8 “Ndo wɛ pombaka mbutɛ anto anɛ ɔnɛ: ‘Jehowa kata ate: “Dimi lambokitsha la ntondo kanyu mboka ka lɔsɛnɔ ndo mboka ka nyɔi. 9 Wanɛ wayotshikala lo osomba ɔnɛ wayovɔ la lokuwa la ta, la ndjala ka kasha ndo la elando. Koko onto tshɛ layotshɔ l’andja ndo layoyakimɔ le ase Kaladiya wonyodingi, ayotetemala nsɛna ndo nde ayokondja lɔsɛnɔ* lande oko ɛngɔ ka dimbo.”’*+

10 “‘“Nɛ dia dimi lambɛdiya elungi kami le osomba ɔnɛ dia mpokoso koko aha lo dimɛna,”+ mbata Jehowa. “Vɔ wayokimɔma lo anya wa nkumekanga ka Babilɔna,+ ko nde ayowotshumba la dja.”+