Etsha

7 Koko ɔlɔmbɛdi a laadiko akawombola ate: “Onde ngasɔ mbediɔ?” 2 Stɛfano akakadimola ate: “Analengo ndo waa papa le, nyohokame. Nzambi ka lotombo akɛnama le tshɛso Abrahama etena kakinde la Mezɔpɔtamiya la ntondo ka nde todjasɛ la Harana,+ 3 ndo nde akawotɛ ate: ‘Onɛɛ oma lo wodja anyu, oma lale ewotɔ ayɛ kele tshɔka lo wodja wayomokɛnya.’+ 4 Ko nde akamɔ oma lo wodja w’ase Kaladiya ko akatodjasɛ la Harana. Ndo l’ɔkɔngɔ wa nyɔi ka she,+ Nzambi akawonya oma lɛkɔ, ko nde akaye lo wodja wodjashinyu ɛlɔ kɛnɛ.+ 5 Nde kombosha ndooko sango lanɛ, kaanga yɛtshi ya nkɛtɛ ya nde nkitsha dikaka diande, koko nde akalake dia mbosha nkɛtɛ yakɔ nde la tokanula* tande,+ kaanga mbakinde atote ndooko ɔna. 6 Ndo nto, Nzambi akawotɛ dia tokanula* tande wayonga angɛndangɛnda lo wodja waha wawɔ ndo anto wayowaetɛ mfumbe ndo wayowasoya* l’edja k’ɛnɔnyi 400.+ 7 Nzambi akate ate: ‘Dimi layolombosha+ wodja ɔsɔ wayowanda lo lɔhɔmbɔ ndo l’ɔkɔngɔ w’akambo asɔ, vɔ wayotomba oma lo wodja akɔ ndo wayokambɛ olimu w’ekila lo dihole nɛ.’+

8 “Ndo nto, Nzambi akadje la nde sheke l’ekimanyielo ka wonyelo wa mpota,+ ko oma laasɔ, nde akote Isaka+ ndo akawonya mpota lushi la 8+ ndo Isaka akote* Jakɔbɔ, Jakɔbɔ akote ɛtɛ wa nkumbo 12.* 9 Ko ɛtɛ wa nkumbo ɛsɔ wakoke Yɔsɛfu kandjema+ ndo wakoosondja l’Edjibito.+ Koko Nzambi aki kaamɛ la nde,+ 10 ndo nde akooshimbɛ oma l’asui ande tshɛ, ko nde akoohomuya lokolo l’ɔlɔ ndo akawosha lomba la ntondo ka Farawɔ, nkumekanga k’Edjibito. Farawɔ akawodje ɔnɔmbɔdi w’Edjibito ndo wa luudu lande l’otondo.+ 11 Ko ndjala ka kasha kakonge l’Edjibito w’otondo ndo la Kanana, ɛɛ, mfɔnu ka woke. Ndo watshɛso kokoka ntana ndooko ɛngɔ ka ndɛ.+ 12 Koko Jakɔbɔ akoke dia mbo ya ndɛ* yaki l’Edjibito, ko nde akatome watshɛso lɛkɔ mbala ka ntondo.+ 13 Lam’akandaatome mbala ka 2, Yɔsɛfu akayaeyanya le anango, ko nkumbo ka Yɔsɛfu kakayeyamaka le Farawɔ.+ 14 Ɔnkɔnɛ, Yɔsɛfu akatome dui ndo akelɛ Jakɔbɔ she la ewotɔ ande tshɛ oma lo dihole diakɔ,+ tshɛ tshɛ anto* 75.+ 15 Jakɔbɔ akaholɔ otsha l’Edjibito+ ndo nde akatovɔ lɛkɔ+ ndo watshɛso wakavu lɛkɔ.+ 16 Wakawaɛmbɛ otsha la Shɛkɛmɛ ndo wakataakundɛ lo diombo di’Abrahama diakandasombe la falanga ya mfɛsa oma le ana wa Hamɔra waki la Shɛkɛmɛ.+

17 “Oko wakayasukanaka etena kakahombe kotshama daka diakalake Nzambi Abrahama, ase Isariyɛlɛ wakatafulanɛka l’Edjibito, 18 polo ndo lam’akayolɛka nkumekanga kekina kaki kombeya Yɔsɛfu+ l’Edjibito. 19 Nkumekanga kɛsɔ akalɔsha wodja aso la mayɛlɛ ndo nde akatshutshuya watshɛso dia vɔ nkalɛ anawɔ dia vɔ mvɔ.+ 20 L’etena kɛsɔ mbakotɔ Mɔsɛ ndo nde aki la olangala* w’oma le Nzambi. Nde akalɔmɛ* ngɔndɔ 3 lo luudu la she.+ 21 Koko lam’akawokalɛ,*+ ɔnaki Farawɔ la womoto akawɔshi ndo akayowodia oko ɔnande hita.+ 22 Ɔnkɔnɛ, Mɔsɛ aketshama lo ndjela lomba tshɛ l’ase Edjibito. Lo mɛtɛ, ɛtɛkɛta ande waki la wolo w’efula ndo nde akasalaka akambo wa diambo.+

23 “Lam’akandakotsha ɛnɔnyi 40, kanyi yakoyɛ l’otema* dia nde ntshɔ tenda* anango w’ase Isariyɛlɛ.+ 24 Ndo lam’akandɛnyi ose Edjibito ɛngiya ose Isariyɛlɛ, Mɔsɛ akete l’ɔnango wedi, akasɔmbɔya lo dihole diande ndo akadiake ose Edjibito akɔ. 25 Nde akafɔnyaka dia anango wayoshihodia dia Nzambi aki suke la mbashimbɛ lo tshimbo ya lonya lande, koko vɔ koshihodia dikambo sɔ. 26 La wedi a pindju, nde akatshu le wɔ ndo akɛnyi 2 l’atei awɔ walɔ. Nde akayange dia mbakakitola ndo akate ate: ‘Nyu nyekɔ onto l’ɔnango. Ko lande na kasalanɛnyu kɔlɔ?’ 27 Koko ɔnɛ lakaleke nkɔmɔla osekande kɔngɛnangɛna kɛnɛ kakawatɛ Mɔsɛ ndo akate ate: ‘Akakɔsɔnɛ owandji ndo shushi yaso? 28 Onde wɛ olanga ndjakami woho wakayadiake ose Edjibito loyi?’ 29 Lam’akoke Mɔsɛ ɛtɛkɛta ɛsɔ, nde akalawɔ ndo akatodjasɛ oko ɔngɛndangɛnda lo wodja wa Midiyana lɛnɛ akandatotaka ana 2 w’apami.+

30 “L’ɔkɔngɔ w’ɛnɔnyi 40, ondjelo ɔmɔtshi akɛnama le nde l’oswe suke la Dikona dia Sinayi lo loombe la dja lakalombalombaka lo dikombokombo di’atɛndɛ.+ 31 Lam’akɛnyi Mɔsɛ dui sɔ, nde akaambe l’ɔtɛ wa kɛnɛ kakandɛnyi. Koko lam’akandatasukanaka dia menda dimɛna, nde akoke dui dia Jehowa* diata ate: 32 ‘Dimi kele Nzambi ka watshɛyɛ, Nzambi ka Abrahama, Nzambi ka Isaka ndo Nzambi ka Jakɔbɔ.’+ Lam’ele Mɔsɛ akandama la wɔma, nde kotetemala menda nto. 33 Jehowa* akawotɛ ate: ‘Kolola sabata oma l’ekolo ayɛ, nɛ dia dihole diemadiyɛ diekɔ nkɛtɛ y’ekila. 34 Dimi lambɛna asui wa wodja ami wele l’Edjibito, lamboka akumu awɔ+ ndo lamboholɔ dia ndjatshungola. Ɔnkɔnɛ yaka, dimi layanga kotoma otsha l’Edjibito.’ 35 Mɔsɛ kakɔ kakawanguna, wata vate: ‘Akakɔsɔnɛ owandji ndo shushi yaso?’+ Nzambi akootome+ dia nde mbalɔmbɔla ndo mbatshungola lo tshimbo ya ondjelo wakɛnɛ le nde lo dikombokombo di’atɛndɛ. 36 Pami kɛsɔ akaatondja,+ akasale akambo wa diambo* ndo tolembetelo l’Edjibito,+ lo Ndjale ka Beela+ ndo ɛnɔnyi 40+ l’oswe wa shɛnga.

37 “Mɔsɛ kɛsɔ mbakatɛ ana w’ase Isariyɛlɛ ate: ‘Nzambi ayonyotondjɛ omvutshi wele oko dimi+ oma l’atei w’anangɛnyu.’ 38 Nde mbaki l’atei w’etshumanelo l’oswe wa shɛnga kaamɛ la ondjelo+ wakatɛkɛta la nde+ lo dikona dia Sinayi ndo kaamɛ la watshɛso. Nde akalongola ɛtɛkɛta w’ekila wele la lɔsɛnɔ dia ndjotosha.+ 39 Watshɛso wakatone dia mbokitanyiya, vɔ wakootone,+ ndo lo etema awɔ, vɔ wakakalola l’Edjibito,+ 40 wakatɛ Arɔna vate: ‘Otosale tozambizambi tahomba tatshɔka la ntondo kaso. Nɛ dia hateye kɛnɛ kambotokomɛ Mɔsɛ, ɔnɛ lakatotondja oma lo wodja w’Edjibito.’+ 41 Ko vɔ wakasale ekishi ka yana ya ngɔmbɛ lo nshi shɔ, wakakilambola olambo ndo wakatatɛ ngɛnangɛna l’elimu w’anya awɔ.+ 42 Ɔnkɔnɛ, Nzambi akawaoke ɔkɔngɔ ndo akaakimɔ dia vɔ kambɛ alembe wa l’olongo+ olimu w’ekila oko wakadiafundama lo dibuku dia Amvutshi ɔnɛ: ‘Luudu l’Isariyɛlɛ le, shi aha dimi mbakanyalambolaka elambo ndo weshasha ekina l’edja k’ɛnɔnyi 40 wakanyetsha l’oswe wa shɛnga? 43 Koko luudu la dipɛma la Mɔlɔkɛ+ ndo yɔɔtɔ ya jambizambi yelɛwɔ Refana yakanyɔshi, dikishi diakanyasale dia ditɛmɔla mbakanyalambola. Dimi layonyɔtɔla lo lɔhɔmbɔ ndekana Babilɔna.’+

44 “Watshɛso waki la luudu la dipɛma l’ɔmɛnyi l’oswe wa shɛnga oko wakandawadjangɛ etena kakandatɛ Mɔsɛ dia lisala lo ndjela ɛnyɛlɔ kakandɛnyi.+ 45 Ndo watshɛso wanɛ wakaliɔshi ndo wakalitɔlɛ kaamɛ la Jashua lo nkɛtɛ ya wedja+ wele Nzambi akawatshanya oma la ntondo ka watshɛso.+ Luudu lakɔ lakatshikala polo ndo lo nshi ya Davidɛ. 46 Nde akahomɔ lokolo l’ɔlɔ lo washo wa Nzambi ndo akalɔmbɛ dia nde nkondja diɛsɛ dia mbikɛ Nzambi ka Jakɔbɔ+ luudu la nde mbidjasɛ. 47 Koko Sɔlɔmɔna mbakayowokɛka luudu.+ 48 Kaanga mbediɔ ngasɔ, Ɔnɛ-Laheme-Tshɛ hadjasɛ lo mvudu yakakama l’anya w’anto,+ oko wakate omvutshi ate: 49 ‘Olongo kele kiti kami ka lowandji+ ndo nkɛtɛ kekɔ kihona k’ekolo ami.+ Luudu la ngande layonyombikɛ? mbata Jehowa.* Kana lende ele dihole diami dia momuya? 50 Shi lonya lami mbakasale diangɔ sɔ tshɛ?’+

51 “Nyu akanga w’ɛtɛ wolo, waki kominya mpota l’etema ndo l’atoyi le, nshi tshɛ nyu ndɔshanaka la nyuma k’ekila ndo oko wakasale watshɛnyu mbasalanyu.+ 52 Omvutshi akɔna waki watshɛnyu kɔpɛnyahɛnya?+ Eelo, vɔ wakadiake wanɛ wakewoya la ntondo awui wendana la oyelo wa kanga losembwe,+ ɔnɛ lele nyu nyaya kakianɛ afungi ande ndo andjaki ande,+ 53 nyu wanɛ wakalongola Ɛlɛmbɛ wakaye lo tshimbo y’andjelo,+ koko nyu kokitanyiya Ɛlɛmbɛ akɔ.”

54 Lam’akawoke akambo asɔ, vɔ wakomala* efula l’etema awɔ ndo wakatatɛ nkakatanya wanyu lo dikambo diande. 55 Koko lam’ele nde akalodiama la nyuma k’ekila, nde akende l’olongo ko akɛnyi lotombo la Nzambi ndo Yeso emadi lo lonya l’omi la Nzambi,+ 56 ko nde akate ate: “Ohonyenda, dimi lambɛna olongo wambodihɔ ndo Ɔna onto+ emadi lo lonya l’omi la Nzambi.”+ 57 Lam’akawoke ngasɔ, vɔ wakade ekoko la wolo awɔ tshɛ ndo wakadihe anya l’atoyi awɔ ndo vɔ tshɛ wakakungusɔ otsha le nde. 58 L’ɔkɔngɔ wa vɔ mbotondja l’andja w’osomba, vɔ wakatatɛ mbooka ave.+ Ndo ɛmɛnyi+ wakakitsha ahɔndɔ awɔ wa laadiko l’ekolo w’ɔlɔngɔ a pami wakawelɛka Saolo.+ 59 Ko vɔ wakatatɛ mboka Stɛfano ave etena kakandelɛka ndo kakandataka ate: “Nkumadiɔndjɔ Yeso, olongole lomu lami.” 60 Oma laasɔ, nde akake adwe ndo akate la dui dia wolo ate: “Jehowa* le, towashake dilanya l’ɔtɛ wa pɛkato kɛnɛ.”+ Ndo l’ɔkɔngɔ wa nde mbuta ngasɔ, nde akalale djɔ lo nyɔi.