1 Селаниклилер

5 Доганлар, сизе бу затларың болҗак вагты ве дөври хакда язмагың зерурлыгы ёк. 2 Себәби Ехованың* гүнүниң огрының гиҗе гелши ялы гелҗекдигини өзүңиз хем билйәнсиңиз. 3 Адамлар «Ине, парахатлык ве ховпсузлык!» диенде, шол бада оларың үстүне бетбагтчылык инер, бу эдил чага догурҗак аялың бургусының тутушы кимин болар; олар ондан гачып гутулып билмезлер. 4 Эмма, доганлар, ол гүн үстүңизи дуйдансыз басар ялы, сиз огрулар кимин гараңкылыкда дәлсиңиз. 5 Себәби сизиң хеммәңиз ягтылыгың ве гүндизиң огулларысыңыз. Хава, биз гиҗә-де, гараңкылыга-да дегишли дәлдирис.

6 Шонуң үчин, гелиң, бейлеки адамлар ялы укламалың, гайтам, оя болуп, хемише сагдын пикирленелиң. 7 Себәби уклаян адам гиҗе уклаяндыр, серхош болян адам хем гиҗе серхош боляндыр. 8 Эмма биз гүндизе дегишлидирис. Шонуң үчин, гелиң, хемише сагдын пикирленип, иман совудыны, сөйгини ве гутулыш умыды болан тувалганы геелиң. 9 Себәби Худай бизи җеза бермек үчин дәл-де, Халыпамыз Иса Месих аркалы халас этмек үчин сайландыр. 10 Хава, биз оя болсак-да, өлүм укусына гитсек-де, Иса билен болар ялы, ол бизиң үчин өлендир. 11 Шейлеликде, хәзир эдишиңиз ялы, мундан бейләк-де бир-бириңизи рухландырың*, бирек-биреги беркидиң.

12 Доганлар, араңызда көп зәхмет чекйәнлере ве Халыпамызың ишинде сизе ёлбашчылык эдип, өвүт-үндев берйәнлере хормат гоймагыңызы хайыш эдйәрис. 13 Олара эдйән ишлери үчин чуңңур хормат гоюп, сөйги билдириң. Бир-бириңиз билен парахат яшаң. 14 Доганлар, тертип-дүзгүни бозянлара болса берк дуйдурыш бермегиңизи, гөвнүчөкгүнлере теселли берип, эҗизлери голдамагыңызы ве хеммелере сабырлы болмагыңызы үндейәрис. 15 Сересап болуң, хич киме яманлыга яманлык билен гайтаргы бермәң, гайтам, хемише бир-бириңизе ве әхли адамлара ягшылык этмек үчин җан эдиң.

16 Элмыдама шатланың. 17 Хемише дога эдиң. 18 Әхли зат үчин Худая миннетдар болуң. Себәби Месих Исаның шәгиртлери хөкмүнде Худайың сиз бабатдакы ислеги шудур. 19 Ичиңизде херекет эдйән Худайың рухуны* сөндүрмәң. 20 Пыгамберликлери әсгермезлик этмәң. 21 Әхли зады барлап гөрүң, говы зады аныклап, оңа берк япышың. 22 Эрбетлигиң әхли гөрнүшинден гача дуруң.

23 Гой, парахатлык Худайы сизи мукаддес этсин. Доганлар, Халыпамыз Иса Месих гелйәнчә*, хер ягдайда рухда, яшайышда ве беденде сагдын болуп, айыпсызлыгы саклаң. 24 Сизи чагыран Худай берен сөзүне вепалыдыр, ол айдышы ялы-да эдер.

25 Доганлар, бизиң үчин дога этмегиңизи довам эдиң.

26 Әхли доганлар билен мәхирли* саламлашың.

27 Мен Халыпамызың адындан сизе берк табшырык берйәрин: бу хаты доганларың хеммесине окап бериң.

28 Гой, Халыпамыз Иса Месихиң мерхемети сизиң билен болсун.