2 Samuɛlɛ
23 Ɛtɛkɛta w’ekomelo waki Davidɛ ɛnɛ:+
“Ɔtɛkɛta wa Davidɛ ɔna Jɛse,+
Ndo ɔtɛkɛta wa pami kakadiyama lo dihole dia laadiko,+
Okitami+ wa Nzambi ka Jakɔbɔ,
3 Nzambi k’Isariyɛlɛ akatɛkɛta;
Dive dia Isariyɛlɛ+ akambutɛ ate:
‘Etena katolɛka onto anto akina la losembwe,+
Alɔmbɔla la wɔma wa Nzambi,+
4 Ekɔ oko osase wa pindju lam’awalɛ yanyi,+
Pindju kaha la wange.
Ekɔ oko osase wa l’ɔkɔngɔ wa mvula,
Watotondjaka adiyo oma lo nkɛtɛ.’+
5 Shi luudu lami lekɔ oko lɔnɛ lele la ntondo ka Nzambi?
Nɛ dia nde akadje la mi+ sheke ya pondjo,
Yokongɛmi dimɛna lo akambo tshɛ ndo lo yoho ya shikaa.
Nɛ dia yɔ nembetshiyaka panda kami ka tshɛ lo tshɛ ndo ɔngɛnɔngɛnɔ ami tshɛ,
Shi diakɔ diatondosalaka dia lɔ ngɔna?+
6 Koko apami w’anyanya tshɛ wambokashema+ oko akombokombo w’atɛndɛ,
Nɛ dia vɔ hawokoke mbɔsama la anya.
7 Dia onto mbananda,
Nde pombaka monga la dihomɔ dia mbolo ndo wenyi wa dikɔnga,
Ndo vɔ wayotshumbama tshɛ lo tshɛ la dja lo dihole diawɔ.”
8 Nkombo y’andɔshi wa ta wa wolo+ waki Davidɛ yɔ nyɛ: Jɔshɛba-Basishɛbɛtɛ ose Takɛmɔni, owandji w’andɔshi wa ta wa wolo 3.+ Nde akoke dikɔnga diande, ko akadiake anto 800 mbala ɔtɔi. 9 Oma lalende ko Eleazara+ ɔna Dodo+ ɔna Ahɔhi aki l’atei w’andɔshi wa ta wa wolo 3 waki kaamɛ la Davidɛ etena kakawasole ase Filistiya. Vɔ wakasangana lɛkɔ dia ndɔ ta ndo lam’akakalola apami w’ase Isariyɛlɛ ɛkɔngɔkɔngɔ, 10 nde akemala ndo akadiake ase Filistiya polo lam’akɔlɛ lonya lande, koko lonya lande kokimɔ lokuwa la ta.+ Ɔnkɔnɛ Jehowa akadje otshumba* wa woke lushi lɔsɔ,+ ko anto wakakalola l’ɔkɔngɔ ande dia mbɔsa diangɔ dia dimbo diaki edo.
11 Oma lalende ko Shama ɔna Ange ose Hararɛ. Ase Filistiya wakasangana la Lehi lɛnɛ aki ekambɔ kakalole tɔɔ la nkɔndɛ ya totshitshɛ. Ko anto wakalawɔ l’ɔtɛ w’ase Filistiya. 12 Koko nde akemala l’atei w’ekambɔ kakɔ, akakikokɛ ndo akatetemala ndjaka ase Filistiya, ko Jehowa akadje otshumba* wa woke.+
13 Anto 3 l’atei w’ewandji 30 wakaholɔ otsha le Davidɛ lo wooko wa Adulama+ lo nshi ya dinela, ko olui* w’ase Filistiya wakake mpango kawɔ lo Okidi* wa Rɛfayima.+ 14 L’etena kɛsɔ, Davidɛ aki lo longele+ ndo alami wa mpango k’ase Filistiya waki la Bɛtɛlɛhɛma. 15 Ko Davidɛ akakɛnɛmɔla nsaki kaki la nde ate: “Otomonga l’akoka wa nnɔ yema y’ashi wele lo difuku di’ashi diele suke la soko dia Bɛtɛlɛhɛma lee!” 16 Ko andɔshi wa ta wa wolo 3 wakete lo mpango k’ase Filistiya la wolo, wakatotahola ashi lo difuku di’ashi diele suke la soko dia Bɛtɛlɛhɛma, ko wakela le Davidɛ; koko nde akatone mbanɔ ndo akawatsholɛ Jehowa.+ 17 Nde akate ate: “Jehowa le, dimi bu la kanyi ya nsala dui dia nganɛ! Onde dimi pombaka nnɔ dikila+ di’apami wakatshwe todja nsɛnɔ* yawɔ lo waale?” Ko nde akatone mbanɔ. Akambo asɔ mbakasale andɔshi ande wa ta wa wolo 3.
18 Abishai+ ɔnango Jɔaba ɔna Zeruya+ aki owandji w’andɔshi wa ta wa wolo akina 3. Nde akoke dikɔnga diande, ko akadiake anto 300 ndo nde aki la lokumu lele oko la andɔshi wa ta wa wolo akɔ 3.+ 19 Kaanga mbakandaleke akina 3 ndo mbakinde owandji awɔ, nde kokoma l’ɔnɔngɔ w’andɔshi wa ta wa wolo 3 wa ntondo.
20 Bɛnaya+ ɔna Jɛhɔyada aki pami ka dihonga* kakasale akambo efula wa diambo la Kabizɛlɛ.+ Nde akadiake ana w’apami 2 wa Ariyɛlɛ wa la Mɔaba, ko nde akaholɔ lo difuku di’ashi lushi laki loonge l’ekama, ko akadiake ntambwɛ.+ 21 Nde akadiake ndo pami kɛmɔtshi k’ose Edjibito ka dikongote dia mamba. Kaanga mbaki ose Edjibito akɔ la dikɔnga lo lonya lande, nde akatshu la okalemba dia tɔɔlɔsha ndo akahɔtɔla ose Edjibito akɔ dikɔnga diaki lo lonya lande, ko akoodiake la dikɔnga diande hita. 22 Akambo asɔ mbakasale Bɛnaya ɔna Jɛhɔyada, ndo nde aki la lokumu lele oko la andɔshi wa ta wa wolo 3. 23 Kaanga mbakandaleke apami akina 30, nde kokoma l’ɔnɔngɔ w’andɔshi wa ta wa wolo 3. Koko Davidɛ akɔɔsɔnɛ owandji w’alami ande.
24 Asahɛlɛ+ ɔnango Jɔaba aki l’atei w’apami 30 anɛ: Elehanana ɔna Dodo ose Bɛtɛlɛhɛma,+ 25 Shama ose Harɔdɛ, Elika ose Harɔdɛ, 26 Helɛzɛ+ ose Palati, Ira+ ɔna Ikɛshɛ ose Tekoa, 27 Abiɛzɛrɛ+ ose Anatɔta,+ Mebunai ose Husha, 28 Zalamɔna ose Ahɔhi, Maharai+ ose Netɔfa, 29 Hɛlɛbɛ ɔna Baanahɛ ose Netɔfa, Itayi ɔna Ribai ose Ngibɛa k’aseka Bɛnjamina, 30 Bɛnaya+ ose Piratɔna, Hidai wa l’okidi w’ashi* wa Ngashɛ,+ 31 Abi-Alabɔna ose Arba, Azɛmavɛta ose Bahurima, 32 Eliyaba ose Shalabɔna, ana w’apami wa Jashɛnɛ, Jɔnatana, 33 Shama ose Hararɛ, Ahiyamɛ ɔna Sharara ose Hararɛ, 34 Elifɛlɛtɛ ɔna Ahasbai ɔna ose Maakata, Eliyamɛ ɔna Ahitɔfɛlɛ+ ose Ngilɔ, 35 Heziro ose Karamɛlɛ, Paarai ose Arba, 36 Ingala ɔna Natana ka la Zoba, Bani ose Ngada, 37 Zɛlɛkɛ ose Amɔna, Naharai ose Berɔtɛ, ɔmɛmbi wa dihomɔ dia ta diaki Jɔaba ɔna Zeruya, 38 Ira ose Itiri, Ngarɛba ose Itiri,+ 39 ndo Uriya+ ose Hiti, tshɛ tshɛ 37.