Маркус
14 Пасха ве Петир* байрамына ики гүн галыпды. Улы руханылар ве канунчылар Исаны мекирлик* билен туссаг эдип, өлдүрмек үчин пурсат гөзлейәрдилер. 2 Эмма олар: «Адамлар гопгун турузмаз ялы, оны байрамчылык гүни туссаг этмәлиң» диййәрдилер.
3 Иса Бетанияда өң хейвере кесели болан Симуның өйүнде сачак башында отырка, бир аял өрән гыммат, якымлы ыслы сап нард* ягы гуйлан габы* алып гелди. Ол габың гапагыны ачды-да, оны Исаның башына гуюп башлады. 4 Шонда шәгиртлер өз араларында нәгиле болуп: «Бу якымлы ыслы ягы бидерек харчламак нәмә герек? 5 Оны 300 динардан* говрак пула сатып, гарыплара пайлап боларды!» дийишдилер. Шейдип, олар бу аяла өрән нәгиле болдулар*. 6 Эмма Иса олара шейле дийди: «Оңа дегмәң! Сиз нәме үчин оны ынҗадярсыңыз? Ол маңа ягшылык этди ахырын. 7 Гарыплар хемише сизиң яныңызда боларлар, сиз олара ислән вагтыңыз көмек эдип билерсиңиз, эмма мен сизиң яныңызда хемише болмарын. 8 Ол элинде барыны этди; бедениме якымлы ыслы яг гуюп, мени җайламага тайярлады. 9 Сизе догрусыны айдярын, хош хабар дүнйәниң ниресинде вагыз эдилсе, аялың бу эден иши хакда хем айдылар*».
10 Шонда 12 ресулың бири Иуда Искариот улы руханыларың янына барып, Исаны тутмага көмек этҗекдигини айтды. 11 Олар муны эшидип, бегендилер ве оңа күмүш пул берҗекдигини айтдылар. Шондан соң ол Исаны сатмак үчин пурсат гөзләп башлады.
12 Петир байрамының биринҗи гүни*, ягны адат боюнча Пасха гурбанының берилйән вагты шәгиртлер Исаның янына гелип: «Сениң үчин Пасха нахарыны ниреде тайярлалы?» дийдилер. 13 Ол ики шәгирдини ёллап, шейле дийди: «Шәхере гириң, ол ерде күйзеде сув алып барян бир адама душарсыңыз. Онуң ызына дүшүң. 14 Ол хайсы өе гирсе, шол өйүң эесине „Мугаллым шейле диййәр: Шәгиртлерим билен Пасхалык нахарыны иер ялы, мыхман отагы ниреде?“ дийиң. 15 Ол сизе ичинде хемме зады бар болан ёкаркы улы отагы гөркезер. Шоны бизиң үчин тайярлаң». 16 Шәгиртлер шәхере гиренде, әхли зат Исаның айдышы ялы болды, олар хем Пасха байрамына тайярлык гөрдүлер.
17 Агшам дүшенде, ол 12 ресулы билен шол ере гелди. 18 Сачак башында ийип-ичип отыркалар, Иса: «Сизе догрусыны айдярын, мениң билен нахар ийип отураның бири маңа дөнүклик эдер» дийди. 19 Олар муңа гаты гынанып, хеммеси: «Мен-ә дәлдирин?» дийишдилер. 20 Иса шейле дийди: «Ол мениң билен бир табага чөрегини батырян 12 ресулың биридир. 21 Язгыларда айдылышы ялы, Ынсан оглы өлдүрилмек үчин сизден гидип баряр. Йөне Ынсан оглуна дөнүклик эдйән адамың вай гүнүне! Ол дүнйә инмедик болса говы боларды».
22 Олар нахар ийип отыркалар, Иса чөреги алды-да, дога эдип, оны бөлүшдирди ве шәгиртлерине берип: «Алың, ийиң. Бу мениң беденими аңладяндыр» дийди. 23 Соңра кәсәни алды-да, Худая дога эдип, миннетдарлык айтды. Оларың әхлиси ондан ичдилер. 24 Иса олара шейле дийди: «Бу көп адамлар үчин дөкүлҗек „әхт ганыны“ аңладяндыр. 25 Сизе догрусыны айдярын, мен Худайың Патышалыгында тәзе шерапдан ичйәнчәм, мундан бейләк шерап ичмерин». 26 Соңра олар Худая өвгүли айдымлар* айтдылар ве Зейтун дагына гитдилер.
27 Иса олара шейле дийди: «Сизиң хеммәңиз менден йүз өврерсиңиз*. Себәби Язгыларда: „Мен чопаны өлдүрерин, гоюнлар хем даргар“ дийилйәр. 28 Йөне мен диреленимден соңра, сизден өңүрти Җелилә барарын». 29 Эмма Петрус оңа: «Хеммелер сенден йүз өвүрсе-де, мен йүз өвүрмерин*» дийди. 30 Шонда Иса: «Саңа догрусыны айдярын, эдил шу гиҗе хораз ики гезек гыгырманка, сен менден үч гезек йүз дөндерерсиң» дийди. 31 Петрус өңкүсинден-де хас бетер җаныгып: «Сениң билен өлмели болсам-да, сенден асла йүз дөндермерин» дийди. Бейлеки шәгиртлер хем шейле диййәрдилер.
32 Шейлеликде, олар Гетсеман дийилйән ере гелдилер. Иса шәгиртлерине: «Мен дога эдйәнчәм, сиз шу ерде отурың» дийди. 33 Иса яны билен Петрусы, Якубы ве Яхяны алып гитди. Ол агыр гама батып, җуда хасрат чекип башлады. 34 Иса олара: «Мен* өрән хасрат чекйәрин, гайгыдан яңа өлүп барярын. Шу ерде галың-да, оя болуң» дийди. 35 Өзи болса бираз өңе йөреди-де, ере йыкылып, дога эдип башлады. Ол Худайдан, мүмкин болса, шу ягдайың сова гечмегини дилейәрди. 36 Ол: «Авва*, Атам, мүмкин болса, бу кәсәни менден айыр. Йөне мениң ислейшим ялы дәл-де, сениң ислейшиң ялы болсун» дийди. 37 Ол доланып геленде, шәгиртлериниң уклап ятандыгыны гөрүп, Петруса шейле дийди: «Симун, сен уклап ятырмың? Екеҗе сагат хем мениң билен оя болмага гүйҗүң етмедими? 38 Сынага дүшмез ялы, оя болуп, дынгысыз дога эдиң. Догруданам, йүрек* ыхласлы болса-да, беден* эҗиздир». 39 Ол ене-де гидип, өңки сөзлерини айдып дога этди. 40 Иса ене-де шәгиртлериниң янына баранда, уклап ятандыкларыны гөрди, себәби олары укы басярды. Йөне шәгиртлери оңа нәме җогап берҗеклерини билмейәрдилер. 41 Ол шәгиртлериниң янына үчүнҗи гезек доланып геленде, шейле дийди: «Сиз шейле ваҗып вагтда ятып, дынч алярсыңыз! Инди бесдир! Вагт гелип етди! Ине, Ынсан оглы гүнәкәрлериң элине табшырыляр. 42 Туруң, гиделиң. Ине, маңа дөнүклик эдйән адам голайлашяр».
43 Ол хениз гепләп дурка, 12 ресулың бири Иуда улы руханыларың, канунчыларың ве яшулуларың иберен мәрекеси билен гелди. Олар гылычлы ве таяклыды. 44 Шонда оңа дөнүклик эден шәгирт нәхили ышарат этҗекдигини айдып: «Кими огшасам, ол сизиң гөзлейән адамыңыздыр; шоны туссаг эдиң. Оны алып гидениңизде, ол гачмаз ялы, сересап болуң» дийипди. 45 Соңра ол гөни Исаның янына барып: «Мугаллым!*» дийди-де, оны мәхирли огшады. 46 Шонда олар гелип, оны туссаг этдилер. 47 Эмма Исаның янында дуранларың бири гылыҗыны чыкарды-да, баш руханының гулуны уруп, гулагыны кесди. 48 Иса геленлере йүзленип, шейле дийди: «Бир гаракчының гаршысына чыкан ялы, сиз мени тутмак үчин гылычдыр таяк билен гелдиңизми? 49 Хер гүн сизиң билен ыбадатханада отурып, адамлара өвреденимде, мени туссаг этмедиңиз. Эмма бу затлар Язгыларың ерине етмеги үчин боляндыр».
50 Шонда шәгиртлериң хеммеси оны ташлап, гачып гитдилер. 51 Эмма бир яш йигит голайракдан онуң ызына дүшүп барярды. Ол ялаңач эгнине ёкары хилли зыгыр матадан япынҗа атыныпды. Адамлар оны тутҗак боланда, 52 ол зыгыр матадан япынҗасыны ташлап, ялаңач* гачып гитди.
53 Соңра Исаны баш руханының янына алып бардылар. Ол ерде улы руханылар, яшулулар ве канунчылар йыгнанышыпдылар. 54 Петрус болса эсли аралыкдан онуң ызына дүшүп, баш руханының ховлусына гирди. Ол өй хызматкәрлери билен биле одуң башында йылынып отурды. 55 Улы руханылар ве бүтин Меҗлис* болса Иса өлүм җезасыны берҗек болуп, оңа гаршы ялан шаятлык агтарярдылар, йөне хич зат тапмаярдылар. 56 Аслында, көп адамлар оңа гаршы ялан шаятлык эдйәрдилер, йөне оларың сөзлери бири-бирине габат гелмейәрди. 57 Кәбирлери еринден туруп, оңа гаршы шейле ялан шаятлык этдилер: 58 «Биз онуң „Мен адам эллери билен гурлан шу ыбадатхананы юмруп, үч гүнден адам эллери билен гурулмадык башга бир ыбадатхана гурарын“ диенини эшитдик». 59 Эмма оларың-да айдянлары бир-бирине гаршы гелйәрди.
60 Оларың арасында отуран баш руханы еринден туруп, Иса шейле сораглары берди: «Сениң айдара задың ёкмы? Оларың саңа гаршы шаятлык эдйәндигини эшитмейәрмиң?» 61 Эмма Иса дымып, хич зат җогап бермеди. Баш руханы ене-де ондан: «Сен Мукаддес Худайың Оглы Месихмиң?» дийип сорады. 62 Иса оңа: «Хава, мен шол. Сиз Ынсан оглуның Гудратыгүйчлиниң сагында* отураныны ве гөкдәки булутлар билен гелйәнини гөрерсиңиз» дийди. 63 Шонда баш руханы донуны йыртып, шейле дийди: «Бизе башга шаят нәмә герек? 64 Онуң Худая дил етирйәндигини өзүңиз эшитдиңиз ахырын. Сиз бу барада нәме пикир эдйәрсиңиз?» Оларың хеммеси оны язгарып, өлүме мынасып гөрдүлер. 65 Кәбирлери оңа түйкүрип башладылар, онуң йүзүни япып: «Пыгамбер болян болсаң, ханы айт, сени ким урды?» дийип юмруклаярдылар. Соңра көшк хызматкәрлери онуң йүзүне шарпык чалдылар ве оны алып гитдилер.
66 Петрус болса ашакда, ягны ховлуда отырка, баш рухана хызмат эдйән гызларың бири гелди. 67 Ол Петрусың одуң башында йылынып отураныны гөрүп, оңа серетди-де: «Сенем назаретли Исаның янындадың» дийди. 68 Эмма ол боюн алман: «Мен оны танамаярын ве сениң нәме хакда айдяныңа асла дүшүнмейәрин» дийди-де, дервезә тарап гитди. 69 Шол хызматкәр гыз ене-де Петрусы гөрүп, даш-төверегинде дуран адамлара: «Бу онуң шәгиртлериниң бири» дийип башлады. 70 Петрус ене-де боюн алмады. Бираз вагт геченсоң, шол ерде дуран адамлар Петруса: «Сен, догруданам, шоларың бири, себәби сениң җелилелидигиң гөрнүп дур» дийдилер. 71 Эмма Петрус өз-өзүне гаргап: «Мен сизиң айдян адамыңызы танамаярын!» дийип, ант ичип, авы ялап башлады. 72 Шол бада хораз икинҗи гезек гыгырды ве Исаның: «Хораз ики гезек гыгырманка, сен менден үч гезек йүз өврерсиң» диен сөзлери Петрусың ядына дүшди. Шонда ол мөңңүрип агламага башлады.