы, болуп дуран затлары ве шундан соң болҗак затлары яз. 20 Саг элимде гөрен йылдызларың ве алтындан ясалан еди шемданың мукаддес сыры шудур: еди йылдыз еди йыгнагың перишделерини, еди шемдан болса еди йыгнагы аңладяр.

2 Эфесдәки йыгнагың перишдесине шейле сөзлери яз: Саг элинде еди йылдызы саклаян ве еди саны алтын шемданың арасында гезйән шейле диййәр: 2 „Мен сениң ишлериңи, чекйән зәхметиңи, чыдамлылыгыңы, эрбет адамлары кабул этмейәндигиңи, ресул болмасалар-да, өзлерине „ресул“ диййән ве ялан сөзлейәнлери сынап барлаяндыгыңы билйәрин. 3 Мениң адым үчин көп кынчылыклара душ гелен хем болсаң, берк дурдуң, ядамадың. 4 Муңа гарамаздан, саңа гаршы айтҗак бир задым бар: сениң башдакы сөйгиң совапдыр.

5 Сен нәмәңи йитирендигиңи ядыңа сал, тоба эт ве өңки эден ишлериңи эдип башла. Эгер тоба этмесең, мен гелерин-де, шемданыңы дуран еринден айрарын. 6 Йөне сениң эдйән бир ягшы ишиң бар: сен Николаның дини топарының* эдйән ишлерини йигренйәрсиң. Оны мен хем йигренйәрин. 7 Гой, гулагы бар адам мукаддес рухуң йыгнаклара нәме диййәндигини эшитсин: мен сөвешде еңене Худайың җеннетиндәки яшайыш агаҗының мивесинден иймәге ругсат берерин“.

8 Смирнадакы йыгнагың перишдесине шейле сөзлери яз: „Илкинҗи ве Соңкы“, ягны өлүп, соңра дирелен шейле диййәр: 9 „Мен сениң чекйән кынчылыгыңы ве гарыпдыгыңы билйәрин, йөне сен байсың. Ехуды болмасалар-да, өзлерине „ехуды“ дийип, саңа дил етирйәнлери хем билйәрин, эмма олар Шейтаның синагогасыдыр*. 10 Чекҗек кынчылыкларыңдан горкма. Ине, Иблис сизиң кәбириңизи түрмә басар. Шонда сиз долы сыналып, он гүнләп хорлук чекерсиңиз. Өлйәнчәң вепалы гал, мен хем саңа яшайыш тәҗини берерин. 11 Гой, гулагы бар адам мукаддес рухуң йыгнаклара нәме диййәндигини эшитсин: сөвешде еңен адама икинҗи өлүм асла зыян етирмез“.

12 Пергамдакы йыгнагың перишдесине шейле сөзлери яз: Йити, узын ве ики тарапы кесгир гылыҗы болан шейле диййәр: 13 „Сениң ниреде яшаяндыгыңы, ягны Шейтаның тагтының дуран еринде яшаяндыгыңы билйәрин; муңа гарамаздан, сен мениң адыма вепалы галярсың, хатда вепалы шаядым Антипасың гүнлеринде-де маңа болан иманыңдан йүз өвүрмедиң. Оны сизиң шәхериңизде, ягны Шейтаның месген тутян еринде өлдүрипдилер.

14 Йөне саңа гаршы айтҗак кәбир затларым бар: араңызда Баламың таглыматларына эерйәнлер бар. Ол Баллага ысрайыл огулларының өңүнде бүдреме дашыны гоймагы, ягны бутлара гурбан эдилен затлары иймеги ве ахлаксызлык* этмеги өвредипди. 15 Шонуң ялы-да араңызда Николаның дини топарының таглыматларына эерйәнлер хем бар. 16 Шонуң үчин тоба эт, ёгсам мен басым барарын-да, агзымдан чыкып дуран узын гылыҗым билен олара гаршы сөвешерин.

17 Гой, гулагы бар адам мукаддес рухуң йыгнаклара нәме диййәндигини эшитсин: Мен сөвешде еңене бираз гизлин маннадан ве йүзүнде тәзе ат язылан ак даш берерин. Ол ады өзүне берленден башга хич ким билйән дәлдир“.

18 Тиятирадакы йыгнагың перишдесине шейле сөзлери яз: Худайың Оглы, ягны гөзлери одуң ялны кимин, аяклары болса арасса мис ялы болан шейле диййәр: 19 „Мен сениң эдйән ишлериңи, сөйгиңи, иманыңы, гуллугыңы, чыдамлылыгыңы ве өңкүден хас көп ишлери эдйәндигиңи билйәрин.

20 Йөне саңа гаршы айтҗак задым бар: сен өзүни пыгамбер хасаплаян Изабел атлы аяла гөз юмярсың. Ол мениң гулларымы алдава салып, ахлаксызлык* этмеги ве бутлара гурбан эдилен затлары иймеги өвредйәр. 21 Мен оңа тоба этмәге вагт бердим, йөне ол эдйән ахлаксызлыгына* тоба этмек ислемейәр. 22 Ине, мен оны яравсызлыга учрадарын, онуң тәсирине дүшүп, зына эдйәнлер тоба этмеселер, мен олары улы бетбагтчылыга сезевар эдерин. 23 Онуң чагаларына өлүм җезасыны берерин. Шонда йыгнакларың әхлиси чуң пикирлери* ве йүреклери барлаяның мендигими билерлер. Мен хер кесиң эден ишине гөрә хакыны берерин.

24 Эмма Тиятирадакы бейлекилере, ягны Изабелиң таглыматына эермейән ве „Шейтаның чуңңур сырларыны“ билмек ислемедиклере шейле диййәрин: Мен сизиң үстүңизе башга зат йүклемейәрин. 25 Хава, мен барянчам, догрулык ёлунда берк дуруң. 26 Сөвешде еңене ве табшырыгымы берҗай эдйәне халкларың үстүнден хөкүм сүрмәге ыгтыяр берерин. 27 Ол демир хаса билен адамлара чопанчылык эдер. Шонда олар тоюн гаплары кимин бөлек-бөлек боларлар, чүнки мен хем Атамдан шейле ыгтыяры аландырын. 28 Мен оңа даң йылдызыны берерин. 29 Гой, гулагы бар адам мукаддес рухуң йыгнаклара нәме диййәндигини эшитсин“.

3 Сардиниядакы йыгнагың перишдесине шейле сөзлери яз: Худайың еди рухы ве еди йылдызы бар болан шейле диййәр: „Мен сениң эдйән ишлериңи билйәрин. Сен дири ялы болуп гөрүнйәрсиң, йөне, аслында, өлүсиң. 2 Хүшгәр бол ве өлҗек болуп дуран затларыңы беркит, себәби сен Худайың ислейән затларының хич бирини ерине етирмедиң. 3 Шонуң үчин кабул эден ве эшиден затларыңы ядыңа сал, олары гайым тут-да, тоба эт. Мен огры кимин гелерин, эгер оя болмасаң, мениң хайсы сагатда гелҗегими асла билмерсиң.

4 Хер нәме-де болса, Сардинияда донларыны хапаламадык санлыҗа адам бар. Олар ак эшик гейип, янымда гезерлер, чүнки олар муңа мынасыпдыр. 5 Сөвешде еңен ак дон геер ве мен онуң адыны яшайыш китабындан хич хачан өчүрмерин. Атамың ве онуң перишделериниң өңүнде оны танаяндыгымы ачык айдарын. 6 Гой, гулагы бар адам мукаддес рухуң йыгнаклара нәме диййәндигини эшитсин“.

7 Филаделфиядакы йыгнагың перишдесине шейле сөзлери яз: Ачан гапысыны хич ким япып билмейән, япан гапысыны хем хич ким ачып билмейән мукаддес, догручыл ве элинде Давудың ачары болан шейле диййәр: 8 „Мен сениң эдйән ишлериңи билйәрин. Ине, сениң өңүңде хич кимиң япып билмеҗек гапысыны ачдым. Мен сениң гүйҗүңиң аздыгыны, сөзүми тутандыгыңы ве адыма вепалыдыгыңы субут эдендигиңи билйәрин. 9 Ине, Шейтаның синагогасындан боланлар ехуды болмасалар-да, өзлерини ехуды хасаплап, ялан сөзлейәрлер. Олары сениң яныңа гелип, аягыңа йыкылар ялы эдерин ве сени сөййәндигими гөркезерин. 10 Мениң чыдамлылыгымдан гөрелде аландыгың үчин, сени бүтин ер йүзүне инҗек сынаг сагадындан халас эдерин. Шонда ер йүзүнде яшаянлар сыналар. 11 Мен тизден гелерин. Тәҗиңи хич ким алып билмез ялы, барыңы гайым сакла.

12 Мен сөвешде еңени Худайымың ыбадатханасының сүтүни эдерин ве ол ондан гайдып хич хачан чыкмаз. Оңа Худайымың адыны, Онуң шәхериниң, ягны гөкден, Худайымың янындан инен Тәзе Иерусалимиң адыны ве өзүмиң тәзе адымы язарын. 13 Гой, гулагы бар адам мукаддес рухуң йыгнаклара нәме диййәндигини эшитсин“.

14 Лаодикиядакы йыгнагың перишдесине шейле сөзлери яз: „Омын“ атлы, Худайың илкинҗи яраданы, вепалы ве догручыл шаят шейле диййәр: 15 „Мен сениң эдйән ишлериңи билйәрин. Сен не совук, не-де гызгынсың. Мен сениң я совук, я-да гызгын болмагыңы ислейәрин. 16 Йөне сен йылысың, не гызгын, не-де совук боландыгың үчин, сени агзымдан түйкүрип ташларын. 17 Сен „Мен бай, байлык топладым ве хич зада мәтәч дәлдирин“ диййәрсиң, йөне, аслында, гөзгыны, бетбагт, гарып, көр ве ялаңач ягдайдадыгыңы билмейәрсиң. 18 Менден отда арассаланан алтыны, ак донлары ве гөзүңе чалар ялы, гөз ягыны сатын алмагыңы маслахат берйәрин. Шонда сен баярсың, ялаңачдыгыңа утанмаз ялы, эгниңде эшигиң болар, гөзүң хем гөрер.

19 Мен сөййәнлеримиң әхлисине кәйәп, темми берйәндирин. Шонуң үчин ыхласлы бол-да, тоба эт. 20 Ине, мен гапының агзында оны какып дурун. Сесими эшидип, гапыны ачан адамың өйүне гирерин, онуң билен биле агшамлык нахарыны иерин. 21 Мен сөвешде еңене тагтымда отурмак сылагыны берерин. Себәби мен хем еңип, Атам билен биле онуң тагтында отырын. 22 Гой, гулагы бар адам мукаддес рухуң йыгнаклара нәме диййәндигини эшитсин“».

4 Шондан соң, ине, гөкде бир ачык гапы гөрдүм ве мениң билен башда геплешениң сесини эшитдим. Онуң сеси сурнай киминди, ол маңа: «Шу ере гел, мен саңа болмалы затлары гөркезейин» дийди. 2 Шол бада үстүме Худайың мукаддес рухы инди. Ине, мен гөкде дуран тагты ве онда отуран бирини гөрдүм. 3 Тагтың үстүнде Отураның даш кешби яшма дашына ве гызыл реңкли гымматбаха даша меңзейәрди. Тагтың даш-төверегинде зүмерреде меңзеш әлемгошар барды.

4 Тагтың даш-төверегинде 24 саны тагт барды. Тагтларда эгни ак эшикли ве башында алтын тәчлери болан 24 яшулы отырды. 5 Мен тагтдан йылдырым чакяндыгыны гөрдүм ве гөк гүррүлдисиниң сесини эшитдим; тагтың өңүнде янып дуран еди саны отлы чыралар барды. Олар Худайың еди рухуны аңладяр. 6 Тагтың өңүнде дуп-дуры* айнадан ясалан деңзе меңзеш бир зат барды.

Ортада дуран тагтың дашында өңлери ве ызлары гөзден долы дөрт саны керуп* дурды. 7 Биринҗи керубың йүзи ёлбарса, икинҗисиниңки яш өкүзе, үчүнҗисиниңки адама, дөрдүнҗисиниңки болса бүргүде меңзейәрди. 8 Дөрт керубың херсиниң алты ганаты барды; ганатларың бар ери ве ашагы гөзден долуды. Олар гиҗе-гүндиз ызыны үзмән: «Хәзир хем, өң хем бар болан, гелеҗекде-де болҗак Гудратыгүйчли Худай Ехова* мукаддесдир, мукаддесдир, мукаддесдир» диййәрдилер.

9 Керуплар хер гезек тагтда Отурана, ягны бакы ве эбеди Яшаяна шөхрат, хормат хем-де миннетдарлык айданларында, 10 йигрими дөрт яшулы тагтда отураның өңүнде дыза чөкүп, бакы ве өмүрлик яшаян Худая сежде эдйәрдилер. Олар башларындакы тәчлерини тагтың өңүне зыңып, шейле диййәрдилер: 11 «Гудратыгүйчли Худайымыз Ехова*, сен шөхраты, хорматы, алкышы алмага мынасыпсың. Себәби әхли зады сен яратдың, олар сениң ислегиң билен яшаяндыр ве дөредилендир».

5 Мен тагтда отуран Худайың саг элинде ичи-дашы язылгы ве дүйрленип, еди мөхүр билен беркидилен голязманы гөрдүм. 2 Соңра бир гүйчли перишдәни хем гөрдүм. Ол батлы сес билен: «Голязманың мөхүрлерини айрып, оны ачмага ким мынасыпка?» дийди. 3 Эмма голязманы ачып, оны окамага гөкде-де, ерде-де, ериң астында-да мынасып хич ким тапылмады. 4 Мен голязманы ачып, оны окамага мынасып хич кимиң тапылмандыгыны гөренимде, мөңңүрип агламага башладым. 5 Шонда яшулуларың бири: «Агламагыңы гой. Ине, яхуда тайпасының Ёлбарсы, Давудың неслинден* болан ве сөвешде еңен голязманың еди мөхүрини айрып, оны ачмага мынасыпдыр» дийди.

6 Мен ортада дуран тагтың ве дөрт керубың янында дамагы чалнан ялы болуп гөрүнйән бир гузыны гөрдүм. Ол яшулуларың ортасында дурды. Гузының еди шахы ве еди гөзи барды. Бу гөзлер Худайың бүтин ер йүзүне иберен еди рухуны аңладяр. 7 Гузы шол бада өңе чыкды-да, тагтда Отураның саг элиндәки голязманы алды. 8 Ол голязманы аланда, дөрт керуп билен 24 яшулы Гузының өңүнде дыза чөкдүлер. Яшулуларың херсинде арфа ве ичи бухурдан долы алтындан ясалан гап барды. Бухур мукаддеслериң догаларыны аңладяр. 9 Олар бир тәзе айдым айдярдылар: «Сен голязманы алып, онуң мөхүрлерини ачмага мынасыпсың. Себәби сен хер тайпадан, хер дилден, хер халкдан ве хер миллетден болан адамлары Худая гуллук этмеклери үчин җаныңы гурбан эдип, ганың билен сатын алдың. 10 Сен олары Худайымыз үчин патышалар ве руханылар этдиң. Олар патышалар ве руханылар болуп, ериң үстүнден хөкүм сүрерлер».

11 Шонда мен тагтың, дөрт керубың ве яшулуларың даш-төверегинде дуран энчеме перишделери гөрдүм хем-де оларың сеслерини эшитдим. Оларың саны мүңлерче мүңлер ве 10 мүңлерче 10 мүңлерди. 12 Олар батлы сес билен: «Дамагы чалнан Гузы гүйҗи, байлыгы, акылдарлыгы, гүйч-кувваты, хорматы, шан-шөхраты ве берекети алмага мынасыпдыр» диййәрдилер.

13 Мен гөкдәки, ердәки, ериң астындакы, деңиздәки ве оларың ичиндәки ярадыланларың хеммесиниң: «Тагтда отуран Худая ве Гуза бакы хем эбеди шөхрат, хормат, алкыш болсун» диййәндиклерини эшитдим. 14 Дөрт керуп хем: «Омын!» диййәрди, яшулулар болса дыза чөкүп, Худая сежде этдилер.

6 Соңра мен Гузының еди мөхүриң бирини ачаныны гөрдүм. Шонда дөрт керубың бири гөк гүррүлдисине меңзеш сес билен: «Гел!» дийди. 2 Ине, гөрсем, бир ак ат чыкды, онуң үстүнде отураның элинде яйы ве окы барды. Оңа бир тәч берилди ве ол еңмек үчин чыкып, душманларының үстүнден долы еңиш газанды.

3 Гузы икинҗи мөхүри ачанда, икинҗи керубың: «Гел!» диенини эшитдим. 4 Шонда мен гызыл реңкли башга бир аты гөрдүм. Адамлар бир-бирини гырып өлдүрер ялы, атың үстүнде отурана ер йүзүнден парахатлыгы айырмак ыгтыяры ве улы гылыч берилди.

5 Гузы үчүнҗи мөхүри ачанда, үчүнҗи керубың: «Гел!» диенини эшитдим. Шонда гара реңкли бир ат гөрдүм. Онуң үстүнде отураның элинде терези барды. 6 Дөрт керубың арасындан: «Бир килограм* бугдай бир динара*, үч килограм арпа хем бир динара деңдир; йөне зейтун ягы билен шераба зыян етирме» диен сес эшитдим.

7 Гузы дөрдүнҗи мөхүри ачанда, дөрдүнҗи керубың: «Гел!» диенини эшитдим. 8 Ине, гөрсем, солук реңкли бир ат чыкды. Онуң үстүнде отураның ады Өлүмди. Габыр* хем онуң ызындады. Олара ер йүзүниң дөртден бир бөлегинде яшаян адамлары узын гылыч, ачлык, өлүм ховплы кесел ве вагшы хайванлар билен өлдүрмек ыгтыяры берилди.

9 Гузы бәшинҗи мөхүри ачанда, гурбанлык сыпасының дүйбүнде Худайың сөзүни берҗай эдип, вагыз ишине гатнашанларың дөкүлен ганыны гөрдүм. 10 Олар батлы сес билен: «Эй мукаддес хем догручыл Хөкмүрован Худайымыз, сен хачан ер йүзүниң яшайҗыларыны хөкүм эдип, бизиң ганымыз үчин ар алып берҗек?» диййәрдилер. 11 Оларың херсине узын ак дон берилди ве өзлери ялы өлдүрилен имандашларының хем-де доганларының саны долянча, бираз гарашмалыдыгы айдылды.

12 Гузы алтынҗы мөхүри ачанда, гүйчли ертитреме боландыгыны гөрдүм; шонда Гүн йүң* ялы гап-гара, Ай хем ган ялы тутуш гызыл болды. 13 Гөгүң йылдызлары хем гүйчли ел туранда, инҗир агаҗының мивелериниң гачышы ялы, ере гачды. 14 Гөк болса кагыз ялы дүйрленип, зым-зыят болды. Дагларың ве адаларың хеммеси еринден айрылды. 15 Шонда ер йүзүниң патышалары, ёкары везипели адамлары, гошун серкерделери, байлары, ыгтыярлы адамлары, әхли гул ве азат адамлары дагың говакларында хем-де гаяларының арасында гизлендилер. 16 Олар даглара ве дашлара: «Үстүмизе йыкылың-да, бизи тагтда отуран Худайың йүзүнден ве Гузының газабындан гизләң. 17 Себәби оларың бейик газап гүни гелендир, Худайың өңүнде ким дуруп билер?» диййәрдилер.

7 Шондан соң мен ериң дөрт бурчунда дуран дөрт перишдәни гөрдүм. Олар ер йүзүне, деңзе ве хич бир агаҗа өвүсмесин дийип, ериң дөрт елини саклап дурдулар. 2 Мен гүндогардан ашак инип гелйән башга бир перишдәни гөрдүм. Онуң элинде дири Худайың мөхүри барды; ол ер йүзүне ве деңзе зыян етирмәге ыгтыяр берлен дөрт перишдә батлы сес билен: 3 «Худайымызың гулларының маңлайына мөхүр басянчак, ер йүзүне, деңзе ве агачлара зыян етирмәң» дийди.

4 Шонда мен мөхүрлененлериң 144 мүң адамдан ыбаратдыгыны эшитдим. Олар ысрайыл огулларының хер тайпасындан алнып мөхүрленипди.

5 Яхуда тайпасындан 12 мүң адам мөхүрленипди;

Рубен тайпасындан 12 мүң;

Гад тайпасындан 12 мүң;

6 Ашер тайпасындан 12 мүң;

Нафталы тайпасындан 12 мүң;

Манаше тайпасындан 12 мүң;

7 Шимгон тайпасындан 12 мүң;

Леви тайпасындан 12 мүң;

Ысахар тайпасындан 12 мүң;

8 Зебулун тайпасындан 12 мүң;

Юсуп тайпасындан 12 мүң;

Бенямин тайпасындан хем 12 мүң адам мөхүрленипди.

9 Шондан соң серетсем, ине, әхли миллетден, тайпадан, халкдан ве дилден болан хич кимиң санап билмедик улы мәрекесини гөрдүм. Олар тагтың хем-де Гузының өңүнде узын ак эшикли дурдулар; эллеринде болса хурма агаҗының шахалары барды. 10 Олар батлы сес билен: «Биз тагтда отуран Худая ве Гуза халас боландыгымыз үчин миннетдардырыс» диййәрдилер.

11 Перишделериң хеммеси, яшулулар ве дөрт керуп тагтың даш-төверегинде дурдулар. Шонда олар тагтың өңүнде йүзин йыкылып, Худая сежде этдилер-де: 12 «Омын! Гой, шөхрат, алкыш, акылдарлык, миннетдарлык, хормат, гүйч-кувват бакы хем эбеди Худайымызыңкы болсун. Омын» дийдилер.

13 Яшулуларың бири менден: «Узын ак эшикли адамларың кимдигини ве ниреден гелендигини билйәрмиң?» дийип сорады. 14 Мен шол бада: «Агам, муны өзүң билйәрсиң» дийдим. Ол маңа шейле дийди: «Булар агыр мушакгатдан гечип геленлер, олар эшиклерини Гузының ганы билен ювуп, ап-ак этдилер. 15 Ине, шонуң үчин хем олар Худайың тагтының өңүнде дурлар. Олар Худайың ыбадатханасында гиҗе-гүндиз мукаддес гуллугы берҗай эдйәрлер; тагтда отуран Худай оларың үстүни чадыры билен өртер. 16 Олар инди хич хачан аҗыкмаз, сувсамаз. Олары не Гүн урар, не-де Гүнүң җөвзасы якар. 17 Себәби тагтың янында дуран Гузы олары бакар ве яшайыш сувуның гөзбашына элтер. Худай хем оларың гөзлеринден әхли яшларыны сүпүрер».

8 Гузы единҗи мөхүри ачанда, гөкде ярым сагат төвереги үмсүмлик болды. 2 Шонда мен Худайың өңүнде дуран еди перишдәни гөрдүм, олара еди сурнай берилди.

3 Мен башга бир перишдәниң гелип, гурбанлык сыпасының янында дурандыгыны хем гөрдүм. Онуң элинде алтындан ясалан бухур якылян габы барды. Оңа тагтың өңүнде дуран алтындан ясалан гурбанлык сыпасында хөдүр этмек үчин көп мукдарда бухур берилди. Шол вагт мукаддеслериң эдйән догасы хем эшидилйәрди. 4 Перишдәниң элиндәки бухурың түссеси мукаддеслериң эдйән догасы билен биле Худайың хузурына барярды. 5 Эмма перишде шол бада бухур якылян габы алды-да, оны гурбанлык сыпасындакы отдан долдурды. Соңра ол оды ере зыңанда, гөк гүррүлдеди, сеслер эшидилди, йылдырым чакып, ер титреди. 6 Еди перишде хем еди сурнайы чалмага тайярланды.

7 Биринҗи перишде сурнайыны чаланда, ер йүзүне ган гатышыклы долы билен от ягды; шонда ериң үчден бир бөлеги, агачларың үчден бир бөлеги ве гөк өсүмликлериң бары янды.

8 Икинҗи перишде сурнайыны чаланда, бейик дага меңзеш бир зат янып, деңзе зыңылды. Шонда деңзиң үчден бир бөлеги гана өврүлди. 9 Деңизде яшаян җанлы-җандарларың үчден бир бөлеги өлди ве гәмилериң үчден бир бөлеги хеләкчилиге учрады.

10 Үчүнҗи перишде сурнайыны чаланда, гөкден янып дуран чыра меңзеш бир улы йылдыз деряларың үчден бир бөлегине ве чешмелере гачды. 11 Бу йылдызың ады Ёвшанды*. Шонда сувларың үчден бир бөлеги ёвшан ялы аҗы болды. Сувуң аҗы боландыгы себәпли, адамларың көпүси өлди.

12 Дөрдүнҗи перишде сурнайыны чаланда, гүндизиң ве гиҗәниң үчден бир бөлеги ягты сачып билмез ялы, Гүнүң, Айың хем-де йылдызларың үчден бир бөлеги гаралды.

13 Мен асманда учуп йөрен бүргүди гөрдүм. Ол батлы сес билен: «Эй ер йүзүнде яшаянлар, дат гүнүңизе! Галан үч перишдәниң чалҗак сурнайының сесинден яңа болҗак затлар себәпли, вай халыңыза, хава, дат гүнүңизе!» дийди.

9 Бәшинҗи перишде сурнайыны чаланда, бир йылдызың гөкден ашак инендигини гөрдүм. Оңа дүйпсүз чуңлугың ачары берилди. 2 Ол дүйпсүз чуңлугы ачанда, ондан улы пеҗиң түссеси кимин түссе чыкды. Чуңлукдан чыкан түсседен яңа Гүн хем-де хова гараңкырады. 3 Шонда түсседен чекиртгелер чыкып, ер йүзүне инди. Олара ер йүзүндәки ичянларыңкы ялы ыгтыяр берилди. 4 Олара хич бир өсүмлиге, гөк ота ве агачлара зыян етирмән, диңе маңлайында Худайың мөхүри басылмадык адамлара зыян етирмек табшырылды.

5 Адамы ичян чаканда, онуң эҗир чекиши ялы, чекиртгелере хем адамлары өлдүрмән, диңе бәш айлап гынамак ыгтыяры берилди. 6 Шол гүнлер адамлар өлүми агтарарлар, йөне тапып билмезлер. Олар өз өлүмини исләрлер, йөне өлүм олардан гачар.

7 Чекиртгелериң дашкы гөрнүши сөвеше тайярланан атлара меңзейәрди; келлесинде алтындан ясалан тәҗе меңзеш зат барды. Йүзлери болса адамыңкы ялыды. 8 Эмма сачлары аялларыңкы, дишлери болса ёлбарсларыңкы ялыды. 9 Совутлары демирден ясалан ялыды. Ганатларының сеси сөвеше барян ат арабаларының сесине меңзейәрди. 10 Гуйрукларында болса ичяныңкы ялы иңңелер барды. Олара гуйруклары билен адамлара бәш айлап зыян етирмек ыгтыяры берилди. 11 Оларың үстүнден дүйпсүз чуңлугың перишдеси патышалык эдйәрди. Перишдәниң ады еврейче Абаддон*, грекче болса Аполлионды*.

12 Биринҗи бела гечди. Ине, булардан соң ене ики бела гелйәр.

13 Алтынҗы перишде сурнайыны чаланда, Худайың өңүнде дуран алтындан ясалан гурбанлык сыпасының шахларындан бир сес эшитдим. 14 Ол алтынҗы сурнайы чалан перишдә: «Бейик Евфрат дерясының боюнда баглангы дөрт перишдәни чөзүп гойбер» дийди. 15 Ол хем шол сагада, гүне, ая ве йыла тайярланан дөрт перишдәни адамларың үчден бир бөлегини өлдүрмеклери үчин бошатды.

16 Мен атлы гошуның саныны эшитдим; оларың саны 20 миллионды*. 17 Гөрнүшде гөрен атларым ве оларың үстүнде отуранлар шейледи: Атлыларың совутлары гызыл, гөм-гөк ве сарыды. Атларың келлелери ёлбарсыңка меңзейәрди, агызларындан болса от, түссе ве күкүрт чыкярды. 18 Оларың агзындан чыкян үч беладан, ягны от, түссе ве күкүртден адамларың үчден бир бөлеги өлди. 19 Атларың гүйҗи агызларында ве гуйрукларындады. Себәби оларың гуйруклары йылана меңзеш болуп, келлелери-де барды. Олар гуйруклары билен адамлары чакярдылар.

20 Эмма бу белалардан өлмедик адамлар эден ишлерине тоба этмедилер; олар җынлара ве гөрүп, эшидип, йөрәп билмейән затлара, ягны алтындан, күмүшден, мисден, дашдан хем-де агачдан ясалан хейкеллере сежде этмеклерини бес этмедилер. 21 Шейле-де олар эден ганхорлыгына, җадыгөйлигине*, ахлаксызлыгына* ве огурлыгына тоба этмедилер.

10 Соңра мен гөкден ашак инип гелйән башга бир гүйчли перишдәни гөрдүм. Ол булуда бүрененди, келлесинде әлемгошар барды, йүзи Гүн ялы, аяклары болса отлы сүтүнлер ялыды. 2 Онуң элинде ачылан кичиҗик голязма барды. Ол саг аягыны деңзиң, чеп аягыны болса ериң үстүнде гойды. 3 Ол ёлбарсың арлайшы ялы, батлы сес билен гыгырды. Шонда еди саны гөк гүррүлдиси хем гепледи.

4 Еди гөк гүррүлдиси гепләнде, мен оларың айданларыны язҗак болдум, йөне гөкден: «Еди гөк гүррүлдисиниң айданларына мөхүр басып гизле, олары язма» диен сес эшитдим. 5 Деңзиң ве ериң үстүнде дуран перишде саг элини гөге галдырды-да, 6 бакы хем-де эбеди яшаян, асманы хем ондакы затлары, ери хем ондакы затлары, деңзи хем ондакы затлары Яраданың адындан ант ичип, шейле дийди: «Худай мундан бейләк эгленмез. 7 Эмма единҗи перишдәниң сурнайыны чалҗак гүнлеринде Худайың өз гулларына, ягны пыгамберлерине хош хабар хөкмүнде ыглан эден мукаддес сыры берҗай болар».

8 Шонда мен ене-де гөкден өзүм билен геплешйәниң сесини эшитдим. Ол: «Гит-де, деңзиң ве ериң үстүнде дуран перишдәниң элиндәки ачылан голязманы ал» дийди. 9 Мен барып, перишдеден кичиҗик голязманы сорадым. Ол маңа: «Муны ал-да, ий. Ол ичиңи аҗы, агзыңы болса бал ялы сүйҗи эдер» дийди. 10 Мен перишдәниң элиндәки голязманы алдым-да, оны ийдим. Шонда ол агзымда бал ялы сүйҗи, иенимде болса, ичимде аҗы болды. 11 Соңра маңа: «Сен адамлар, халклар, диллер ве көп патышалар хакда пыгамберлик этмегиңи довам этмелисиң» дийилди.

11 Шонда маңа өлчег таягына меңзеш бир гамыш берилди-де, шейле дийилди: «Тур-да, Худайың ыбадатханасының мукаддес ерини ве бухур якылян сыпаны өлче хем-де сежде эдйәнлери сана. 2 Йөне ыбадатхананың мукаддес ериниң дашындакы ховла дегме, оны өлчеме, себәби ол башга халклара берлендир ве олар мукаддес шәхери 42 айлап аякларының астында басгыларлар. 3 Мен ики шаядымы җул* гейиндирип, 1 260 гүнләп пыгамберлик этмәге иберерин». 4 Бу ики адам ики зейтун агаҗыны ве ики чыраданы аңладяр. Олар ер йүзүниң Худайының өңүнде дурлар.

5 Кимдир бири олара зыян етирҗек болса, оларың агзындан от чыкар-да, душманлары ёк эдер. Хава, бири олара зыян етирмек ислесе, ол шейдип өлдүрилҗекдир. 6 Пыгамберлик эдйән гүнлеринде ягыш ягмаз ялы, оларың асманы багламага, сувы гана өвүрмәге ве ер йүзүни ислән вагты дүрли белалар билен җезаландырмага ыгтыяры бардыр.

7 Олар шаятлык эдип боланларында, дүйпсүз чуңлукдан вагшы хайван чыкып, олара гаршы сөвешер, олары еңер ве өлдүрер. 8 Оларың җеседи гөчме маныдакы Содом ве Мүсүр атлы бейик шәхерлериң улы көчелеринде ятар. Ол ерде Халыпамыз хем пүрсе чүйленипди. 9 Башга халклардан, тайпалардан, диллерден ве миллетлерден болан адамлар оларың җеседине үч ярым гүнләп середерлер. Олары җайламага-да ругсат бермезлер. 10 Ер йүзүниң яшайҗылары оларың өлүмине бегенип, байрам эдерлер, бир-бирлерине совгат берерлер. Себәби бу ики пыгамбериң айдан хабары ер йүзүниң яшайҗыларыны гынаярды.

11 Үч ярым гүн геченсоң, Худайдан гелен яшайыш гүйҗи* олара гирди ве олар еринден туруп, аякларына галдылар. Муны гөренлер җуда горкдулар. 12 Шонда олар гөкден батлы сесиң: «Шу ере чыкың» диенини эшитдилер. Олар булутда гөге галанларында, душманлары хем середип дурдулар. 13 Эдил шол вагт гүйчли ертитреме болды ве шәхериң ондан бир бөлеги юмрулды; ертитремеден 7 мүң адам хеләк болды, галанлары болса горкуп, гөкдәки Худайы шөхратландырдылар.

14 Икинҗи бела гечди. Ине, үчүнҗи бела хем чалт етип гелйәр.

15 Единҗи перишде сурнайыны чаланда, гөкден: «Дүнйә патышалыгы Худайымызың ве онуң Месихиниң Патышалыгы болды. Худай бакы ве өмүрлик патыша болуп хөкүм сүрер» диен батлы сеслер эшидилди.

16 Худайың өңүнде тагтларда отуран 24 яшулы йүзин йыкылып, Худая сежде этдилер. 17 Олар шейле диййәрди: «Хәзир хем, өң хем бар болан Гудратыгүйчли Худайымыз Ехова*, биз саңа миннетдардырыс. Себәби сен бейик ыгтыярыңы эле алып, патыша хөкмүнде хөкүм сүрүп башладың. 18 Эмма миллетлер гахарландылар, сениң хем олара гахарың гелди. Өлүлериң үстүнден хөкүм чыкармагың ве гулларыңы, ягны пыгамберлери, мукаддеслери, улудан-кичә, адыңдан горкянлары сылагламагың вагты гелип етди. Ер йүзүни даргадянлары хем ёк этмегиң вагты гелендир».

19 Гөкде Худайың ыбадатханасының мукаддес ери ачылды ве мен онуң ичинде дуран әхт сандыгыны гөрдүм. Ол ерде йылдырым чакып, сеслер эшидилйәрди, гөк гүррүлдейәрди, ер титрәп, гүйчли долы ягярды.

12 Соңра мен гөкде улы аламат гөрдүм: ине, бир аял Гүне гейнипдир, аякларының ашагында Ай, башында болса 12 йылдыздан ыбарат тәч барды. 2 Ол гөврелиди ве бургусы тутуп гыгырярды, себәби онуң чага догурмалы вагты гелипди.

3 Мен гөкде башга бир аламат хем гөрдүм. Ине, гызыл реңкли, еди келлели ве он шахлы улы аждарха дурды. Онуң хер келлесинде бир тәч барды. 4 Ол гуйругы билен гөкдәки йылдызларың үчден бир бөлегини алды-да, олары ер йүзүне зыңды. Аждарха чага догурҗак болян аялың өңүнде дурды, себәби аял догран бадына, онуң чагасыны иймекчиди.

5 Аял бир огул догурды, хава, ол әхли миллетлери демир хаса билен бакҗак огланҗыгы дүнйә индирди. Чага Худайың ве онуң тагтының янына әкидилди. 6 Аял болса чөле, ягны Худайың тайярлан ерине гачып гитди, ол ерде оны 1 260 гүнләп иймитлендирмелидилер.

7 Шонда гөкде уруш турды: Микайыл перишделери билен аждарха гаршы, аждарха хем перишделери билен олара гаршы сөвешди. 8 Йөне олар еңилдилер* ве гөкде мундан бейләк олар үчин ер тапылмады. 9 Нетиҗеде, Иблис ве Шейтан дийип атландырылян көне йылан, бүтин ер йүзүниң яшайҗыларыны алдаян улы аждарха перишделери билен ер йүзүне зыңылды. 10 Шонда мен гөкден бир батлы сесиң шейле диенини эшитдим:

«Ине, Худайымыз адамлара гутулыш берди, онуң гүйҗи аян болуп, Патышалыгы беркарар эдилди ве онуң Месихи ыгтыяр алды. Себәби доганларымызы Худайың өңүнде гиҗе-гүндиз айыплаян төхметчи ере зыңылды! 11 Олар Гузының ганы ве вагыз эден хабары аркалы оны еңдилер. Өлүм билен йүзбе-йүз болсалар-да, олар җанларыны гурбан этмәге тайындылар. 12 Эй гөклер ве онда яшаянлар, мунуң үчин бегениң! Ер ве деңиз, вай сизиң халыңыза, себәби Иблис вагтының аз галандыгыны билип, гүйчли гахар-газап билен сизиң яныңыза барды».

13 Аждарха ере зыңландыгына дүшүненде, чага догран аялы ызарлап башлады. 14 Эмма аял чөлде өзи үчин тайярланан ере учуп гидер ялы, оңа улы бүргүдиң ики ганаты берилди. Аял йыландан гачып, ол ерде бир дөвүр, ики дөвүр ве ярым дөвүр* иймитленмелиди.

15 Йылан аялы сува гарк этмек үчин агзыны ачды-да, онуң ызындан деря ялы сув акдырды. 16 Эмма ер аяла көмеге етишди ве агзыны ачды-да, аждарханың агзындан чыкан деряны ювутды. 17 Шонда аждарха аяла гахарланып, онуң бейлеки чагаларына*, ягны Худайың табшырыкларыны берҗай эдип, Иса хакда шаятлык эдйәнлере гаршы сөвешмәге гитди.

13 Аждарха хенизем деңзиң кенарында чәгәниң үстүнде дурды.

Мен деңизден он шахлы, еди келлели бир вагшы хайваның чыкып гелйәнини гөрдүм. Онуң шахларында он тәч, келлелеринде болса Худая дил етирйән атлар барды. 2 Мениң гөрен вагшы хайваным алаҗагаплаңа меңзейәрди, аяклары айыныңкы, агзы болса ёлбарсыңкы ялыды. Аждарха оңа гүйч, тагт ве улы ыгтыяр берди.

3 Мен онуң бир келлесиниң эрбет яраланандыгыны гөрдүм. Йөне ярасы агыр болса-да, ол сагалды ве ер йүзүниң әхли адамлары буйсанч билен онуң ызына дүшдүлер. 4 Адамлар аждарха сежде этдилер, себәби ол вагшы хайвана ыгтыяр берипди. Олар вагшы хайвана-да сежде эдип: «Өзүни вагшы хайван билен деңәп, онуң билен сөвешип билҗек бармы?» дийдилер. 5 Аждарха вагшы хайвана текепбирлик билен гепләп, Худая дил етирмәге ве 42 айлап ыгтыярыны уланмага ёл берди. 6 Шонда ол Худая, онуң адына, месген тутян ерине ве гөкде яшаянлара дил етирип башлады. 7 Оңа мукаддеслер билен сөвешип, олары еңмәге ругсат берилди. Хер тайпадан, халкдан, дилден ве миллетден болан адамларың үстүнден хөкүм сүрмәге ыгтыяр хем берилди. 8 Ер йүзүниң әхли яшайҗылары оңа сежде эдерлер. Дүнйәниң башлангыҗындан бәри оларың хич бириниң ады гурбан эдилен Гузының яшайыш китабына язылан дәлдир.

9 Гой, гулагы бар адам эшитсин. 10 Сүргүн эдилмели адам сүргүн эдилер. Бирини гылыч билен өлдүрен* адам хем гылыч билен өлдүрилмелидир. Ине, шейле ягдайда мукаддеслериң чыдамы ве иманы герекдир.

11 Соңра мен ерден чыкан башга бир вагшы хайваны гөрдүм. Онуң гуза меңзеш ики шахы барды, йөне ол аждарха ялы гепләп башлады. 12 Биринҗи вагшы хайваның гөзүниң алнында, онуң әхли ыгтыяры икинҗи хайвана берилди. Ол хем бир келлеси агыр яраланып, соңра сагалан биринҗи вагшы хайвана ери ве ондакы яшайҗылары сежде этдирди. 13 Ол улы аламатлар гөркезйәрди, хатда бүтин адамзадың гөзүниң алнында гөкден ере от ягдырярды.

14 Икинҗи вагшы хайван биринҗи вагшы хайваның өңүнде аламатлары гөркезип, ер йүзүнде яшаянлары алдаярды. Шейле-де ол ер йүзүниң яшайҗыларына гылыч билен санҗылып, йөне дири галан вагшы хайваның шекилини ясамагы буюрды. 15 Ясалан вагшы хайваның шекили гепләп, өзүне сежде этмекден боюн гачыранлары өлдүрер ялы, икинҗи вагшы хайван онуң шекилине яшайыш демини берди.

16 Ол әхли адамлары, ягны улудан-кичә, байдыр гарыплары, азатлары ве гуллары саг элине я-да маңлайына беллик алмага меҗбур этди. 17 Вагшы хайваның беллигини, адыны я-да адының саныны аланлардан башга хич ким не сатын алып, не-де сатып билйәрди. 18 Шуңа дүшүнмек үчин пайхаслылык герекдир: гой, дүшгүр адам вагшы хайваның саныны хасапласын, ол ынсан саныдыр; онуң саны 666.

14 Соңра гөрсем, ине, Сион дагында Гузы ве онуң янында 144 мүңлер дурды. Оларың маңлайында Гузының ве онуң Атасының ады язылгыды. 2 Мен гөкден көп сувларың шаггылдысына ве гөк гүррүлдисине меңзеш сес эшитдим; шейле-де арфада саз чалян айдымчыларың сесине меңзеш сес эшитдим. 3 Олар тагтың, дөрт керубың ве яшулуларың өңүнде тәзе айдыма меңзеш айдым айдярдылар. Бу айдымы ер йүзүнден сатын алнан 144 мүңден башга хич ким өвренип билмейәрди. 4 Олар аяллар билен өзлерини хапаламадылар; догрудан-да, олар хич хачан аял машгала янашан дәлдирлер. Олар Гузы нирә гитсе, онуң ызына дүшйәрлер. Булар ынсанларың арасындан илкинҗи миве хөкмүнде Худай ве Гузы үчин сатын алнандыр. 5 Агызларындан хич хили ялан сөз чыкан дәлдир; олар чирксиздир.

6 Соңра мен асманда учуп йөрен башга бир перишдәни гөрдүм. Ол ер йүзүнде яшаянлара, ягны хер миллете, хер тайпа, хер диле ве хер халка эбеди хош хабары ыглан эдйәрди. 7 Ол батлы сес билен: «Худайдан горкуң, оны шөхратландырың, себәби онуң хөкүм этмели сагады гелип етди. Хава, гөги, ери, деңзи ве чешмелери Ярадана сежде эдиң» диййәрди.

8 Онуң ызындан гелйән икинҗи перишде: «Ол вейран болды! Әхли миллетлере азгын* шерабыны ичирен, ягны ахлаксызлык* этдирен Бейик Вавилон вейран болды!» диййәрди.

9 Оларың ызындан гелйән үчүнҗи перишде батлы сес билен шейле диййәрди: «Эгер бири вагшы хайвана ве онуң шекилине сежде эдип, маңлайына я-да элине беллигини алса, 10 ол Худайың газап кәсесине гуйлан ве хич зат гарылмадык гахар шерабындан хем ичер. Ол мукаддес перишделериң ве Гузының гөзүниң алнында күкүрт хем-де отда җебир чекер. 11 Олары гынаян одуң түссеси бакы ве эбеди довам эдер, вагшы хайвана хем-де онуң шекилине сежде эдип, онуң адының беллигини аланлар гиҗе-гүндиз дынгысыз җебир чекерлер. 12 Шейле ягдайда мукаддеслере, ягны Худайың табшырыкларыны берҗай эдйәнлере ве Иса болан* иманына берк япышянлара чыдамлылык герекдир».

13 Мен гөкден шейле сес эшитдим: «Шуны яз: Мундан бейләк Халыпамызың шәгиртлери хөкмүнде өленлер багтлыдыр. Хава, рух шейле диййәр: Гой, олар чекен зәхметинден дынч алсынлар, себәби оларың эден ишлери унудылмаз*».

14 Соңра мен бир ак булут гөрдүм. Онуң үстүнде ынсан оглуна меңзеш бири отырды. Келлесинде алтындан тәҗи, элинде болса йити орагы барды.

15 Ыбадатхананың мукаддес еринден башга бир перишде чыкды-да, булудың үстүнде отурана батлы сес билен: «Орагыңы ал-да, оруп башла, себәби орак дөври гелендир ве ер йүзүниң хасылы долы етишипдир» дийди. 16 Шонда булудың үстүнде отуран орагыны алды-да, ер йүзүни орды.

17 Соңра гөкдәки ыбадатхананың мукаддес еринден башга бир перишде чыкды. Онуң хем йити орагы барды.

18 Гурбанлык сыпасындан ене бир перишде чыкды. Бу перишдәниң одуң үстүнден ыгтыяры барды. Ол йити ораклы перишдә батлы сес билен: «Йити орагыңы ал-да, ер йүзүндәки үзүмлериң салкымларыны йыгна, себәби онуң мивелери бишипдир» дийди. 19 Перишде хем орагыны алды-да, ер йүзүндәки үзүмлери йыгып, олары Худайың гахары болан миве сыкылян улы ере зыңды. 20 Үзүмлер шәхериң дашында сыкылды. Үзүм сыкылян ерден чыкан ган атларың агыздырыгына ченли етди, узаклыгы болса 296 километре* барабарды.

15 Мен гөкде башга бир улы ве аҗайып аламат гөрдүм. Еди перишдәниң элинде еди бела барды. Булар соңкы белаларды, себәби олар аркалы Худайың гахары тамамланмалыды.

2 Соңра мен айнадан ясалан от гатышыклы деңзе меңзеш бир зады ве вагшы хайваны, онуң шекилини хем-де онуң адының саныны еңенлери гөрдүм. Олары еңенлер айнадан ясалан деңзиң үстүнде дурдулар, херсиниң элинде болса Худайың арфасы барды. 3 Олар Худайың гулы болан Мусаның ве Гузының айдымыны айдярдылар:

«Эй Гудратыгүйчли Худайымыз Ехова*, сениң ишлериң бейик ве аҗайыпдыр. Эй эбеди Патышамыз*, сениң ёлларың догры хем ыгтыбарлыдыр. 4 Ехова*, хей-де, сенден горкмаҗак ве адыңы шөхратландырмаҗак бармы? Чүнки диңе сен халкыңа вепалысың! Әхли миллетлер гелип, сениң өңүңде сежде эдерлер, себәби сениң адыл хөкүмлериң аян болды».

5 Мундан соң мен гөкде шаятлык хөкмүнде хызмат эдйән мукаддес чадырың ачыландыгыны гөрдүм. 6 Шонда мукаддес ерден эллеринде еди бела болан еди перишде пейда болды. Оларың эшиги зыгыр матадан болуп, арассады ве ягты сачярды. Дөшлерине етип дуран алтындан ясалан гушаклары барды. 7 Дөрт керубың бири еди перишдә алтындан ясалан еди кәсе берди. Кәселер бакы ве эбеди яшаян Худайың гахарындан долуды. 8 Шонда ыбадатхана Худайың шөхратындан ве гүйҗүнден яңа түсседен долды. Еди перишдәниң еди беласы тамамланянча, ол ере хич ким гирип билмеди.

16 Соңра мен ыбадатхананың мукаддес еринден чыкан бир батлы сесиң еди перишдә: «Гидиң-де, Худайың гахарындан долы еди кәсәни Ере дөкүң» диенини эшитдим.

2 Биринҗи перишде гитди-де, кәсесиндәки зады ер йүзүне дөкди. Шонда вагшы хайваның беллигини алып, онуң шекилине сежде эдйән адамларда агырылы ве элхенч яралар пейда болды.

3 Икинҗи перишде хем гитди-де, кәсесиндәки зады деңзе дөкди. Шонда деңиз өлен адамың ганы ялы болды ве ондакы әхли җанлы-җандарлар өлди.

4 Үчүнҗи перишде гитди-де, кәсесиндәки зады дерялара ве чешмелере дөкди, олар хем гана өврүлди. 5 Шонда мен сувларың үстүнден ыгтыяры болан перишдәниң шейле диенини эшитдим: «Хәзир хем, өң хем бар болан Вепалы Худайымыз, сен догручылсың. Себәби шу хөкүмлери чыкаран сенсиң. 6 Олар мукаддеслериң ве пыгамберлериң ганыны дөкендиклери үчин, сен олара ган ичирдиң; олар муңа мынасыпдыр». 7 Шейле-де мен гурбанлык сыпасындан: «Хава, Гудратыгүйчли Худайымыз Ехова*, сениң хөкүмлериң* ыгтыбарлы ве догрудыр» диен сөзлери эшитдим.

8 Дөрдүнҗи перишде хем гитди-де, кәсесиндәки зады Гүне дөкди. Шонда Гүне отлы җөвзасы билен адамлары якмага ыгтыяр берилди. 9 Адамлар Гүнүң җөвзасындан яңа янсалар-да, тоба этмедилер ве Худайы шөхратландырмадылар. Гайтам, бу белаларың үстүнден ыгтыяры болан Худая дил етирдилер.

10 Бәшинҗи перишде хем гитди-де, кәсесиндәки зады вагшы хайваның тагтына дөкди. Шонда онуң бүтин хөкүмдарлыгы гараңкырады, ондакы адамлар хем агырыдан яңа дишлерини гыҗап башладылар. 11 Эмма олар эден ишлерине тоба этмедилер, гайтам, агырыларындан ве яраларындан яңа гөкдәки Худая дил етирдилер.

12 Алтынҗы перишде хем гитди-де, кәсесиндәки зады бейик Евфрат дерясына дөкди. Шонда онуң сувы гурап, гүндогардан гелйән патышалар үчин ёл тайярлады.

13 Соңра мен аждарханы, вагшы хайваны ве ялан пыгамбери гөрдүм. Оларың херсиниң агзындан гурбагалара меңзеш ылхамлы харам сөзлер* чыкды. 14 Аслында, булар җынларың ылхамлы сөзлериди ве олар аламатлар гөркезйәрдилер. Олар гидип, бүтин ер йүзүниң патышаларыны Гудратыгүйчли Худайың бейик гүнүнде болҗак сөвеше йыгнадылар.

15 Соңра мен шейле сес эшитдим: «Хүшгәр болуң! Мен огры кимин гелйәрин. Ялаңач гезип, утанҗа галмаз ялы, оя болуп, эгниндәки эшигини горап саклан адам багтлыдыр».

16 Олар патышалары еврейче Армагеддон* диен ере йыгнадылар.

17 Единҗи перишде хем гитди-де, кәсесиндәки зады хова дөкди. Шонда ыбадатхананың мукаддес ериндәки тагтдан: «Берҗай болды!» диен батлы сес эшидилди. 18 Шонда йылдырым чакып, сеслер эшидилди, гөк гүррүлдеди ве гүйчли ер титреди. Ертитреме шейле гүйчлүди велин, адамзат дөрәни бәри бейле ертитреме хич хачан болан дәлдир. 19 Бейик шәхер үч бөлеге бөлүнди, миллетлериң шәхерлери юмрулды; Худай Бейик Вавилоны ятлап, оңа гахар-газапдан долы шераплы кәсесини берди. 20 Шейле-де әхли адалар йитирим болды, даглар хем зым-зыят болды. 21 Шонда гөкден адамларың үстүне херсиниң аграмы такмынан бир талант* болан гүйчли долы ягды. Адамлар долы беласындан яңа Худая дил етирдилер, себәби ол гаты элхенчди.

17 Эли кәсели еди перишдәниң бири маңа шейле дийди: «Шу ере гел, мен саңа энчеме сувларың үстүнде отуран, улы ыгтыяры болан бозук* аялың нәдип хөкүм эдилҗекдигини гөркезейин. 2 Ер йүзүниң патышалары онуң билен ахлаксызлык* этдилер ве ер йүзүниң яшайҗылары онуң ахлаксызлык* шерабындан ичип, серхош болдулар».

3 Соңра перишде мени рухуң гүйҗи аркалы чөле алып гитди. Шонда мен гырмызы реңкли вагшы хайваның үстүнде бир аялың отурандыгыны гөрдүм. Вагшы хайваның еди келлеси ве он шахы барды, онуң бар ери Худая дил етирйән атлардан долуды. 4 Аял болса гойы гызыл ве гырмызы реңкли эшиге гейнип, алтын, гымматбаха дашлар хем-де дүрдәнелер билен безенипди. Элинде болса алтындан ясалан кәсе барды. Кәсәниң ичи йигренҗи ве онуң ахлаксызлыгы* билен хапаланан затлардан долуды. 5 Онуң маңлайында: «Бейик Вавилон — бозук аялларың ве ер йүзүндәки йигренҗи затларың энеси» дийип язылан сырлы ат барды. 6 Соңра мен ол аялың мукаддеслериң ве Исаның шаятларының ганыны ичип, серхош боландыгыны гөрдүм.

Мен оны гөренимде, җуда гең галдым. 7 Шонда перишде маңа шейле дийди: «Сен нәме үчин муңа гең галярсың? Мен саңа аялың ве оны аркасында гөтерип йөрен еди келлели хем-де он шахлы вагшы хайваның сырыны айдайын: 8 Сениң гөрен вагшы хайваның өң барды, хәзир болса ёк. Эмма ол тизден дүйпсүз чуңлукдан чыкар ве ёк эдилер. Ер йүзүниң яшайҗылары, ягны дүнйәниң башлангыҗындан бәри яшайыш китабына атлары языланлар өң болуп, йөне ёк эдилен ве тәзеден чыкҗак вагшы хайваны гөренлеринде хайран галарлар.

9 Муңа дүшүнмек үчин дүшгүрлик ве акылдарлык герек: еди келле еди дагы аңладяр. Аял хем оларың үстүнде отыр. 10 Шейле-де олар еди патышаны аңладяр: оларың бәшиси йыкылды, бири хәзирем бар, ене бири инди гелмели; йөне ол геленде, оңа аз вагтлык галмага ругсат берлер. 11 Өң болуп, соңра ёк болан вагшы хайван болса секизинҗи патышадыр. Ол еди патышадан гелип чыкар, йөне соңра ёк эдилер.

12 Сениң гөрен он шахың хениз патышалыгы алмадык он патышаны аңладяр. Эмма олар вагшы хайван билен билеликде аз салымлык* патышалык ыгтыярыны аларлар. 13 Он шах бир пикирде болуп, гүйҗүни ве ыгтыярыны вагшы хайвана бердилер. 14 Олар Гузы билен сөвешерлер, эмма Гузы хөкүмдарларың Хөкүмдары ве патышаларың Патышасы боландыгы үчин олары еңер. Худайың чагыранлары, сайланлары ве Оңа вепалы боланлар хем олары еңерлер».

15 Перишде маңа шейле дийди: «Сен бозук аялың сувларың үстүнде отураныны гөрүпдиң. Шол сувлар халклары, мәрекәни, миллетлери ве диллери аңладяр. 16 Шейле-де сениң гөрен он шахың ве вагшы хайваның бозук аялы йигренип, оны таларлар хем ялаңачларлар. Олар онуң беденини иерлер, соңра оны отда якып, күл эдерлер. 17 Себәби шейле пикири Худай оларың йүрегине гуйды. Хава, олар Худайың сөзи берҗай болянча, патышалык ыгтыярыны вагшы хайвана берип, өз пикирини амала ашырарлар. 18 Сениң гөрен аялың ер йүзүниң патышаларының үстүнден хөкүм сүрйән бейик шәхери аңладяр».

18 Шондан соң мен башга бир перишдәниң улы ыгтыяр билен гөкден ашак иненини гөрдүм. Онуң шөхраты ер йүзүни ягтылтды. 2 Ол батлы сес билен гыгырып, шейле диййәрди: «Ол вейран болды! Бейик Вавилон вейран болды! Ол җынларың яшаян ерине өврүлди, хер хили залым рухларың*, хер дүрли харам ве йигренҗи гушларың месген тутян ери болды! 3 Себәби әхли миллетлер онуң азгын* шерабының, ягны ахлаксызлыгының* дузагына дүшүп хеләк болдулар. Ер йүзүниң патышалары хем онуң билен ахлаксызлык этдилер. Ер йүзүниң сөвдагәрлери болса онуң хаясызлык билен топлан байлыгы аркалы баядылар».

4 Соңра мен гөкден башга бир сесиң шейле диенини эшитдим: «Эй халкым, онуң гүнәлерине шәрик болуп, онуң башына инҗек белалара учрамаз ялы, ол ерден чыкың. 5 Себәби онуң гүнәлери көпелип, гөге етди; Худай онуң адалатсызлык билен эден ишлерини* яда салды. 6 Онуң башгалара эден эрбетлигини өзүне ики эссе эдип гайтарың; онуң тайярлан ичгисини ики эссе эдип өзүне ичириң. 7 Ол өзүни шөхратландырып, хаясызлык билен топлан байлыгының хасабына нәче яшан болса, шонча-да оны гынап, хасрат чекдириң. Ол өз-өзүне: „Мен ша аялы кимин хөкүм сүрйәрин, дул дәлдирин, хич хачан хасрат чекмерин“ диййәр. 8 Ине, шонуң үчин хем бир гүнүң ичинде онуң башына белалар, ягны өлүм, хасрат ве ачлык инер. Ол отда янып, күл болар, себәби оны хөкүм эден Худай Ехова* гүйчлүдир.

9 Онуң билен ахлаксызлык* эден ве хаясызлык билен топлан байлыгының хасабына яшан ер йүзүниң патышалары онуң янян одуның түссесини гөренлеринде, аглашарлар, хасрат чекип, гурсакларына урарлар. 10 Олар онуң чекйән җебринден яңа горкуп, узакда дурарлар-да: „Вах, вах, бейик Вавилон, сен нәхили гүйчли шәхердиң! Бир сагадың ичинде вейран болдуң“ диерлер.

11 Ер йүзүниң сөвдагәрлери хем оны гөрүп, аглашарлар ве хасрат чекерлер, себәби инди хич ким оларың харытларыны сатын алмаз. 12 Оларың биргиден алтыны, күмши, гымматбаха дашлары, дүрдәнелери, ёкары хилли зыгыр, гойы гызыл, гырмызы реңкли ве йүпек маталары; якымлы ыслы хем-де гымматбаха агачдан, пилиң сүңкүнден, мисден, демирден хем-де мермерден ясалан дүрли затлары барды; 13 шейле-де корисасы*, имбири*, бухуры, ладаны*, шерабы, зейтун ягы, якымлы ыслы ягы, ёкары хилли уны, бугдайы, сыгры, гойны, атлары, арабалары, гуллары ве адамлары барды. 14 Хава, ислейән говы затларың сени терк этди. Тагамлы нахарларың, гымматбаха затларың элиңден алынды. Олар саңа гайдып берилмез.

15 Бу затлары сатып, шол аял аркалы баян сөвдагәрлер онуң чекйән җебринден яңа горкуп, узакда дурарлар-да, аглашып хасрат чекерлер. 16 Олар: „Вах, вах, бейик шәхер! Сен ёкары хилли зыгыр, гойы гызыл ве гырмызы реңкли мата гейнип, алтындан, гымматбаха дашлардан хем-де дүрдәнелерден ясалан шай-сеплере безенипдиң. 17 Сениң әгирт улы байлыгың бир сагадың ичинде вейран болды“ диерлер.

Хер бир гәми ёлбашчысы, деңиз ёлагчылары, деңизчилер ве деңзиң хасабына яшаянларың әхлиси узакда дурарлар-да, 18 онуң янян одуның түссесини гөрүп: „Хей-де, сениң ялы башга бейик шәхер бармыды нәме?“ дийип гыгырышарлар. 19 Олар башларына гум соврарлар, гыгырышып аглашарлар, хасрат чекип: „Вах, вах, бейик шәхер! Деңизде гәмиси боланларың бары сениң байлыгың аркалы баядылар. Сен бир сагатда вейран болдуң“ диерлер.

20 Эй гөклер, мукаддеслер, ресуллар ве пыгамберлер, аялың башына дүшен затлара бегениң! Себәби Худай сизиң хатыраңыза оны җезаландырды».

21 Шонда бир гүйчли перишде улы дегирмен дашыны алды-да, оны деңзе зыңып, шейле дийди: «Бейик Вавилон шәхери хем шейле чалтлык билен зыңлар, ол гайдып хич хачан болмаз. 22 Эй Вавилон, инди сенде хич хачан айдымчыларың, арфа, түйдүк, сурнай чалянларың ве башга-да сазандаларың сеси эшидилмез. Дүрли затлары ясаян уссаларың ве дегирменде бугдай үвейәнлериң сеси-де эшидилмез. 23 Инди сенде хич хили чыра ягтылык бермез, не өйленйән йигидиң, не-де гелниң сеси эшидилер; себәби сениң сөвдагәрлериң ер йүзүндәки ёкары везипели адамларды. Сениң җадыгөйлигиңден* яңа бүтин миллетлер алдава дүшдүлер. 24 Хава, пыгамберлериң, мукаддеслериң ве ер йүзүнде өлдүриленлериң ганы шу шәхерден тапылды».

19 Шондан соң мен гөкден улы мәрекәниң сесине меңзеш батлы сес эшитдим. Олар шейле дийди: «Яхы шөхратландырың!* Худай адамзады халас этди, шөхрат ве гүйч онуңкыдыр. 2 Себәби онуң хөкүмлери ыгтыбарлы ве догрудыр. Ол Вавилоның, ягны ер йүзүни ахлаксызлыгы* билен аздыран, улы ыгтыяры болан бозук* аялың үстүнден хөкүм чыкарды ве гулларының ганы үчин ондан* арыны алды». 3 Олар шол бада икинҗи гезек: «Яхы шөхратландырың!* Вавилоның түссеси бакы хем эбеди чыкып дурар» дийдилер.

4 Шонда 24 яшулы ве дөрт керуп дыза чөкүп, тагтда отуран Худая сежде этдилер-де: «Омын! Яхы шөхратландырың!*» дийдилер.

5 Шейле-де тагтдан: «Эй Худайдан горкян гуллар, сада ве улы везипели адамлар, Худайымызы шөхратландырың» диен сөзлер эшидилди.

6 Соңра мен улы мәрекәниң, энчеме сувларың ве гүйчли гөк гүррүлдисиниң сесине меңзеш сес эшитдим. Олар шейле диййәрди: «Яхы шөхратландырың!* Гудратыгүйчли Худайымыз Ехова* патыша болуп, хөкүм сүрүп башлады! 7 Гелиң, шатланалың, бегенелиң ве Худайы шөхратландыралың, себәби Гузының тойы башланды, онуң гелни хем тоя тайярланды. 8 Хава, гелне ап-ак, арасса ве ёкары хилли зыгыр матадан эшик геймәге ругсат берилди. Ёкары хилли зыгыр мата мукаддеслериң догры ишлерини аңладяндыр».

9 Шонда ол маңа: «Шуны яз: Гузының тоюна чагырыланлар багтлыдыр» дийди. Шейле-де ол: «Булар Худайың ыгтыбарлы сөзлеридир» дийди. 10 Мен оңа сежде этҗек болуп дыза чөкенимде, ол: «Сересап бол! Бейле зат этме! Худая сежде эт! Менем сениң ве Иса хакда шаятлык эдйән доганларың ялы бир гулдурын. Себәби пыгамберликлериң максады Иса хакда шаятлык этмекдир» дийди.

11 Соңра мен гөгүң ачыландыгыны гөрдүм. Серетсем, бир ак ат дур. Онуң үстүнде отураның Вепалы хем Догручыл диен ады барды. Ол адалатлы хөкүм чыкаряндыр, догручыл сөвеш алып баряндыр. 12 Онуң гөзлери одуң ялныдыр, келлесинде энчеме тәч бар. Онуң адыны өзүнден башга хич ким билйән дәлдир. 13 Онуң гана буланан* эшиги болуп, Худайың Сөзи* диен ады барды. 14 Онуң ызындан гөкден ак, арасса ве ёкары хилли зыгыр матадан эшиги болан ак атлардан ыбарат гошун гелйәрди. 15 Миллетлери өлдүрмек үчин, онуң агзындан йити ве узын гылыч чыкып дурандыр. Ол миллетлери демир хаса билен бакар. Галыберсе-де, ол Гудратыгүйчли Худайың гахар-газабы болан үзүм сыкылян ерде үзүм сыкар. 16 Онуң донунда, хава, билинде патышаларың Патышасы, хөкүмдарларың Хөкүмдары диен ат язылгы.

17 Шейле-де мен Гүнүң ортарасында дуран перишдәни гөрдүм. Ол батлы сес билен гыгырып, асманда учуп йөрен әхли гушлара шейле дийди: «Шу ере гелиң, Худайың улы зыяпатына йыгнанышың. 18 Шонда сиз патышаларың, гошун серкерделериниң, гүйчли адамларың, атларың ве оларың үстүнде отуранларың, азатдыр гулларың, сада хем ёкары везипели адамларың хеммесиниң беденини ийип билерсиңиз».

19 Мен вагшы хайваның, ер йүзүниң патышаларының ве оларың гошунының атың үстүнде отурана хем-де онуң гошунына гаршы сөвешмек үчин йыгнанышандыгыны гөрдүм. 20 Атың үстүнде отуран бири вагшы хайваны ве ялан пыгамбери тутды. Ялан пыгамбер вагшы хайваның өңүнде аламатлар гөркезип, онуң беллигини аланлары ве шекилине сежде эдйәнлери алдаярды. Оларың икиси-де дирилигине күкүрт билен янян от көлүне зыңылды. 21 Галанлары болса атың үстүнде отураның агзындан чыкып дуран узын гылыч билен өлдүрилди. Гушларың хеммеси оларың беденини ийип дойдулар.

20 Соңра мен бир перишдәниң гөкден ашак инип гелйәндигини гөрдүм. Онуң элинде дүйпсүз чуңлугың ачары ве улы зынҗыр барды. 2 Ол аждарханы, ягны Иблис ве Шейтан дийилйән көне йыланы тутуп, 1 000 йыла баглады. 3 Перишде аждарханы дүйпсүз чуңлуга зыңды-да, агзыны япып, үстүне мөхүр басды. Инди ол 1 000 йыл долянча, миллетлери алдап билмез. Шондан соң ол бираз вагтлык бошадылмалыдыр.

4 Соңра мен тагтлары гөрдүм, онуң үстүнде отуранлара хөкүм этмәге ыгтыяр берилди. Хава, мен Иса хакда шаятлык ве Худай хакда вагыз эдендиклери үчин өлдүриленлери* гөрдүм. Олар не вагшы хайвана, не-де онуң шекилине сежде этдилер, маңлайына ве элине беллигини хем алмадылар. Олар дирелип, Месих билен 1 000 йыл патыша болуп хөкүм сүрдүлер. 5 Булар биринҗи дирелише дегишлидир. Галанлары болса 1 000 йыл долянча дирелмедилер. 6 Биринҗи дирелише дегишли боланлар багтлы ве мукаддесдир; икинҗи өлүм олара зыян етирип билмез*. Гайтам, олар Худайың ве Месихиң руханылары боларлар хем-де 1 000 йыл патыша болуп хөкүм сүрерлер.

7 Мүң йыл гутаран бадына, Шейтан туссаглыкдан бошадылар. 8 Соңра ол ер йүзүниң дөрт күнҗегинден болан миллетлери аздырмага гидер ве Гог билен Магогы сөвеш үчин йыгнар. Оларың саны деңзиң чәгелери ялы көпдүр. 9 Олар бүтин ер йүзүне яйрап, мукаддеслериң яшаян ерини ве Худайың сөййән шәхерини габадылар. Эмма гөкден от ягды-да, олары ёк этди. 10 Олары алдан Иблис от ве күкүрт көлүне зыңылды. Вагшы хайван ве ялан пыгамбер болса эййәм шол ердеди; олар гиҗе-гүндиз бакы хем эбеди җебир чекерлер.

11 Соңра мен бир улы ак тагт гөрдүм; онуң үстүнде Худай отырды. Ер ве гөк Худайың өңүнден гачдылар, олара гайдып ер тапылмады. 12 Шейле-де мен өлүлери, ягны сада ве ёкары везипели адамларың тагтың өңүнде дурандыкларыны гөрдүм, шонда голязмалар ачылды. Яшайыш китабы диен башга бир голязма хем ачылды. Голязмаларда языланлара лайыклыкда, өлүлере эдйән ишлерине гөрә хөкүм чыкарылды. 13 Деңиз өзүндәки өлүлери, өлүм билен Габыр* хем өзүндәки өлүлери гайдып берди. Оларың хер бирине эдйән ишлерине гөрә хөкүм чыкарылды. 14 Соңра өлүм билен Габыр* от көлүне зыңылды. От көли икинҗи өлүми аңладяндыр. 15 Яшайыш китабында ады язылмадыклар хем от көлүне зыңылды.

21 Соңра мен тәзе гөги ве тәзе ери гөрдүм; өңки гөк билен ер гечип гитди, деңиз хем ёк болды. 2 Шейле-де мен гөкден, ягны Худайың янындан ашак инип гелйән мукаддес шәхер Тәзе Иерусалими гөрдүм. Ол адамсыны гаршы алмак үчин тайярланан безегли гелин ялыды. 3 Шонда мен тагтдан батлы сесиң шейле диенини эшитдим: «Ине, Худайың чадыры адамлар билендир. Худай оларың арасында месген тутар, олар хем онуң халкы болар. Худайың өзи-де олар билен биле болар. 4 Худай оларың гөзлеринден әхли яшларыны сүпүрер. Инди не өлүм, не хасрат, не агы, не-де агыры болар. Себәби өңки затлар гечип гитди».

5 Шонда тагтда отуран Худай: «Ине, мен әхли зады тәзелейәрин» дийди. Шейле-де: «Булары яз, себәби бу сөзлер ыгтыбарлы ве хакдыр» дийди. 6 Соңра ол маңа шейле дийди: «Бу сөзлер берҗай болды! Мен Алфа ве Омега*, башлангыч хем-де соңудырын. Мен сувсан адама яшайыш сувуның чешмесинден мугт сув берерин. 7 Еңен адам шу затлары мирас алар; мен онуң Худайы, ол хем мениң оглум болар. 8 Эмма горкаклар, имансызлар, харам ве йигренҗи ишлери эдйәнлер, ганхорлар, ахлаксызлык* эдйәнлер, җадыгөйлик* билен мешгулланянлар, бутпаразлар хем-де яланчыларың бары күкүрт билен янян от көлүне ташланып, алмытыны аларлар. Бу икинҗи өлүми аңладяндыр».

9 Шонда кәселери соңкы еди беладан долы еди перишдәниң бири яныма гелди-де: «Йөр, мен саңа Гузының аялы болҗак гелни гөркезейин» дийди. 10 Соңра ол мени мукаддес рух аркалы улы ве бейик дага алып гитди-де, гөкден, ягны Худайың янындан ашак инип гелйән мукаддес шәхер Иерусалими гөркезди. 11 Шәхерде Худайың шөхраты барды. Онуң нуры гымматбаха дашына меңзейәрди ве айна ялы арасса яшма дашы кимин шөхле сачярды. 12 Онуң улы ве бейик дивары хем-де 12 дервезеси барды. Хер дервезесинде бир перишде дурды. Дервезелеринде ысрайыл огулларының 12 тайпасының атлары язылгыды. 13 Онуң гүндогарында үч дервезе, демиргазыгында үч, гүнортасында үч, гүнбатарында хем үч дервезе барды. 14 Шәхериң диварының дүйбүнде 12 саны даш барды. Оларда Гузының 12 ресулының атлары язылгыды.

15 Мениң билен геплешйән перишдәниң элинде шәхери, онуң дервезелерини ве диварыны өлчемек үчин алтындан ясалан өлчег таягы* барды. 16 Шәхер дөртбурч болуп, узынлыгы гиңлиги ялы улуды. Перишде таягы билен шәхери өлчәнде, ол такмынан 2 220 километр* чыкды; онуң узынлыгы, гиңлиги ве бейиклиги деңди. 17 Перишде шәхериң диварыны хем өлчеди, ол ынсан ве перишдәниң өлчеги билен такмынан 64 метр* чыкды. 18 Шәхериң дивары яшма дашындан, өзи болса дуры айна ялы сап алтындан ясалыпды. 19 Шәхериң диварының дүйби хер дүрли гымматбаха дашлар билен безеленди: биринҗиси яшма, икинҗиси якут, үчүнҗиси чакмакдашы*, дөрдүнҗиси зүмеррет, 20 бәшинҗиси сардоникс, алтынҗысы хакык, единҗиси хризолит, секизинҗиси берил*, докузынҗысы топаз, онунҗысы хризопраз, он биринҗиси гиасинт, он икинҗиси аметист дашы. 21 Онуң 12 дервезеси 12 саны дүрдәнеден ыбаратды; хер дервезеси дүрдәнеден ясаланды. Шәхериң улы көчелери сап алтындан болуп, дуры айна ялыды.

22 Мен шәхерде ыбадатхана гөрмедим, себәби онуң ыбадатханасы Гудратыгүйчли Худай Ехова* ве Гузуды. 23 Шәхере Гүнүң-де, Айың-да шөхлеси герек дәлди, себәби Худайың шөхраты оңа ягты сачярды, онуң чырасы болса Гузуды. 24 Миллетлер оларың ягтысында йөрәр, ер йүзүниң патышалары-да өзлерине берлен шөхраты оңа берерлер. 25 Шәхериң дервезелери узаклы гүн ачык дурар, себәби ол ерде гиҗе болмаз. 26 Олар миллетлериң шөхратыны ве хорматыны бу шәхере берерлер. 27 Хапаланан хич бир зат, йигренҗи ишлери эдйәнлер ве яланчылар шәхере гирмез. Оңа диңе Гузының яшайыш китабында ады языланлар гирер.

22 Соңра перишде маңа яшайыш берйән айна ялы арасса деряның сувуны гөркезди. Ол Худайың ве Гузының тагтындан акып, 2 шәхериң улы көчесиниң ортасындан гечйәрди. Деряның ики тарапында хер йыл 12 сапар, ягны хер ай миве берйән яшайыш агачлары барды. Агачларың япраклары миллетлери сагалтмак үчин өсйәрди.

3 Худай ол шәхери хич хачан нәлетлемез, гайтам, онда Худайың ве Гузының тагты дурар. Ол ерде Худайың гуллары мукаддес гуллугы берҗай эдерлер. 4 Олар Худайың йүзүни гөрерлер, маңлайларында болса онуң ады язылар. 5 Ол ерде гайдып гиҗе болмаз, олара чыраның я-да Гүнүң ягтылыгы хем герек болмаз. Себәби Ехова* Худайың өзи оларың үстүне ягты сачар ве олар патыша болуп бакы хем эбеди хөкүм сүрерлер.

6 Перишде маңа: «Бу сөзлер ыгтыбарлы ве хакдыр; хава, пыгамберлерини ылхамландыран Ехова* Худай тизден болҗак затлары гулларына гөркезмек үчин перишдесини иберди. 7 Ине, мен тизден гелерин. Шу голязмадакы пыгамберлик сөзлерини берҗай эдйән адам багтлыдыр».

8 Мен Яхя, айдылан затлары эшиденимде ве гөренимде, шу затлары гөркезен перишдә сежде этмек үчин дыза чөкдүм. 9 Эмма ол: «Сересап бол! Бейле зат этме! Худая сежде эт! Мен хем сениң ве пыгамбер доганларың хем-де шу голязмадакы сөзлери берҗай эдйәнлер ялы бир гулдурын» дийди.

10 Соңра ол маңа шейле дийди: «Шу голязмадакы пыгамберлик сөзлерине мөхүр басып гизлеме, себәби белленен вагт голайландыр. 11 Гой, эрбетлик эдйән адам эрбетлик этмегини довам этсин, йигренҗи адам хем йигренҗи ишлери этмегини довам этсин; эмма догры адам догрулыкда гезмегини довам этсин, мукаддес адам хем мукаддес болмагыны довам этсин.

12 „Ине, мен тизден гелерин. Мен хер киме өз эден ишине гөрә хакыны бермәге тайындырын. 13 Мен Алфа ве Омега*, биринҗи хем соңкудырын, башлангыч хем-де ахырыдырын. 14 Эшигини юванлар багтлыдыр, себәби олара яшайыш агаҗының янына бармага ыгтыяр берлер ве олар шәхере дервезелеринден гирмәге мүмкинчилик аларлар. 15 Итлер*, җадыгөйлик* билен мешгулланянлар, ахлаксызлык* эдйәнлер, ганхорлар, бутпаразлар, яланы сөййәнлер ве яланчылар болса шәхериң дашында галарлар“.

16 „Мен Иса, бу затлар хакда йыгнаклара шаятлык эдилер ялы, перишдәми иберйәрин. Мен Давудың машгаласындан* ве неслинден болуп, ягты сачян даң йылдызыдырын“».

17 Мукаддес рух ве гелин «Гел!» диййәр. Гой, муны эшидйәнлер хем «Гел!» дийсинлер, гой, сувсан адам гелсин; ислейән адам, гой, яшайыш сувуны мугт алсын.

18 «Мен шу голязмадакы пыгамберлик сөзлерини эшидйән хер кесе шаятлык эдйәрин: Эгер бири шу сөзлере бир зат гошса, Худай оңа шу голязмада язылан җезалары берер. 19 Эгер бири шу голязмадакы пыгамберлик сөзлеринден бир зат айырса, Худай яшайыш агаҗындан оңа берилмели пайы ызына алар ве шу голязмада язылан мукаддес шәхере гирмәге ругсат бермез.

20 Бу затлара шаятлык эдйән шейле диййәр: „Хава, мен тизден гелерин“».

«Омын! Халыпам Иса, гел!»

21 Гой, Халыпамыз Исаның мерхемети мукаддеслер билен болсун.