Яхя
10 Иса шейле дийди: «Сизе догрусыны айдярын, агыла гапыдан дәл-де, башга ёл билен гирйән адам огры хем талаңчыдыр. 2 Гапыдан гирйән адам болса гоюнларың чопаныдыр. 3 Гаравул оңа гапыны ачяндыр, гоюнлар хем онуң сесине гулак асяндыр. Чопан гоюнларының адыны тутуп чагыряр ве олары агылдан чыкаряр. 4 Ол гоюнларының әхлисини чыкарып, оларың өңүнден йөрейәр, гоюнлар болса онуң сесини танаяндыгы үчин ызына дүшүп гидйәр. 5 Гоюнлар нәтаныш адамың ызына дүшмез, гайтам, ондан гачар, себәби нәтаныш адамың сесини танаян дәлдирлер». 6 Иса бу деңешдирмәни айданда, олар онуң нәме хакда айдяндыгына дүшүнмедилер.
7 Иса ене-де шейле дийди: «Сизе догрусыны айдярын, мен гоюнлар үчин гапыдырын. 8 Мениң орнумы тутуп, өзүни хакыкы чопан хасаплаянлар огры хем талаңчыдыр; гоюнлар хем олара гулак асян дәлдир. 9 Мен гапыдырын; мениң үстүм билен гирйән хер кес халас болар. Ол гирер чыкар-да, өри мейданы тапар. 10 Огры диңе гоюнлары огурламак, өлдүрмек ве хеләк этмек максады билен гелйәндир. Мен болса оларың яшамагы ве эбеди яшайшы алмагы үчин гелдим. 11 Мен говы чопандырын; говы чопан гоюнлары үчин җаныны гурбан эдйәндир. 12 Гоюнлара серетмек үчин хакына тутулан адам чопан дәлдир, ол сүрини диңе пул үчин бакяндыр. Ол мөҗегиң гелйәндигини гөренде, сүрини ташлап, гачып гидйәр. Мөҗек хем сүрә топулып, олары даргадяр. 13 Хакына тутулан адам гоюнларың аладасыны этмейәр, себәби ол пул үчин бакяр. 14 Мен говы чопандырын. Атамың мени танайшы ялы, мениң хем оны танайшым ялы, 15 мен гоюнларымы танаяндырын, олар хем мени танаяндыр; мен олар үчин җанымы гурбан эдйәрин.
16 Мениң бу агылдакыдан башга-да гоюнларым бар; мен олары-да гетирмелидирин, олар хем мениң сесими эшидер. Шонда бир сүри, бир чопан болар. 17 Ине, шонуң үчин хем Атам мени сөййәндир, себәби мен җанымы гайтадан алмак үчин, оны гурбан эдйәрин. 18 Хич бир адам мениң җанымы алып билмейәр, мен оны өз ислегим билен гурбан эдйәрин. Җанымы гурбан этмәге ве гайтадан алмага ыгтыярым бардыр. Мен бу табшырыгы Атамдан аландырын».
19 Исаның айдан сөзлери зерарлы ехудыларың арасында бөлүнишик дөреди. 20 Оларың көпүси: «Ол җынлы, акылындан азашыпдыр. Сиз нәме үчин оны диңләп отырсыңыз?» диййәрдилер. 21 Башгалары болса: «Бу сөзлер җынлы адамың айтҗак сөзлер-ә дәл. Эйсем, җын көр адамың гөзүни ачып билерми?» дийдилер.
22 Шол вагт гыш паслыды. Иерусалимде ыбадатхананың ачылышына багышланан байрамчылык* гечирилйәрди. 23 Иса ыбадатхананың «Сүлейманың сүтүнлери» дийилйән ериндеди. 24 Шонда ехудылар Исаның дашына үйшдүлер-де: «Сен хачана ченли бизи көсәп йөрҗек? Месих болсаң, бизе ачык айт-да» дийип башладылар. 25 Иса олара шейле җогап берди: «Мен сизе айтдым, йөне сиз ынанмаярсыңыз. Атамың адындан эдйән ишлеримиң өзи мен хакда шаятлык эдйәр. 26 Йөне сиз ынанмаярсыңыз, себәби сиз мениң гоюнларым дәл. 27 Гоюнларым мениң сесиме гулак асяндыр, мен олары танаярын, олар хем мениң ызыма дүшйәр. 28 Мен олара эбеди яшайыш берерин, олар хич хачан хеләк эдилмез ве хич ким олары элимден алып билмез. 29 Атамың маңа берен гоюнлары әхли затдан ваҗыпдыр ве хич ким олары Атамың элинден алып билмез. 30 Атам икимиз бирдирис».
31 Ехудылар оны өлдүрҗек болуп, ене-де эллерине даш алдылар. 32 Иса олара: «Мен сизе Атамың табшыран көп ягшы ишлерини гөркездим. Оларың хайсысы үчин мени дашлаҗак болярсыңыз?» дийди. 33 Ехудылар оңа: «Биз сени ягшы ишлериң үчин дәл-де, Худая дил етирендигиң үчин дашлаҗак болярыс. Себәби сен ынсан болуп-да, өзүңи Худай хасаплаярсың» дийип җогап бердилер. 34 Иса олара шейле дийди: «Сизиң өз Кануныңызда Худай: „Сиз таңрысыңыз“ диймейәрми нәме? 35 Эгер Худай сөзүни танкытлаян адамлара „таңрылар“ диййән болса — Язгыларда нәдогры зат болуп билмез — 36 онда сиз нәдип маңа, ягны Атаның мукаддес эден ве дүнйә иберен адамсына „Мен Худайың Оглы“ диендиги үчин „Худая дил етирйәр“ дийип билйәрсиңиз? 37 Эгер мен Атамың ишлерини этмейән болсам, онда маңа иман этмәң. 38 Эгер эдйән болсам, айдянларыма ынанмасаңыз-да, иң болманда, эдйән ишлериме ынаның. Шонда сиз Атамың мениң билендигини, мениң хем Атам билен бирликдедигими билерсиңиз». 39 Олар Исаны ене-де туссаг этҗек болдулар, йөне тутуп билмедилер.
40 Иса ене-де Иорданың бейлеки тарапына гечип, Яхяның илки сува чүмдүрен ерине гитди ве шол ерде галды. 41 Шонда янына көп адамлар гелип, бир-бирлерине: «Яхя бирҗе гудрат гөркезмесе-де, шу адам хакда айданларының бары хакыкат экен» диййәрди. 42 Шол ерде көп адамлар Иса иман этдилер.