Jɛrɛmiya
40 Ɔtɛkɛta wakaye le Jɛrɛmiya oma le Jehowa l’ɔkɔngɔ wa Nɛbuzaradana+ owandji w’alami mbotshungola oma la Rama.+ Nde akawɔshi oma lɛkɔ okelekami mɔlɔla ndo nde aki l’atei w’ase Jɛrusalɛma l’ase Juda tshɛ wakawatɔlɛ lo lɔhɔmbɔ la Babilɔna. 2 Ko owandji w’alami akɔshi Jɛrɛmiya ndo akawotɛ ate: “Jehowa Nzambi kayɛ akewoya mpokoso kɛnɛ dikambo di’osomba ɔnɛ, 3 ndo Jehowa akakiela paka oko wakandate, nɛ dia nyu nyakasalɛ Jehowa pɛkato ndo nyu kokitanyiya dui diande. Diakɔ diakanyokomɛ dui nɛ.+ 4 Kakianɛ, dimi lambokotshungola ɛlɔ oma lo mɔlɔla waki lo anya ayɛ. Naka wɛ mɛnaka dimɛna dia ntshɔ kaamɛ la mi la Babilɔna, kete yaka, ndo dimi layokolama. Koko naka wɛ halange ntshɔ la mi otsha la Babilɔna, kete toyake. Eenda, wodja w’otondo wekɔ la ntondo kayɛ. Tshɔka lɛnɛ tshɛ ayoyɔsɔna.”+
5 Lam’ele laasɔ ko Jɛrɛmiya atakalola, Nɛbuzaradana akawotɛ ate: “Kalola le Ngedaliya+ ɔna Ahikama+ ɔna Shafana,+ ɔnɛ lele nkumekanga ka Babilɔna akɔɔsɔnɛ dia nɔmbɔla esomba wa Juda, kele todjasɛ la nde l’atei w’anto; kana tshɔka lɛnɛ tshɛ ayoyɔsɔna.”
Ko owandji w’alami akawosha mbo ya ndɛ ndo woshasha ko akootshike dia nde ntshɔ. 6 Ko Jɛrɛmiya akatshu otsha le Ngedaliya ɔna Ahikama la Mizipa+ ko akatodjasɛ la nde l’atei w’anto wakatshikala lo wodja.
7 Oma laasɔ, ewandji tshɛ w’asɔlayi, wanɛ waki lo oswe l’anto awɔ wakoke dia nkumekanga ka Babilɔna ambɔsɔna Ngedaliya ɔna Ahikama dia monga laadiko dia wodja ndo ɔnɛ nde ambɔɔsɔna dia monga laadiko dia apami, wamato ndo ana w’akɛnda oma l’atei w’ase wola wa lo wodja wakiwɔ kɔtɔla la Babilɔna.+ 8 Ko vɔ wakaye oya le Ngedaliya la Mizipa.+ Anto akɔ ko, Ishimaɛlɛ+ ɔna Netaniya, Johanana+ ndo Jɔnatana ana wa Karea, Seraya ɔna Tanumɛta, ana wa Efai ose Netɔfa, ndo Jezaniya+ ɔna ose Maakata, kaamɛ l’anto awɔ. 9 Ngedaliya ɔna Ahikama ɔna Shafana akaatshibɛ vɔ l’anto awɔ ate: “Tanyokake wɔma dia kambɛ ase Kaladiya. Nyodjasɛ lo wodja ndo nyokambee nkumekanga ka Babilɔna, ko akambo wayeta dimɛna le nyu.+ 10 Koko dimi layotshikala la Mizipa dia monga onyimpala anyu le* ase Kaladiya wayaye oya le so. Koko nyu pombaka ntshumanya wanu, elowa wa lo nshi y’ɔwɔ la esɔ ko mbidja lo diangɔ dianyu dia eombelo ndo mbidjasɛ lo esomba wakanyɔshi.”+
11 Ase Juda tshɛ waki la Mɔaba, la Amɔna ndo la Ɛdɔmɛ, mbidja ndo wanɛ waki lo wedja ekina tshɛ, vɔ la wɔ wakoke dia nkumekanga ka Babilɔna akatshike atshikadi amɔtshi la Juda ndo ɔnɛ nde akasɔnɛ Ngedaliya ɔna Ahikama ɔna Shafana dia monga owandji awɔ. 12 Ko ase Juda tshɛ wakatatɛ nkalola oma lo ahole tshɛ wakawadianganyema, ndo vɔ wakaye lo wodja wa Juda le Ngedaliya la Mizipa. Vɔ wakatshumanya wanu ndo elowa wa lo nshi y’ɔwɔ lo yɛdikɔ y’efula.
13 Johanana ɔna Karea nde la ewandji tshɛ w’asɔlayi wanɛ waki l’oswe wakaye le Ngedaliya la Mizipa. 14 Vɔ wakawotɛ vate: “Onde wɛ heye dia Baalisi nkumekanga k’ase Amɔna+ akatome Ishimaɛlɛ ɔna Netaniya dia ndjokodiaka?”*+ Koko Ngedaliya ɔna Ahikama kombaetawɔ.
15 Ko Johanana ɔna Karea akatɛ Ngedaliya lo woshɛshɛ la Mizipa ate: “Dimi layanga ntshɔ dia todiaka Ishimaɛlɛ ɔna Netaniya ndo ndooko onto layeya dui sɔ. Lande na kahombande kodiaka,* ndo lande na kahomba ase Juda tshɛ wanɛ wakatshumana le yɛ pandjɔma ndo atshikadi w’ase Juda ndjakema?” 16 Koko Ngedaliya+ ɔna Ahikama akatɛ Johanana ɔna Karea ate: “Tosalake dui sɔ, nɛ dia kɛnɛ katayɛ lo dikambo dia Ishimaɛlɛ kekɔ kashi.”