Luka

21 Lam’akandendaka, Yeso akɛnyi akanga w’ɛngɔnyi wadja weshasha awɔ lo tɔshɛtɛshɛtɛ ta eombelo.*+ 2 Ko nde akɛnyi wadi aki odo ɔmɔtshi laki ose wola adja ekenga 2 wa totshitshɛ wa falanga waki la nɛmɔ dia tshitshɛ efula,*+ 3 ko Yeso akate ate: “Lo mɛtɛ kanyotɛmi nte, wadi aki odo ɔnɛ l’ose wola ambodja woshasha woleki falanga tshɛ yakadjisha ase ɛngɔnyi.+ 4 Nɛ dia anto tshɛ wakadjisha efula oma l’ɔngɔnyi wele la wɔ, koko womoto ɔnɛ, lo wola* ande akadjisha kɛnɛ tshɛ kaki la nde+ dia ndjasɛnya.”

5 L’ɔkɔngɔ diko, lam’akatɛkɛtaka anto amɔtshi dikambo dia tɛmpɛlɔ, wata woho wakawakilɛngɛ l’ave w’amɛna ndo dia diangɔ diakawalambolaka Nzambi+ lɔkɔ, 6 nde akate ate: “Lo dikambo dia diangɔ diɛnanyu ndo, nshi yayoya yele ndooko dive diayotshikala laadiko dia dive aha la kɔshama.”+ 7 Ko vɔ wakawombola vate: “Ombetsha, etena kakɔna kayosalema akambo asɔ ndo djembetelo yakɔna yayɛnya dia akambo asɔ wayanga salema?”+ 8 Nde akate ate: “Nyewɔ diaha nyu minganyiyama,+ nɛ dia anto efula wayoya lo lokombo lami, wayota ɔnɛ: ‘Dimi kele nde,’ ndo ɔnɛ: ‘Etena kakashikikɛma kaya suke.’ Tanyaayelake.+ 9 Ndo nto, lam’ayonyoka nkumu y’ata ndo y’efukutanu,* tanyokake wɔma. Nɛ dia akambo asɔ pombaka salema ntondo, koko ekomelo hatoya mbala kakɔ ɔtɔi.”+

10 Oma laasɔ, nde akawatɛ ate: “Wodja wayɔlɔsha wodja+ okina ndo diolelo diayɔlɔsha diolelo+ dikina. 11 Adidimu wa nkɛtɛ wa wolo wayoyala, ndjala ya kasha ndo elando+ lo dihole la dihole; akambo wa wɔma wayoyala ndo tolembetelo ta weke tayɛnama oma l’olongo.

12 “Koko la ntondo k’akambo asɔ salema, anto wayonyonda, wayonyɔhɛnyahɛnya,+ wayonyokimɔ lo toshinangɔnga ndo lo nkanu. Wayonyɔtɔla la ntondo ka nkumi ya dikanga la waa nguvɛrnɛrɛ l’ɔtɛ wa lokombo lami.+ 13 Dui sɔ diayonyosha diaaso dia nyu mbasambisha. 14 Ɔnkɔnɛ, nyɔshi yɛdikɔ l’etema anyu diaha nɔngɔsɔla la ntondo woho wayonyotolombola,+ 15 nɛ dia layonyosha ɛtɛkɛta ndo lomba woho wele atunyi anyu tshɛ hawotonga la dui dia nkadimola kana mbuta.+ 16 Ndo nto, kaanga ambutshi anyu, anangɛnyu, ewotɔ anyu ndo angɛnyi anyu wayonyokimɔ* ndo vɔ wayodiaka+ amɔtshi l’atei anyu, 17 ndo anto tshɛ wayonyohetsha l’ɔtɛ wa lokombo lami.+ 18 Koko, ndooko kaanga wɔɔngi wa divo dia l’ɛtɛ anyu wayoshishɔ.+ 19 Ndo oma lo ekikelo kanyu mbayonyoshimbɛ nsɛnɔ yanyu.*+

20 “Koko, lam’ayonyɛna Jɛrusalɛma yambodingama l’asɔlayi,+ kanyeye dia elanyelo kayɔ kaya suke.+ 21 L’etena kɛsɔ, wanɛ wele la Judeya kawolawɔ otsha l’akona,+ wanɛ wele l’etei kayɔ kawotombe ndo wanɛ wele lo tosamba watokalolake l’osomba, 22 nɛ dia ɔsɔ ekɔ nshi yayonga losembwe* di’akambo tshɛ wakafundama kotshama. 23 Ayonga paa efula le wamato wayonga la waemi ndo wayɔlɔnyaka ana lo nshi shɔ!+ Nɛ dia asui wa wolo wayoyala lo wodja ndo anto asɔ wayolongola dilanya. 24 Vɔ wayodiakema la tokuwa ta ta, wayɔtɔlama mfumbe lo wedja+ tshɛ ndo ase wedja wayɔhɔtshahɔtsha Jɛrusalɛma polo ndo etena kakashikikɛma k’ase wedja kambokoka.+

25 “Ndo nto, tolembetelo tayoyala lo wonya, lo ngɔndɔ ndo lo tɔɔtɔ+ ndo asui wayoyala lo wedja wa la nkɛtɛ, nɛ dia hawoteya kɛnɛ ka nsala l’ɔtɛ wa lohelo l’asuku w’ashi wa lo ndjale. 26 Anto wayɔkɔ hohakayi l’ɔtɛ wa wɔma ndo wa elongamelo k’akambo wayosalema lo nkɛtɛ k’otondo, nɛ dia diangɔ dia wolo dia l’olongo diayosutshasutshama. 27 Ko l’etena kɛsɔ, vɔ wayɛna Ɔna onto+ ayaye lo dinge la wolo ndo la lotombo l’efula.+ 28 Koko, lam’ayotatɛ akambo asɔ salema, kanyokeketale ndo kanyonge la dihonga, nɛ dia etshungwelo kanyu kaya suke.”

29 Ko nde akawasha ɛnyɛlɔ kɛmɔtshi ate: “Nyende osongo wa fingo ndo esongo+ ekina tshɛ: 30 Lam’atowotatɛka mɔnga, nyu tɛnaka nyuamɛ ndo teyaka nyate eleko k’ɔwɔ kaya suke. 31 Woho akɔ waamɛ mbele, nyu lawɔ lam’ayonyɛna akambo asɔ wosalema, kanyeye dia Diolelo dia Nzambi diaya suke. 32 Lo mɛtɛ kanyotɛmi dia lɔlɔnga lɔnɛ hateta paka akambo asɔ tshɛ wambosalema.+ 33 Olongo la nkɛtɛ wayeta, koko ɛtɛkɛta ami hawetaki pondjo.+

34 “Nyoyalame diaha etema anyu monga wotsho la deshi dia tshambandeko ndo la nɔshi+ dia tshambandeko ndo la ekiyanu wa lo lɔsɛnɔ,+ ko mbala kakɔ ɔtɔi lushi lɔsɔ ndjonyokumɛ la shashimoya 35 oko shunyi ya djonga.+ Nɛ dia lɔ layoya le anto tshɛ wodjashi laadiko dia nkɛtɛ k’otondo. 36 Ɔnkɔnɛ, nyɔsɛnake+ ndo nyɔlɔmbake l’ɔsɛngɔsɛngɔ+ tena tshɛ dia nyu ndjohanda l’akambo asɔ tshɛ wahomba salema ndo dia nyu ndjemala la ntondo k’Ɔna onto.”+

37 La yanyi nde aketshaka lo tɛmpɛlɔ, koko l’otsho nde akatshɔka dia tolala lo dikona dielɛwɔ Dikona di’esongo w’Ɔlivɛ. 38 Ndo anto tshɛ wakayaka le nde la pindju ka pɛɛ lo tɛmpɛlɔ dia ndjoohokamɛ.