Amɔsɛ
4 “Nyohokame dui nɛ, nyu ngɔmbɛ ya la Bashana,
Yele lo dikona dia Samariya,+
Nyu wamato wakesa tombolambola+ ndo waminola ase wola,
Watɛ waomɛwɔ* ɔnɛ: ‘Nyotela yangɔ ya nnɔ!’
2 Nkum’Olongo Nkumadiɔndjɔ Jehowa ambotshiba lo ekila kande ate:
‘“Eenda, nshi yekɔ lo ndjaye le nyu etena kayondonyodiya la tɔkɔhɔ takɔhɛwɔ nyama
Ndo anto anyu akina la tɔɔdi.
3 Nyu nyayotomba lo wesho wa lo ehele, onto l’onto nsembɔ tɔɔ;
Ndo nyayokashema la Haramɔna,” mbata Jehowa.’
5 Nyotshumbe elambo wa eokelo ka losaka wa mapa+ wa la wodoya;
Nyewoya la dui dia wolo elambo anyu wa la lolango!
Nɛ dia kɛsɔ mbalanganyu nsala, nyu ase Isariyɛlɛ,’ mbata Nkum’Olongo Nkumadiɔndjɔ Jehowa.
6 ‘Ndo lo wedi ami, dimi lakɛdia wanyu anyu aha la mbo ya ndɛ* lo esomba anyu tshɛ
Ndo lakasale dia mapa nshila lo mvudu+ yanyu tshɛ;
Koko nyu kokalola le mi,’+ mbata Jehowa.
7 ‘Ndo nto, dimi lakanyodime mvula l’edja ka ngɔndɔ 3 la ntondo ka dinela;+
Dimi lakakilɔsha l’osomba ɔmɔtshi, koko aha l’osomba okina.
Mvula kakalɔ lo ɛtshi ka nkɛtɛ kɛmɔtshi,
Koko ɛtshi ka nkɛtɛ kekina kaki ofumbo.
8 Anto wa lo esomba 2 kana 3 wakatshu lo osomba 1 dia tɔnɔ ashi,+
Ko vɔ komondoya mposa;
Koko nyu kokalola oya le mi,’+ mbata Jehowa.
9 ‘Dimi lakanyotomɛ tanyi ta wolo ndo mombolenge.+
Nyu nyakafudia tojardɛ tanyu ndo dikambɔ dia vinyɔ,
Koko akata w’ɛndjɔ wakale esongo anyu wa fingo ndo esongo w’ɔlivɛ;+
Ndo nyu kokalola le mi,’+ mbata Jehowa.
10 ‘Dimi lakatome olando l’atei anyu oko wa l’Edjibito.+
Dimi lakadiake ɛlɔngɔ anyu w’apami+ la lokuwa la ta ndo lakande mfalasa+ yanyu.
Dimi lakasale dia nsolo ka lo mpango yanyu mbidɛ l’ɛhɛmbɛ+ anyu;
Koko nyu kokalola le mi,’ mbata Jehowa.
11 ‘Dimi lakanyɔkɔsha
Oko wakakɔsha Nzambi Sɔdɔma la Ngɔmɔra.+
Ndo nyu nyaki oko efuki ka dja kakawafumbola oma lo dja.
Koko nyu kokalola le mi,’+ mbata Jehowa.
12 Ɔnkɔnɛ, kɛsɔ mbayomokosalɛ, wɛ Isariyɛlɛ.
Lam’ele kɛsɔ mbayomokosalɛ,
Isariyɛlɛ le, yalɔngɔsɔla dia mpomana la Nzambi kayɛ.