Ɛnyɛlɔ
19 L’ɔkɔngɔ wa laasɔ, dimi lakoke kɛnɛ kaki oko dui dia wolo di’olui wa woke w’anto l’olongo. Vɔ wakataka vate: “Nyotombole Jah!*+ Panda ndo lotombo ndo wolo wekɔ le Nzambi kaso, 2 nɛ dia dombo diande diekɔ mɛtɛ ndo losembwe.+ Dikambo nde ambosha womoto la numba ka lokolokolo dilanya, ɔnɛ lakalanya nkɛtɛ k’otondo l’awui ande wa mindo wa dieyanelo* ndo nde ambɔsɔmbɔya dikila di’ekambi ande diele l’anya ande.”*+ 3 Ko aha la ntshimbatshimba vɔ wakate mbala ka 2 vate: “Nyotombole Jah!*+ Ndo dinga di’olongwelo ande diekɔ lo mbidɛ pondjo pondjo.”+
4 Ko dikumanyi+ 24 la ditongami 4 diasɛna+ wakakusama ndo wakatɛmɔla Nzambi, ɔnɛ lodjashi lo kiti ka lowandji, wata vate: “Aamɛɛ! Nyotombole Jah!”*+
5 Ndo nto, dui diakaye oma lo kiti ka lowandji diata ɔnɛ: “Nyu ekambi ande+ tshɛ wawoka wɔma, wa totshitshɛ ndo wa weke,+ nyotombole Nzambi kaso.”
6 Ko dimi lakoke londjo lele oko awui w’olui w’anto ndo oko londjo l’ahelela w’ashi efula ndo oko londjo l’akungola wa wolo. Vɔ wakataka vate: “Nyotombole Jah,*+ nɛ dia Jehowa* Nzambi kaso, Kanga-Wolo-Tshɛ+ aya nkumekanga.+ 7 Nyɛsɔ tɔngɛnɛngɛnɛ ndo toleke monga l’ɔngɛnɔngɛnɔ ndo tootombole, nɛ dia wonya wa diwala dia Ɔna Ɔkɔkɔ wambokoka ndo wadɛnde amboyalɔngɔsɔla. 8 Eelo, wakawosha lotshungɔ la nde ndɔta dihɔndɔ dia linɛnɛ la dimɛna, dia ngaingai ndo dia pudipudi, nɛ dia dihɔndɔ dia linɛnɛ la dimɛna sɔ diekɔ didjidji di’etsha w’ɛlɔlɔ w’ekilami.”+
9 Ko nde akambutɛ ate: “Funda wate: Ɔngɛnɔngɛnɔ le wanɛ wakelamɛ lo dambo dia dikɔlɔ dia diwala dia Ɔna Ɔkɔkɔ.”+ Nde akambutɛ nto ate: “Ɛtɛkɛta ɛsɔ wekɔ awui wa mɛtɛ waki Nzambi.” 10 Ko dimi lakakusama l’ekolo ande dia mbɔtɛmɔla. Koko nde akambutɛ ate: “Eenda! Tosalake ngango,+ dimi lekɔ tsho osekayɛ okambi ndo ɔmɔtshi l’atei w’ananyɔ wakamba olimu wa nsambisha dikambo dia Yeso.+ Tɛmɔla Nzambi!+ Nɛ dia l’oyango wa nsambisha akambo wendana la Yeso mbakasambiyama prɔfɛsiya.”+
11 Dimi lakɛnyi olongo wambodihɔ ndo mfalasa ka wɛma.+ Ɔnɛ lakakiahema lokombo lande Kanga kɔlamelo+ ndo Mɛtɛ,+ ndo nde nomboshaka ndo ndɔshaka ata la losembwe.+ 12 Washo ande waki oko loombe la dja+ ndo diadɛmɛ* efula yaki l’ɔtɛ ande. Nde aki la lokombo lɔmɔtshi lakafundama lele ndooko onto lalieya paka ndamɛ, 13 ndo nde akalɔtɛ dihɔndɔ diakasana* la dikila ndo lokombo lande ko Dui*+ dia Nzambi. 14 Ndo nto, alembe wa l’olongo wakayawoyelaka la mfalasa ya wɛma ndo vɔ wakalɔtɛ ahɔndɔ wa linɛnɛ la dimɛna, wa wɛma ndo wa pudipudi. 15 Ndo lokuwa l’otale la ta la mpɛmɔ+ lakayatombaka oma l’onyɔ ande dia nde nkɔta wedja, ndo nde ayowalama la okalemba wa lowolo.+ Ndo nto, nde akahɔtshahɔtsha diamula dia odudu wa nkɛlɛ ka Nzambi Kanga-Wolo-Tshɛ.+ 16 Lo dihɔndɔ diande dia laadiko, eelo, lo ɛhɛlɔhɛlɔ kande, nde ekɔ la lokombo lofundami ɔnɛ: Nkumekanga ka nkumi ya dikanga ndo Nkumi ka waa nkumi.+
17 Dimi lakɛnyi nto ondjelo ɔmɔtshi emadi lo wonya, ko nde akawelɛ la dui dia wolo ndo akatɛ tofudu tshɛ tafumbɔ l’olongo* ate: “Nyoye, nyotshumane kaamɛ lo dambo dia woke dia dikɔlɔ diaki Nzambi,+ 18 dia nyu ndɛ emunyi wa nkumi ya dikanga, emunyi w’ewandji w’asɔlayi, emunyi w’akanga wa wolo,+ emunyi wa mfalasa ndo wanɛ woyahemi,+ emunyi w’anto tshɛ, oyadi anto wele la lotshungɔ kana mfumbe ndo emunyi w’anto w’anyanya ndo w’anto wa lokumu.”
19 Ko dimi lakɛnyi nyama ka ngala la nkumi ya dikanga ya la nkɛtɛ ndo alembe awɔ wosanganyi dia ndɔsha ɔnɛ lahemi laadiko dia mfalasa ndo alembe ande.+ 20 Ko nyama ka ngala kakandama kaamɛ ndo omvutshi wa kashi+ wakasalaka tolembetelo la ntondo katɔ. Oma lo tolembetelo tɔsɔ mbakandanganyiya wanɛ waki la djembetelo ya nyama ka ngala+ ndo wanɛ wakatɛmɔla efanelo katɔ.+ Etena kakiwɔ weke la lɔsɛnɔ, vɔ akɔ 2 wakakashema lo oduwa wa dja yahɛta la mbɔkɔ ya dja.+ 21 Koko, wanɛ wakatshikala wakadiakema la lokuwa la ta l’otale lakayatombaka oma l’onyɔ wa ɔnɛ lahemi laadiko dia mfalasa.+ Ko tofudu tshɛ takalote emunyi awɔ.+