1 Коринфлилер
14 Бири-бириңизи сөймек үчин элиңизде барыны эдиң. Шейле-де Худайдан рухы сылаглары, эсасан-да, пыгамберлик сылагыны алҗак болуң. 2 Себәби дүрли дилде геплейән адам рухуң көмеги билен мукаддес сырлары айдян хем болса, онуң айдянларына хич ким дүшүнмейәр. Оңа диңе Худай дүшүнйәндир. 3 Эмма пыгамберлик эдйән адам сөзлери билен башгаларың иманыны беркидйәр, рухландыряр ве теселли берйәр. 4 Дүрли диллерде геплейән адам өзүни беркидйәндир, пыгамберлик эдйән адам болса йыгнагы беркидйәндир. 5 Мен сизиң дүрли диллерде геплемегиңизи ислейәрин, йөне пыгамберлик этсеңиз, хас говудыр. Догрудан-да, дүрли диллерде геплейән адам айдянларыны терҗиме этмесе, онда йыгнак нәдип беркесин? Шонуң үчин хем пыгамберлик эдйән адам ондан хас көп пейда гетирйәндир. 6 Доганлар, мен яныңыза гелип, башга дилде геплесем, сизе пейдасы дегерми? Сизе көмек этмекчи болсам, мен Худайың аян эден сөзлерини, гудратлы билимини, пыгамберлигини я-да таглыматыны айтмалыдырын.
7 Түйдүк я-да арфа ялы җансыз затлар барада хем шейле дийсе болар. Сазың сеслери бир-биринден тапавутланмаса, онда түйдүкде я-да арфада нәме чалыняндыгыны билип болармы? 8 Эгер сурнай хем нәбелли сес чыкарса, онда сөвеше ким тайярланар? 9 Сизиң хем айдянларыңыза аңсатлык билен дүшүнип болмаса, нәме дийҗек боляндыгыңыза ким дүшүнер? Ёгсам, сизиң хова гүррүң бердигиңиз боларды. 10 Дүнйәде энчеме диллер бар, йөне оларың хич бири манысыз дәлдир. 11 Эгер айдылян затларың манысына дүшүнмейән болсам, онда мен геплейән адам үчин ят юртдан гелен адам ялыдырын. Ол хем мениң үчин башга юртдан гелен адам ялыдыр. 12 Сиз мукаддес рухуң берйән сылагларыны алмага җан эдйән болсаңыз, онда йыгнагы беркидйән сылаглара хас көп эе болҗак болуң.
13 Шонуң үчин дүрли диллерде геплейән адам терҗиме эдип билер ялы, дога этсин. 14 Мен мукаддес рухуң берен сылагы аркалы дога этсем-де, онуң манысына дүшүнмейәрин. 15 Онда нәме этсе болар? Эгер мен мукаддес рухуң берйән сылагы аркалы дога эдйән болсам, онда онуң манысына дүшүнип хем дога этҗек боларын. Эгер мукаддес рухуң берйән сылагы аркалы Худая айдым айтсам, онуң манысына дүшүнип хем айтҗак боларын. 16 Эгер сиз мукаддес рухуң сылагы аркалы Худая дога эдип, алкыш айтсаңыз, араңыздакы йөнекей адам хем миннетдарлык догаңыза дүшүнмесе, ол нәдип «Омын» дийсин? 17 Догрудан-да, сиз говы сөзлер билен Худая шүкүр эдәениңизде-де, адамың иманы беркемейәр. 18 Мен сизиң әхлиңизден-де көп диллерде гепләп билйәндигиме Худая шүкүр эдйәрин. 19 Муңа гарамаздан, дүрли диллерде 10 мүң сөз айданымдан йыгнакдакылара өвретмек үчин дүшнүкли дилде 5 сөз айданым говудыр.
20 Доганлар, дүшүнмекде чагалар ялы болмаң-да, эрбет ишлери этмекде чагалар ялы болуң; дүшүнмекде болса рухы тайдан етишен адамлар ялы болуң. 21 Мусаның канунында шейле язылгыдыр: «Ехова*: „Бу адамлар мени диңлемекден йүз өвүрселер-де, мен олар билен башга юрдуң дилинде ве гелмишеклериң сөзлерини уланып геплешерин“ диййәр». 22 Шейлеликде, дүрли диллерде геплемеклик иман эдйәнлере дәл-де, иман этмейәнлере берлен аламатдыр. Пыгамберлик этмеклик болса иман этмейәнлер үчин дәл-де, иман эдйәнлер үчиндир. 23 Сиз йыгнак душушыгына гелениңизде, хеммәңиз дүрли диллерде геплесеңиз, онда йыгнакда отуран йөнекей адамлар я-да иман этмейәнлер сизе акылыңыздан азашыпсыңыз диймезми? 24 Эмма сизиң әхлиңиз пыгамберлик этсеңиз, араңызда отуран иман этмейән я-да йөнекей адам муны эшидип, өз ялңышларыны гөрер ве өзүни барламага хөвесленер. 25 Шонда онуң йүрегиндәки сырлары аян болар ве ол ере йүзин йыкылар-да: «Худай, хакыкатдан-да, сизиң билендир» дийип, оңа сежде эдер.
26 Доганлар, онда нәме этмели? Сиз биле йыгнанышаныңызда, биринде мезмур, бейлекисинде өвретмек укыбы, биринде Худайың аян эден сөзлери, бейлекисинде дүрли диллерде геплемек сылагы, ене биринде терҗиме этмек укыбы бар. Йөне буларың барыны бири-бириңизиң иманыңызы беркитмек үчин эдиң. 27 Эгер дүрли диллерде геплейәнлер бар болса, гой, оларың саны ики я-да үчден артык болмасын. Шейле-де бири олары терҗиме этсин. 28 Йөне терҗимечи болмаса, гой, онда олар өз йүрегинде Худай билен геплешсинлер, йыгнакда болса геплемән отурсынлар. 29 Гой, пыгамберлериң икиси я-да үчүси геплесин, галанлары болса манысына дүшүнмек үчин диңлесин. 30 Йөне отуранлардан бирине Худайың сөзи аян болса, онда, гой, гепләп дуран адам дымсын. 31 Хеммелер өвренип, хеммелер рухланар ялы, сиз гезекли-гезегине пыгамберлик эдип билерсиңиз. 32 Пыгамберлериң мукаддес рух аркалы алян сылагы пыгамберлериң гөзегчилиги астында болмалыдыр. 33 Себәби Худай тертипсизлик Худайы дәл-де, парахатлык Худайыдыр.
Мукаддеслериң әхли йыгнакларында болшы ялы, 34 аяллар йыгнакларда геплемән отурсынлар, себәби олара геплемәге ругсат берилмейәр. Мусаның канунында айдылышы ялы, гой, олар доганлара табын болсунлар. 35 Эгер олар бир зада дүшүнмеселер, гой, өйлеринде янёлдашындан сорасынлар, себәби аял машгала йыгнакда геплесе айып гөрүлйәндир.
36 Эйсем, Худайың сөзи сизден дөредими я-да ол диңе сизе ыглан эдилдими?
37 Эгер бири өзүни пыгамбер хасапласа я-да рухы сылагы аландырын өйтсе, гой, ол мениң сизе язянларымы Халыпамызың табшырыгы дийип кабул этсин. 38 Эгер бири муны кабул этмесе, онуң өзи-де кабул эдилмез*. 39 Доганларым, шол себәпли пыгамберлик этмәге җан эдиң, йөне башгалара-да дүрли диллерде геплемеги гадаган этмәң. 40 Йөне, гой, әхли зат болмалысы ялы ве тертип-дүзгүне лайык болсун.