1 Тимотеос
1 Месих Исаның ресулы болан мен Павлус, Халасгәр Худайымызың ве умыдымыз болан Месих Исаның табшырыгы билен 2 иман ёлундакы акйүрекли оглум Тимотеоса* хат язярын:
Ата Худайымыздан ве Халыпамыз Месих Исадан саңа мерхемет, рехимдарлык хем парахатлык болсун.
3 Мен Македония гитҗек болуп дуркам, саңа Эфесде галмалыдыгыңы айдышым ялы, ялан таглыматлары өвредйән кәбир адамлара табшырык бермегиң үчин хәзирем шол ерде галмагыңы үндейәрин. 4 Олара ялан хекаялардан ве несил шеҗерелерден үнсүни совмагы үнде. Себәби шейле затларың хич зада пейдасы ёкдур, олар диңе герекмеҗек сораглары дөредйәндир ве Худайың иманымызы беркитмек үчин берйән затларына дегишли дәлдир. 5 Аслында, бу гөркезме* бизиң ак йүрекден, пәк ынсап ве хилесиз иман билен сөймегимиз үчин берлендир. 6 Кәбирлери шу затлардан йүз өврүп, манысыз гүррүңлере баш гошдулар. 7 Олар Худайың кануныны өвредйән мугаллымлар болмак ислейәрлер. Йөне олар не айдянларына, не-де ынамлы тассыклаян затларына дүшүнйәрлер.
8 Эгер Канун догры* уланылса, онуң говудыгыны билйәрис. 9 Шейле-де кануның догры адамлар үчин дәл-де, канунсызлар, питнечилер, худайсызлар, гүнәкәрлер, бивепалар, мукаддес затлардан йүз өвүрйәнлер, ганхорлар, хатда ата-энесини өлдүрйәнлер, 10 ахлаксызлык* эдйәнлер, бечебазлар*, адам огурлаянлар, яланчылар, ялан шаятлар* ве сагдын* таглымата гаршы чыкян затлар билен мешгулланянлар үчин берлендигине дүшүнйәрис. 11 Бу сагдын таглымат багтлы Худайың шөхратлы хош хабарына эсасланяндыр. Худай оны маңа-да ынаныпды.
12 Маңа гүйч берен Халыпамыз Месих Иса миннетдардырын. Себәби ол мени вепалы хасаплап, мукаддес иши табшырды. 13 Мен өң Худая дил етирип, халкыны ызарлаярдым ве барыпятан гөдек адамдым. Муңа гарамаздан, маңа рехим эдилди, себәби мен олары билмән эдипдим ве имансыздым. 14 Эмма Худай маңа мерхеметини боллук билен берип, имана ве Месих Исаның сөйгүсине эе болмага көмек этди. 15 Шу айдянларым хак ве ынама мынасыпдыр: Месих Иса гүнәкәрлери халас этмек үчин дүнйә гелди. Гүнәкәрлериң арасында иң эрбеди болса мендирин. 16 Оларың иң эрбеди болсам-да, Месих Иса маңа рехим эдип, җуда сабырлылык билдирди. Шейдип, ол эбеди яшайша говушмак үчин иман этҗеклере мени мысал этди.
17 Гой, хемише яшаян* эбеди Патыша*, гөрүнмез, еке-тәк Худая бакы ве эбеди хормат хем-де шөхрат болсун. Омын.
18 Оглум Тимотеос, сен барада айдылан пыгамберликлере гөрә мен шу затлары* саңа табшырярын. Ол саңа гайдувсыз сөвеши алып бармага көмек эдер. 19 Шейле-де иманыңы, пәк ынсабыңы гайым сакла, себәби кәбирлери ондан йүз өвүрдилер. Нетиҗеде, оларың иманы хеләкчилиге учран гәми кимин вейран болды. 20 Оларың арасында Именей билен Исгендер хем бар. Берлен темми аркалы Худая дил етирмезлиги өвренмеклери үчин, мен олары Шейтана табшырдым*.