1 Тимотеос

2 Шоңа гөрә-де, илки билен, әхли адамлар, шол санда патышалар, ёкары везипәни эелейәнлер үчин Худая ялбармагыңызы, дога ве хайыш этмегиңизи хем-де миннетдарлык билдирмегиңизи үндейәрин. 2 Бу бизе мундан бейләк-де парахат ве асуда яшамага, Худая вепалы болуп, әхли зады ыхласлы* ерине етирмәге көмек эдер. 3 Себәби Халасгәр Худайымызың өңүнде шейле затлар говудыр ве оңа яраяндыр. 4 Ол әхли адамларың халас болмагыны ве хакыкат барада догры билим алмагыны ислейәндир. 5 Себәби Худай бирдир. Худай билен адамларың арасында дурян еке-тәк төвеллачы бардыр. Ол хем ынсан болан Месих Исадыр. 6 Ол өзүни әхли адамлар үчин төлег* хөкмүнде гурбан берди. Бу хакда Худайың халкы өз вагтында шаятлык эдер. 7 Шол себәпли мен башга халклара иман ве хакыкат барада өвретмек үчин вагызчы хем-де ресул эдип беллендим. Мен догрымы айдярын, ялан сөзлемейәрин.

8 Шонуң үчин мен сизиң йыгнанышян ерлериңизде эркек адамларың гахарланман, давалашман эллерини мукаддеслик билен гөтерип, дога этмегини ислейәрин. 9 Шонуң ялы-да гелин-гызлар өзлерини сач өрүмлери, алтындыр күмүшлер*, гымматбаха эшиклер билен дәл-де, ярашыклы, салыкатлы* эгин-эшик ве сагдын дүшүнҗе билен безесинлер. 10 Оларың өзлерини Худая вепалы гелин-гызлара ярашян ягшы ишлери билен беземеклерини ислейәрин.

11 Аял-гызлар долы табынлыкда болуп, үмсүм* өвренсинлер. 12 Мен аялың өвретмегине я-да эркек адамың үстүнден агалык этмегине ругсат бермейәрин, гайтам, ол үмсүм* болсун. 13 Себәби илки Адам ата, соңра Хов эне ярадылды. 14 Шейле-де Иблис Адам атаны дәл-де, аялы алдады, аял хем Худайың табшырыгыны бозды. 15 Эмма аял* иман этсе, сөйсе ве сагдын дүшүнҗе билен мукаддесликде гезсе, чага догурмак билен халас болар*.