Яхя
3 Шол ерде Никодим атлы бир фарисей барды, ол ехудыларың ёлбашчысыды. 2 Ол гиҗе Исаның янына гелип: «Ребби*, биз сениң Худайдан гелен мугаллымдыгыңы билйәрис, себәби Худай гүйч бермесе, сениң эдйән гудратларыңы хич ким эдип билмез» дийди. 3 Иса оңа: «Саңа догрусыны айдярын, тәзеден догулмадык* адам Худайың Патышалыгыны гөрүп билмез» дийип җогап берди. 4 Шонда Никодим: «Хей-де, гарры адам тәзеден доглуп билерми? Ол эҗесиниң гөвресине гайтадан гирип, ене-де доглуп билерми нәме?» дийди. 5 Иса оңа шейле җогап берди: «Саңа догрусыны айдярын, сува чүмдүрилмедик ве Худайың мукаддес рухуны алмадык* адам Худайың Патышалыгына гирип билмез. 6 Адамдан доглан хер кес ынсан чагасы боляндыр, мукаддес рухдан доглан адам болса Худайың чагасы боляндыр. 7 Сен мениң „Сиз тәзеден догулмалысыңыз“ диен сөзлериме гең галма. 8 Ел ислән тарапына өвүсйәндир, сен онуң сесини эшитсең-де, ниреден гелип, нирә баряндыгыны билйән дәлсиң. Шонуң ялы-да адамың мукаддес рухдан доглушына дүшүнмек кындыр».
9 Никодим оңа: «Бейле зат нәдип болуп билер?» дийди. 10 Иса шейле җогап берди: «Сен ысрайыл халкының мугаллымы болуп-да, шу затлары билмейәрмиң? 11 Саңа догрусыны айдярын, биз гөрен затларымызы гүррүң берйәрис, гөрен затларымыза-да шаятлык эдйәрис, йөне сиз олары кабул этмейәрсиңиз. 12 Эгер сиз мениң ер билен баглы айдян затларыма ынанмаян болсаңыз, онда гөк билен баглы айтҗак затларыма нәдип ынанарсыңыз? 13 Галыберсе-де, гөге хич ким чыкан дәлдир, оңа диңе гөкден инен Ынсан оглы чыкандыр. 14 Чөлде Мусаның йыланы таяга беркидип, ёкарык галдырышы ялы, Ынсан оглы-да ёкарык галдырылмалыдыр. 15 Шонда оңа иман эден хер кес эбеди яшайша говшар.
16 Худай дүнйәдәки адамлары* гүйчли сөййәндиги үчин өзүниң еке-тәк Оглуны берди. Ол муны Оглуна иман эден* хер бир адамың хеләк болман, эбеди яшайша говушмагы үчин этди. 17 Худай Оглуны дүнйәдәки адамлары* хөкүм этмек үчин дәл-де, ол аркалы халас болмаклары үчин иберди. 18 Оңа иман эдйән хич бир адам хөкүм эдилмез. Оңа иман этмейән адам болса эййәм хөкүм эдилендир, себәби ол Худайың еке-тәк Оглуның адына иман этмеди. 19 Инди хөкүм этмәге эсас бардыр: дүнйә ягтылык гелди, йөне адамлар ягтылыга дерек гараңкылыгы сөйдүлер, себәби эден ишлери эрбетди. 20 Эрбет ишлери эдйән адам ягтылыгы йигренйәндир, ягтылыга тарап барян хем дәлдир, себәби ол эдйән ишлериниң үстүниң ачылмагыны ислемейәр. 21 Эмма догры адам Худайың ислегине гөрә эдйән ишлериниң аян болмагы үчин ягтылыга тарап баряндыр».
22 Шондан соң Иса шәгиртлери билен Яхуданың обаларына гитди. Олар шол ерде бираз вагт галып, адамлары сува чүмдүрдилер. 23 Яхя-да Салимиң голайындакы Энон диен ерде сува чүмдүрйәрди, себәби ол ерде сув көпди. Адамлар хем онуң янына сува чүмдүрилмек үчин гелйәрди. 24 Шол вагт Яхя энтек түрмә басылманды.
25 Яхяның шәгиртлери болса ехудылар билен тәмизленмек дәби хакда җеделлешйәрдилер. 26 Шонда олар Яхяның янына гелип: «Мугаллым, Иорданың бейлеки тарапындакаң, сениң яныңа гелен ве ол хакда шаятлык эден адамың сува чүмдүрип йөр, хеммелер хем онуң янына баряр» дийдилер. 27 Яхя олара шейле җогап берди: «Гөкден берилмесе, адам бу ишлериң бирини-де эдип билмез. 28 „Мен Месих дәл, йөне мен онуң өңүнден иберилен адамдырын“ диен сөзлериме сизиң өзүңиз шаят болупдыңыз. 29 Гелинлиги бар болан адам өйленйән йигит хасапланяндыр. Эмма өйленйән йигидиң досты онуң янында дуруп, айдянларыны эшиденде, җуда бегенйәндир. Мениң хем бегенҗимиң чәги ёкдур. 30 Хава, Месих бейгелмелидир, мен болса песелмелидирин».
31 Ёкардан гелен хеммелерден бейикдир. Эмма ерден болан адам ердендир, ол ердәки затлар хакда геплейәндир. Гөкден гелен хеммелерден бейикдир. 32 Ол гөрен ве эшиден затларына шаятлык эдйәндир, эмма онуң шаятлыгыны хич ким кабул этмейәр. 33 Онуң шаятлыгыны кабул эден адам Худайың догручылдыгына асла шүбхеленйән дәлдир*. 34 Себәби Худай тарапындан иберилен адам Онуң айдянларыны гүррүң берйәндир, чүнки Худай мукаддес рухуны гысганып* берйән дәлдир. 35 Ата Оглуны сөййәндир ве әхли зады онуң элине берендир. 36 Огла иман эден эбеди яшайша говшар; Огла гулак асмаян адам яшайыш гөрмез, гайтам, Худайың газабына сезевар болар.