1 Тимотеос
6 Худайың адына ве таглыматына хич хачан дил етирилмез ялы, гуллар өз хоҗайынларына чуңңур хормат гойсунлар. 2 Эмма хоҗайынлары имандаш доганлар болса, хормат гоймак хөкман дәлдир өйтмесинлер, гайтам, олара хас ыхласлы хызмат этсинлер. Себәби говы хызмат этмек билен, олар өз имандаш ве сөйгүли доганларына пейда гетирйәрлер.
Бу затлары өвретмеги ве өвүт-үндев бермеги довам эт. 3 Эгер кимдир бири ялан таглыматы өвредип, Халыпамыз Иса Месихиң берен сагдын* гөркезмесини ве Худая вепалы болмагы өвредйән таглыматыны кабул этмесе, 4 онда ол улумсы боландыр, хич зада дүшүнйән дәлдир. Ол субутнамалар билен башагай болуп, сөзлер барада җеделлешйәндир. Булар гөриплик, дава, төхмет* ве адамлара ынанмазчылык дөредйәндир. 5 Олар аңы зәхерленен ве хакыкатдан дашлашан адамлар билен элмыдама уҗыпсыз затларың үстүнде давалашярлар, Худая вепалы болмак газанч гетирйәндир өйдйәрлер. 6 Догрудан-да, барыңа кайыл болуп, Худая вепалы яшамак — улы байлыкдыр. 7 Себәби биз дүнйә иненимизде, хич зат гетирмедик, дүнйәден өтенимизде-де, хич зат әкидип билмерис. 8 Шейлеликде, иймәге, геймәге задымыз ве яшара еримиз бар болса, биз муңа кайылдырыс.
9 Эмма баяҗак болянлар сынага, дузага, көп акылсыз ве эрбет хөвеслериң торуна дүшйәрлер. Бу олары өлүме ве хеләкчилиге элтйәндир. 10 Себәби әхли эрбет затларың көки пул сөйгүсидир. Кәбир адамлар онуң ышкына дүшүп, имандан дашлашдылар ве энчеме хорлуклара сезевар болдулар*.
11 Эмма сен, эй Худайың гуллукчысы, шейле затлардан гач. Худая вепалы, догры, иманлы, сөййән, чыдамлы ве юмшак адам болмага җан эт. 12 Иманың үчин гайдувсыз гөреш алып бар; эбеди яшайша берк япыш, себәби Худай сени бу яшайшы алмага чагырды ве сен оны көп шаятларың өңүнде ыглан этдиң.
13 Мен әхли зада яшайыш берйән Худайың ве Понтиус Пилатуса батыргайлык билен вагыз эден Месих Исаның өңүнде саңа табшырярын. 14 Халыпамыз Иса Месих шөхраты билен гелйәнчә, сенде хич ким кемчилик, язык тапып билмез ялы, бу табшырыгы ерине етир. 15 Шонда багтлы ве еке-тәк Хоҗайын белленен вагтда өзүни аян эдер. Ол патышаларың Патышасы, хөкүмдарларың Хөкүмдарыдыр. 16 Ол өлмейән еке-тәк шахсыетдир ве хич кимиң гөрмедик хем гөрүп билмеҗек ягтылыгында яшаяндыр. Хормат ве эбеди гүйч онуңкы болсун. Омын.
17 Шу дүнйәдәки* байлара текепбир* болмазлыгы, алдавчы байлыга дәл-де, яшайышдан леззет алмагымыз үчин әхли зады җомартлык билен берйән Худая бил багламакларыны табшыр. 18 Олары көп ягшы ишлери этмәге*, җомарт болмага ве задыны пайлашмага хөвеслендир. 19 Өзлери үчин гелеҗеге говы эсас болҗак хазына топласынлар, шонда олар хакыкы яшайша берк япышып билерлер.
20 Эй Тимотеос, өзүңе ынанылан затлары гайым сакла. Мукаддес зада дил етирйән бош сөзлерден ве өзлерини билимли хасаплаян адамларың таглыматындан гача дур, себәби оларың «билими» өз-өзүне гапма-гаршы гелйәндир. 21 Кәбирлери шейле билиминиң бардыгына буйсанып, имандан азашдылар.
Гой, Худайың мерхемети сениң билен болсун.