Маркус

13 Иса ыбадатханадан чыкып гелйәркә, шәгиртлериниң бири: «Мугаллым, дашларың ве биналарың оваданлыгына серет!» дийди. 2 Эмма Иса: «Сиз биналарың бейиклигине бир середиң! Бу ерде даш үстүнде даш галмаз, әхлиси юмрулар» дийди.

3 Ол Зейтун дагында отырка, Петрус, Якуп, Яхя ве Андреас екеликде янына барып: 4 «Бизе айт, бу затлар хачан болар, дүнйәниң* соңуның голайлашандыгыны гөркезйән аламат нәхили болар?» дийип сорадылар. 5 Иса олара шейле гүррүң берип башлады: «Сересап болуң, хич ким сизи алдаймасын. 6 Көплер мениң адымдан гелип, „Мен Месих“ диерлер ве көп адамлары алдарлар. 7 Шейле-де сиз дүрли ерлерде болян уруш сеслерини ве уруш барадакы хабарлары эшидерсиңиз. Ховсала дүшәймәң; бу затлар болмалыдыр, йөне энтек дүнйәниң соңы дәлдир.

8 Миллет миллете, патышалык хем патышалыга гаршы чыкар, дүрли-дүрли ерлерде ертитремелер ве ачлык болар. Булар бетбагтчылыгың башлангыҗыдыр*.

9 Сиз велин өзүңизе үнсли болуң. Адамлар сизи казыете элтерлер, синагогаларда урарлар. Мениң шәгирдимдигиңиз үчин, сизи хөкүмдарларың ве патышаларың өңүне алып барарлар. Бу сизе иманыңыз хакда шаятлык этмәге мүмкинчилик берер. 10 Йөне, илки билен, Патышалык барадакы хош хабар әхли миллетлере вагыз эдилер. 11 Сизи оларың өңүне элтенлеринде, нәме айдарын дийип алада этмәң. Себәби нәме диймелидигини сиз шол вагт билерсиңиз, чүнки геплейән сиз дәл-де, мукаддес рух болар. 12 Шейле-де адамлар өз доганыны өлүме табшырарлар. Ата өз чагасына, чагалар хем ата-энесине гаршы чыкып, олары өлдүрерлер. 13 Мениң адыма иман эдйәндигиңиз үчин, хеммелер сизи йигренер. Эмма соңуна ченли чыдан халас болар.

14 Сиз вейранчылык гетирйән йигренҗи задың дурмалы дәл ерде дурандыгыны гөрениңизде (муңа дүшүнмек үчин окыҗа дүшгүрлик герек), Яхудадакылар даглара гачсын. 15 Шонда җайың үчегиндәки* адам задыны алмак үчин өйүне гирмесин. 16 Экин мейданындакы адам ызында галан затларыны, меселем, донуны алмак үчин, өйүне доланмасын. 17 Шол гүнлер гөврели ве чага эмдирйән аяллара нәхили кын болар! 18 Гачмалы гүнүңиз гышда болмаз ялы, дога эдиң. 19 Себәби шол гүнлер шейле агыр мушакгат болар велин, ол Худайың ярадан дөврүнден тә шу гүнлере ченли не боландыр, не-де болар. 20 Эгер Ехова* шол гүнлери гысгалтмадык болса, хич ким халас болмазды. Йөне ол өз сайланлары үчин шол гүнлери гысгалтды.

21 Шонда бири сизе „Ине Месих шу ерде“ я-да „Середиң! Анха ол ерде!“ дийсе ынанмаң. 22 Себәби ялан Месихлер ве ялан пыгамберлер дөрәр. Олар хатда сайлананлары хем алдамак үчин аламатлар ве гудратлар гөркезерлер. 23 Шонуң үчин оя болуң. Мен сизе әхли затлары өңүнден айдандырын.

24 Эмма шол гүнлер агыр мушакгатдан соң, Гүн гаралар, Ай ягтылык бермез, 25 йылдызлар гөкден гачар ве гөк гудратлары титрәр. 26 Олар Ынсан оглуның гөкдәки булутларда улы гудрат ве шөхрат билен гелйәнини гөрерлер. 27 Ол перишделерини иберер, олар ериң дөрт тарапындан*, ериң бир уҗундан асманың бейлеки уҗуна ченли сайлананлары йыгнарлар.

28 Инҗир агаҗындан сапак эдиниң: онуң шахалары пынтыклап, япрак чыкарып башланда, томсуң голайландыгыны билйәрсиңиз. 29 Шонуң ялы-да шейле затларың боляндыгыны гөрениңизде, Ынсан оглуның голайдыгыны, гапының агзындадыгыны билиң. 30 Сизе догрусыны айдярын, шу несил дүнйәден өтмәнкә, бу затларың әхлиси болар. 31 Гөк ве ер гечип гидер, йөне мениң сөзлерим галар.

32 Шол гүни я сагады хич ким, гөкдәки перишделер-де, Огул-да билйән дәлдир, муны диңе Ата билйәндир. 33 Хүшгәр болуң, оя болуң, себәби сиз белленен вагтың хачан болҗакдыгыны билмейәрсиңиз. 34 Муны өйүни гоюп, башга юрда гиден бир адам билен деңешдирсе болар. Ол гитмезден өң, гулларына ыгтыяр берип, херсине бир иш табшыряр ве гапы гаравулына оя болмагы буюряр. 35 Шонуң үчин оя болуң, себәби сиз хоҗайының өе хачан гелҗекдигини билмейәрсиңиз. Белки-де, ол агшам, ярыгиҗе, даңдан* я-да ирден гелер. 36 Ол дуйдансыз гелип, уклап ятыркаңыз үстүңизи басаймасын. 37 Эмма сизе айдян затларымы хеммелере айдярын: оя болуң!»