1 Яхя
5 Исаның Месихдигине ынанян адам Худайың чагасыдыр. Худайы сөййән адам онуң чагаларыны хем сөййәндир. 2 Биз Худайы сөйсек ве онуң табшырыкларыны берҗай этсек, Худайың чагаларыны сөйдүгимиз болар. 3 Биз Худайы сөййәндигимизи онуң табшырыкларыны берҗай эдип гөркезйәрис, онуң табшырыклары болса агыр дәлдир. 4 Себәби Худайың чагалары дүнйәни еңйәндир. Биз бу дүнйәни иман билен еңендирис.
5 Бу дүнйәни ким еңип билер? Эйсем, Исаның Худайың Оглудыгына ынанян адам дәлми нәме? 6 Иса Месих сув ве ган аркалы гелендир. Хава, ол диңе сув билен дәл-де, сув ве ган аркалы гелендир. Рух болса муңа шаятлык эдйәндир, себәби рухуң шаятлыгы хакыкатдыр. 7 Исаның кимдигини аян эдйән үч шаят бардыр. 8 Олар: рух, сув ве ган. Буларың үчүсиниң хем шаятлыгы бирдир.
9 Эгер биз адамларың шаятлыгыны кабул эдйән болсак, онда Худайың шаятлыгы хас гүйчли дәлми нәме?! Себәби Худайың хут өзи Оглы хакда шаятлык этди. 10 Худайың Оглуна иман эдйән адам Худайың шаятлыгыны йүрегинде саклаяндыр. Худая иман этмейән адам Оны яланчы эдйәндир. Себәби шейле адам Худайың Оглы хакда эден шаятлыгына иман этмейәр. 11 Худайың шаятлыгы шудур: ол бизе эбеди яшайшы берди. Биз бу яшайшы онуң Оглы аркалы алярыс. 12 Огул билен бирликде болан адам эбеди яшайша говшар; Худайың Оглы билен бирликде болмадык адам эбеди яшайша говушмаз.
13 Мен бу затлары сизе, ягны Худайың Оглуның адына иман эдйәнлере язярын. Себәби сизиң эбеди яшайша говшуп билйәндигиңизе дүшүнмегиңизи ислейәрин. 14 Биз Худайың ислегине гөрә хер нәме дилесек-де, онуң бизи эшидйәндигине долы ынанярыс. 15 Эгер ол дилән задымызы эшидйән болса, онда оны алҗакдыгымызы хем билйәрис, себәби биз Худайдан сораярыс ахырын.
16 Кимдир бири доганының өлүме элтмейән гүнә эдйәндигини гөрсе, онуң үчин Худая дога этмели. Эгер ол өлүме элтмейән гүнә эден болса, Худай оңа яшайыш берер. Себәби өлүме элтйән гүнә хем бардыр. Йөне мен шейле гүнә эдйән адам үчин дилег этмелидигини айтмаярын. 17 Нәдогры ишлериң әхлиси гүнәдир, эмма өлүме элтмейән гүнә-де бардыр.
18 Биз Худайың чагасының гүнә этмейәндигини билйәрис, себәби Худайың Оглы оңа назар саляндыр ве Залым оңа якынлашып билмейәр. 19 Биз өзүмизиң Худайдандыгымызы, бүтин дүнйәниң болса Шейтаның* голы астындадыгыны билйәрис. 20 Эмма биз Худайың Оглуның гелендигини хем билйәрис ве ол бизе хак Худай барада билим алмагымыз үчин дүшгүрлик берди. Биз хак Худайың Оглы Иса Месих аркалы Онуң билен бирликдедирис. Хава, ол хак Худайдыр ве эбеди яшайшың гөзбашыдыр. 21 Балаларым, өзүңизи бутлардан гораң.