22 Wanɛ tshɛ wakasɔnama oko alami w’asoko waki 212. Vɔ waki lo ahole awɔ lo ndjela ofundjelo wa nkombo,+ lo ndjela ɛlɔndji awɔ. Davidɛ nde la Samuɛlɛ laki ɔmɛnyi w’akambo woshɛmi+ mbakasɔnɛ anto asɔ lo ɛkɛndɛ washawɔ anto wɛkɛwɔ otema. 23 Vɔ l’anawɔ w’apami waki la ɔkɛndɛ w’olimu wa djamu y’asoko wa luudu la Jehowa,+ luudu la dipɛma. 24 Alami w’asoko waki lo wedi akɔ 4, mbuta ate lo ɛstɛ, owɛstɛ, lo nɔrdɛ ndo lo sidɛ.+ 25 Tena la tena, anangɛwɔ wakayaka oma l’ahole awɔ l’edja ka nshi 7 dia ndjokamba kaamɛ la wɔ. 26 Ewandji 4 w’alami w’asoko waki la ɔkɛndɛ l’olimu washawɔ anto wɛkɛwɔ otema. Vɔ waki ase Lɛwi ndo waki la ɔkɛndɛ wa nama mvudu* ndo waombelo wa lo luudu la Nzambi ka mɛtɛ.+ 27 Vɔ waketshaka otsho w’otondo lo ahole awɔ l’otshimbedi w’otondo wa luudu la Nzambi ka mɛtɛ, nɛ dia vɔ wakakambaka olimu wa djamu ndo waki la ɔkɛndɛ wa nama nsapi ndo wakadiholaka luudu pindju tshɛ.