1 Селаниклилер

4 Шейлеликде, доганлар, биз сизе Худайың гөвнүнден турмак үчин өзүңизи нәхили алып бармалыдыгыңыз хакда гөркезме берипдик. Аслында, сиз шейле хем эдйәрсиңиз. Инди болса бу бабатда хас-да илерлемегиңизи Халыпамыз Исаның адындан хайыш эдип үндейәрис. 2 Себәби сизе гөркезме бермек үчин Халыпамыз Исадан ыгтыяр аландыгымызы билйәнсиңиз.

3 Худайың ислеги шудур: ахлаксызлыкдан* гача дуруп, мукаддес болмалысыңыз. 4 Сиз мукаддес болуп, өз бедениңизе* нәдип эрк этмелидигини ве Худая ярамлы яшамалыдыгыны билмелисиңиз. 5 Худайы танамаян миллетлер ялы ачгөзлүк эдип, ахлаксыз ислеглериңизи канагатландырҗак болмаң. 6 Гой, шу меселеде хич ким доганына зыян етирмесин ве оны хакындан махрум этмесин. Себәби шейле иш эдйәнлери Ехова* җезалар. Биз бу бабатда өң айдышымыз ялы ене-де берк дуйдурярыс. 7 Себәби Худай бизи харам яшайша дәл-де, мукаддеслиге чагырандыр. 8 Шонуң үчин ким шу таглымата хормат гоймаса, ол адама дәл-де, сизе мукаддес рухуны берйән Худая хормат гойян дәлдир.

9 Эмма доганлык сөйгүси хакында сизе язмагың зерурлыгы ёк, себәби сиз бири-бириңизи сөймеги Худайдан өврененсиңиз. 10 Догрудан-да, сиз бүтин Македониядакы әхли доганлары сөййәрсиңиз. Эмма, доганлар, биз сизиң бу бабатда хас-да илерлемегиңизи үндейәрис. 11 Сизе маслахат беришимиз ялы, парахат яшамагы, башгаларың ишине гошулмазлыгы ве халал* зәхмет чекмеги максат эдиниң. 12 Шонда адамларың өңүнде эдепли яшап, хич зада мәтәч болмарсыңыз.

13 Галыберсе-де, доганлар, биз сизиң өлүм укусында ятан адамлар бабатда хабарсыз болмагыңызы ислемейәрис. Шонда сиз умыды болмадык адамлар ялы хасрат чекмерсиңиз. 14 Эгер биз Исаның өлүп, соңра дирелендигине иман эдйән болсак, онда Исаның шәгиртлери хөкмүнде өленлери хем Худайың дирелтҗекдигине иман эдйәндирис. 15 Биз Ехованың* сөзүне эсасланып, сизе шуны айдярыс: Халыпамыз геленде, биз, ягны яшап йөренлер гөге галарыс. Эмма башда өлүм укусына гиденлер дирелер, биз болса олардан соң дирелерис. 16 Себәби Халыпамызың хут өзи гөкден ашак инер-де, элине Худайың сурнайыны алып, баш перишдәниң сеси билен буйрук берер. Шонда Месихиң шәгирди хөкмүнде өленлер илкинҗи болуп дирелерлер. 17 Соңра биз, ягны өлмән галанлар олар билен билеликде Халыпамыз билен асманда гөрүшмек үчин булутлара алнарыс; шейлеликде, биз хемише Халыпамызың янында боларыс. 18 Хава, шу затлар хакында гүррүң эдип, бир-бириңизе теселли бериң.