Isaya
14 Nɛ dia Jehowa ayoka Jakɔbɔ+ kɛtshi ndo nde ayɔsɔna Isariyɛlɛ+ nto. Nde ayowadjashiya* lo wodja awɔ+ ndo angɛndangɛnda wayɔtɔ l’ɔnɔngɔ awɔ ndo wayomamema luudu la Jakɔbɔ.+ 2 Ndo anto wayowaɔsa, wayowatɔla lo dihole diawɔ hita ndo luudu la Isariyɛlɛ layowaɔsa oko ekambi w’apami la wa wamato+ lo wodja wa Jehowa; vɔ wayonga amundji wa wanɛ wakawande mfumbe, ndo vɔ wayahemɛ wanɛ wakaakandjaka olimu la wolo.*
3 Lushi layokosha Jehowa diomuyelo oma lo kandji kayɛ, oma lo osukusuku ayɛ ndo oma lo lɔhɔmbɔ la wolo lakawakodjangɛ,+ 4 wɛ ayotɛ nkumekanga ka Babilɔna yokedi* nyɛ:
“Ande woho wambokomɛ ɔnɛ lakakandjaka anto akina olimu* la wolo lee!
Ande woho wambokomɛ dihɛnyɔki lee!+
5 Jehowa ambɔɔkɔla okalemba wa akanga wa kɔlɔ,
Danga dia emboledi,+
6 Ɔnɛ lakakɔmɔlaka anto la odudu tshɛ aha la mpekɔ,+
Ɔnɛ lakalɛndjaka wedja la nkɛlɛ tshɛ la ɔhɛnyɔhɛnyɔ+ wahɛnɛ pe.
7 Wonya ɔnɛ nkɛtɛ k’otondo kambomuya, aha la ofukutanu.
Anto woda ekoko w’ɔngɛnɔngɛnɔ.+
8 Kaanga esongo wa dihake wɔngɛnangɛna l’ɔtɛ ayɛ,
Kaamɛ ndo elondo wa la Lɛbanɔna.
Vɔ wotaka vate: ‘Oma ko etena kakayakɔshama,
Ndooko ɔkɔtshi w’esongo wamboya dia ndjotɔkɔta.’
9 Kaanga Diombo* di’ɔhɔngɔ diambohasahasa
Dia mpomana la yɛ etena kayayaye.
L’ɔtɛ ayɛ diɔ diambemula wanɛ wele bu la wolo lo nyɔi,
Ɛnɔmbɔdi tshɛ wa hiadi* wa la nkɛtɛ.
Diɔ diambonyiya nkumi ya dikanga tshɛ ya wedja oma lo kiti yawɔ ya lowandji.
10 Vɔ tshɛ tɛkɛtaka ndo kotɛka ɔnɛ:
‘Onde ndo wɛ mbaya wɔdu oko sho?
Onde wɛ aya oko sho?
Dikuso diambohandjɔnɛ l’ɛse kayɛ oko mbeto,
Ndo ɛsɔhɔ mbaya olangitshi ayɛ.’
12 Ande woho wamboyɔkɔ oma l’olongo,
Wɛ lahɛtahɛta, ɔna la yosose lee!
Ande woho wamboyonyukɔma la nkɛtɛ,
Wɛ lakalɛndjaka wedja lee!+
13 Wɛ akate l’otema ayɛ wate: ‘Dimi layodɛ l’olongo.+
La diko dia tɔɔtɔ ta Nzambi kayomodiya kiti kami ka lowandji,+
Ndo dimi layodjasɛ lo dikona dia losanganya,
Lo ahole woleki etale wa lo nɔrdɛ.+
14 Dimi layodɛ la diko dia tɔsɔdi ta wange;
Dimi layoyaetɛ oko Ɔnɛ-Laheme-Tshɛ.’
15 Koko wɛ ayoholoyama lo Diombo,*
Lo ahole woleki ɔhɔngɔ lo difuku.
16 Wanɛ wayokɛna wayamba l’ɔtɛ ayɛ;
Vɔ wayokɔsɛdingola dimɛna dimɛna, wata vate:
‘Onde ɔnɛ kele pami kakasutshasutshaka nkɛtɛ,
Ɔnɛ lakadidinyaka waolelo,+
17 Ɔnɛ laketɛ nkɛtɛ k’otondo oko oswe wa shɛnga
Ndo lakanyukola esomba ayɔ,+
Lakatonaka dia ase lokanu ande ntshungɔ dia nkalola la ngelo?’+
18 Nkumi ya dikanga nkina tshɛ ya wedja,
Ɛɛ, vɔ tshɛ wambetama lo lotombo,
Onto l’onto lo diombo* diande hita.
19 Koko wɛ ambokashema aha la diombo,
Oko lɔsɔngɔ* lahetshama,
Lɔlɔtshami la edo wakadiakema la lokuwa la ta,
Waholɔ lo ave wa difuku,
Oko dikandja diahɔtshahɔtshama l’ekolo.
20 Wɛ hatowayela lo diombo,
Nɛ dia wɛ akalanya wodja ayɛ hita,
Wɛ akadiake anto ayɛ hita.
Ana wa atshi wa kɔlɔ hawɔlamɛki nkombo nto pondjo.
21 Nyɔlɔngɔsɔlɛ dihole dia ndjaka anande
L’ɔtɛ w’onongo wa watshɛwɔ,
Diaha vɔ ndjonɛɛ ko mbɔsa nkɛtɛ
Ndo ndodia wodja la esomba awɔ.”
22 “Dimi layonɛɛ dia mbalɔsha,”+ mbata Jehowa kanga lolembelembe.
“Ndo dimi layonya lokombo, atshikadi, tokanula ndo ɔngɔnyi oma la Babilɔna,”+ mbata Jehowa.
23 “Dimi layokietɛ ɛngɔ ka biko ndo ɛtshi ka nkɛtɛ kele la ashi ndo dimi layokiɔmba la lɔɔmbɔ l’elanyelo,”+ mbata Jehowa kanga lolembelembe.
24 Jehowa kanga lolembelembe akatshibe ate:
“Paka oko wakamakongɛ mbayosalema,
Ndo paka oko wakamɔshi yɛdikɔ mbayokotshama.
25 Dimi layominola ose Asuriya lo wodja ami,
Ndo dimi layowɔhɔtshahɔtsha lo akona ami.+
Osembe ande wayonyɛma oma le wɔ,
Ndo oshikɔ ande wayonyɛma oma lo ahɛka awɔ.”+
26 Yɛdikɔ shɔ kambɔsama* lo dikambo dia nkɛtɛ k’otondo,
Ndo kɛsɔ mbele lonya lambosembɔma tɔɔ* lo dikambo dia wedja tshɛ.
27 Nɛ dia Jehowa kanga lolembelembe kambɔsa yɛdikɔ,
Akɔna akoka ndjitola?+
Lonya lande lambosembɔ tɔɔ,
Akɔna akoka linɛ?+
28 Lo ɔnɔnyi wakavu nkumekanga Ahaza,+ akatama ɔnɛ:
29 “Ase Filistiya le, onto tshɛ la l’atei anyu atɔngɛnangɛnake
Tsho l’ɔtɛ wambohembɔ lofimbɔ la ɔnɛ lanyɔkɔmɔla.
Nɛ dia oma lo odio wa oloyi+ kayotomba oloyi wa lɔlɛngɔ,+
Ndo ɔnawɔ ayonga oloyi wafumbɔ wele la dja.*
30 Etena kayɔlɛka ana wa nondo wa tombolambola
Ndo kayetamaka ase wola lo lotui tshitshi,
Dimi layodiaka odio ayɛ la ndjala,
Ndo kɛnɛ kayotshikala le yɛ kayodiakema.+
31 Soko le, lela! Osomba le, da ekoko!
Nyu tshɛ nyayatɛ asolo, nyu ase Filistiya!
Nɛ dia edinga wekɔ lo ndja oma lo nɔrdɛ,
Ndo anto ande tshɛ nɔngama lo ɛnɔngɔ.”
32 Ngande wahombawɔ nkadimola akɛndji wa wodja?
Ɔnɛ Jehowa ambosala etshina ka Siɔna,+
Ndo dia tombolambola ta l’atei w’anto ande wayoyashɛ lɛkɔ.