Маркус

6 Иса ол ерден гайдып, шәгиртлери билен өз шәхерине гелди. 2 Сабат гүни* ол синагогада өвредип башлады. Оны диңлейән адамларың көпүси хайран галып, шейле дийдилер: «Ол бу затлары ниреден өврендикә? Оңа бейле акылдарлыгы ве гудратлары этмәге гүйҗи ким бердикә? 3 Ол агач уссасы дәлми? Ол Меръемиң оглы ве Якубың, Юсубың, Яхуданың, Симуның доганы дәлми нәме? Онуң гыз җигилери хем шу ерде яшамаярмы?» Шейлеликде, олар оңа иман этмедилер*. 4 Эмма Иса олара: «Пыгамбер әхли ерде сыланса-да, оны яшаян еринде, өйүнде ве доган-гарындашларының арасында сыламаярлар» дийди. 5 Шол себәпли Иса ол ерде бирнәче сыркавларың үстүне элини гоюп, олары сагалтды-да, башга хич хили гудрат гөркезмеди. 6 Иса оларың ынанмаяндыкларына гең галды ве шол төверекдәки обалара айланып, адамлара өвретди.

7 Соңра ол 12 ресулыны чагырып, олары ики-икиден уградып башлады. Иса олара җынлары ковмага ыгтыяр берди. 8 Шейле-де ол шәгиртлерине ёл үчин хасадан башга хич зат: чөрек, иймитли торба, пул алмазлыгы табшырды. 9 Диңе аякгап гейип, янларында болса ики эшик хем алмалы дәлдигини айтды. 10 Соңра Иса олара шейле дийди: «Хайсы өе барсаңыз-да, гайдянчаңыз, шол ерде болуң. 11 Хайсы ерде адамлар сизи кабул этмесе я-да диңлемесе, онда ол ерден чыкып баряркаңыз, аягыңызың тозаныны какың*. Бу олара дуйдурыш болар». 12 Шонда олар гидип, адамларың тоба этмелидигини вагыз этдилер. 13 Олар энчеме җынлары ковуп чыкардылар, көп сыркав адамлара яг чалып сагалтдылар.

14 Хиродес* патыша болян затлары эшитди. Себәби Исаның ат-овазасы хемме ере яйрады. Адамлар ол барада: «Сува чүмдүрйән Яхя өлүмден дирелипдир, шейле гудратлар ол аркалы боляндыр» диййәрдилер. 15 Эмма кәбири: «Бу Ыляс пыгамбер» диййәрди. Башгалар болса: «Ол өңки пыгамберлериң бири ялы пыгамбердир» дийишйәрдилер. 16 Хиродес булары эшиденде: «Ол мениң башыны кесдирен Яхям болмалы. Ол дирелипдир» дийди. 17 Себәби Хиродес адамларыны ёллап, Яхяны туссаг эдипди ве зынҗыра баглап, түрмә басыпды. Ол муны доганы Филипусың аялы Хиродия үчин этди, себәби Хиродес оңа өйленипди. 18 Яхя оңа: «Сен доганың аялыны алып, кануны бозярсың» дийип, энчеме гезек айдыпды. 19 Хиродия Яхяны йигренип, оны өлдүрмек ислейәрди. Йөне муны эдип билмейәрди. 20 Себәби Хиродес Яхяның догры, мукаддес адамдыгыны билип, ондан горкярды ве оны гораярды. Ол Яхяның гүррүң берйән затларыны диңләп, оңа нәме этҗегини билмейәрди, йөне шонда-да оны хөвес билен диңлейәрди.

21 Хиродес доглан гүни мынасыбетли той тутанда, Хиродия үчин аматлы пурсат дөреди. Тойда гошун серкерделери, ёкары везипели ве Җелиләниң атлы-абрайлы адамлары хем барды. 22 Хиродияның гызы ичери гирди-де, танс эдип, Хиродесиң ве мыхманларың гөвнүнден турды. Шонда патыша гыза: «Ислән задыңы сора, мен саңа берерин» дийди. 23 Хава, ол ант ичип: «Нәме ислесең, хатда патышалыгымың ярысыны дилесеңем, берерин» дийди. 24 Ол хем гидип, эҗесинден: «Нәме сорайын?» дийди. Эҗеси-де: «Сува чүмдүрйән Яхяның келлесини» дийип җогап берди. 25 Гыз деррев патышаның янына барды-да: «Маңа хәзириң өзүнде сува чүмдүрйән Яхяның башыны бир табакда гетирип бермегиңи ислейәрин» дийди. 26 Патыша муңа гаты гынанса-да, ант ичендиги ве отуран мыхманлар* себәпли хайышыны битирди. 27 Шонда патыша дессине җеллады иберип, Яхяның башыны кесип гетирмеги буюрды. Ол хем гидип, түрмеде Яхяның башыны кесди. 28 Соңра оны бир табакда гетирип, гыза берди. Гыз хем эҗесине элтип берди. 29 Шәгиртлери муны эшиденлеринде, гелдилер-де, онуң җеседини алып җайладылар.

30 Ресуллар Исаның янына йыгнанып, эден әхли ишлерини ве өвреден затларыны гүррүң бердилер. 31 Шонда Иса олара: «Йөрүң, адамың ёк ерине гидип, аз-овлак дынч алалың» дийди. Себәби гелип-гидйән адамлар көпди, нахар иймәге-де вагтлары ёкды. 32 Шейдип, олар гайыга мүндүлер-де, адамсыз ере гитдилер. 33 Эмма адамлар оларың гидип баряныны гөрдүлер ве көплер муны билди. Шонда әхли шәхерлерден адамлар ылгашып, хеммеси билеликде оларың өзлеринден хем өң шол ере бардылар. 34 Иса гайыкдан дүшенде, улы мәрекәни гөрүп, олара йүреги авады. Себәби олар чопансыз гоюнлар ялыды. Шонда ол адамлара көп затлары өвредип башлады.

35 Шәгиртлер өйлән Исаның янына гелип, шейле дийдилер: «Бу ер чола, вагт хем гич болды. 36 Адамлары гойбер, гой, олар шу төвереклере ве обалара гидип, өзлерине иере зат сатын алсынлар». 37 Иса: «Олара иере зады сиз бериң» дийди. Шонда шәгиртлери: «Биз гидип, 200 динарлык* чөрек сатын алып, адамлара берелими?» дийдилер. 38 Иса хем олара: «Сизиң нәче чөрегиңиз бар? Гидиң-де, гөрүң!» дийди. Олар гөрүп гайданларындан соң: «Бәш чөрек билен ики балыгымыз бар» дийдилер. 39 Шонда Иса әхли адамлара топарлара бөлүнип, отуң үстүнде отурмагы табшырды. 40 Олар хем йүз-йүзден ве элли-эллиден топарлара бөлүнип отурдылар. 41 Иса бәш чөрек билен ики балыгы алды-да, гөге бакып дога этди*. Соңра чөреклери бөлүшдирип, шәгиртлерине берди, шәгиртлер хем олары адамларың өңүнде гойдулар. Ол ики балыгы-да хеммелере бөлүп берди. 42 Адамларың хеммеси ийип дойдулар. 43 Артып галан чөреклери йыгнанларында, балыкдан башга 12 себет долды. 44 Чөрек иенлериң саны 5 мүң эркек адамды.

45 Соңра Иса шәгиртлерине деррев гайыга мүнүп, бейлеки кенара, ягны Бетсайда тарапа гечмеги табшырды. Өзи болса мәрекәни угратмак үчин галды. 46 Адамлар билен хошлашандан соң, ол дога этмек үчин дага гитди. 47 Агшам дүшенде, гайык деңзиң ортасына етипди, эмма Исаның еке өзи энтегем дагдады. 48 Соңра Иса шәгиртлериң кынлык билен күрекләп баряныны гөрди, себәби ел олара гаршы өвүсйәрди. Такмынан гиҗәниң дөрдүнҗи ярымында* Иса деңзиң йүзүнден йөрәп, олара голай гелди, йөне оларың деңинден гечип гитҗек ялы болуп гөрүнди. 49 Олар Исаның деңзиң йүзүнден йөрәп гелйәнини гөрүп: «Бу не аламат!» дийип гыгырышдылар. 50 Хеммеси оны гөрүп горкдулар. Иса деррев олара: «Батыр болуң! Бу мен; горкмаң» дийди. 51 Соңра ол гайыга мүнди, ел хем ятды. Олар муңа дийсең хайран галдылар. 52 Олар бәш чөрек билен болан гудратдан хич хили сапак эдинмәндирлер, бу затларың манысына энтегем дүшүнмейәрдилер.

53 Олар деңзиң бейлеки тарапына гечип, Генесареде гелдилер ве гайыгы кенарың голайында багладылар. 54 Олар гайыкдан дүшен бадына, адамлар Исаны танадылар. 55 Олар ылгашып, шол төвереклери айланып чыкдылар ве Исаның ниредедигини эшидип, сыркавлары дүшеклери билен шол ере гетирип башладылар. 56 Иса обалара, шәхерлере я-да башга ерлере баранда, адамлар сыркавлары базар ерлеринде ятырып гойярдылар ве иң болманда, онуң донуның этегине эллерини дегирмәге ругсат сорап ялбарярдылар. Элини дегренлериң хеммеси сагалярды.