1 Tɛsalɔnika
5 Analengo le, lo kɛnɛ kendana la tena ndo la deko, bu ohomba nyofundɛ kaanga dikambo ɔtɔi. 2 Nɛ dia nyuamɛ mbeyaka dimɛna dia lushi la Jehowa*+ layoya paka woho watoyaka wovi l’otsho.+ 3 Etena kayowota vate: “Wɔladi ndo lotui tshitshi!” mbala kakɔ ɔtɔi elanyelo kayoya la shashimoya le wɔ+ oko watoyaka lɔɔnɔ le womoto lele la diemi, ko vɔ hawotohandɔ kaanga yema. 4 Koko analengo le, nyu bu lo wodjima dia lushi lɔsɔ ndjonyokumɛ oko wovi, 5 nɛ dia nyu tshɛ nyekɔ ana w’osase ndo ana wa yanyi.+ Sho bu ana w’otsho kana wa wodjima.+
6 Ɔnkɔnɛ, tatolalake djɔ oko walala anto akina,+ koko nyɛsɔ tɔsɛnake+ ndo totetemale monga la ekanelo ka yimba k’ɔlɔlɔ.+ 7 Nɛ dia wanɛ walala djɔ tolalaka l’otsho ndo wanɛ wadjɔ wanu todjɔka l’otsho.+ 8 Koko sho wanɛ wele ana wa yanyi, totetemale monga la ekanelo ka yimba k’ɔlɔlɔ ndo tɔlɔtɛ okombɔ wa mbetawɔ ndo wa ngandji wakokɛ ntolo ndo elongamelo ka panda oko lofulɛ,+ 9 nɛ dia Nzambi akatɔsɔnɛ aha dia nkɛlɛ, koko dia sho nkondja panda+ lo tshimbo ya Nkumɛso Yeso Kristo. 10 Nde akatovwɛ+ dia oyadi tekɔ lo nsungukala kana tambolala djɔ,* sho pombaka nsɛna kaamɛ la nde.+ 11 Ɔnkɔnɛ, nyotetemale keketshana* onto la wonyande ndo mbodiana onto la wonyande,+ oko wasalanyu.
12 Analengo le, tambonyɔlɔmba dia nyu monga la dilɛmiɛlɔ otsha le wanɛ wakamba olimu wa wolo l’atei anyu, wanyɔlɔmbɔla lo Nkumadiɔndjɔ ndo wanyolaka; 13 ndo dia nyu ndeka mbasha nɛmɔ di’efula lo ngandji l’ɔtɛ w’olimu awɔ.+ Nyoyale la wɔladi lam’asanyu.+ 14 Lo wedi okina, analengo le, tambonyolaka dia mpɛmɔla* akanga w’ofukutanu,+ nyokambe la ɛtɛkɛta w’esambelo le wanɛ wambɔkɔmɔ,* nyosuke wanɛ wele wɔdu ndo nyonge la solo dia lotutsha otsha le anto tshɛ.+ 15 Nyɔsɛnɛ wolo diaha onto nkaloya ndooko onto kɔlɔ lo kɔlɔ,+ koko tena tshɛ nyowesake kɛnɛ kele ɔlɔlɔ le onto la wonyande ndo le anto akina tshɛ.+
16 Nyɔngɛnangɛnake nshi tshɛ.+ 17 Nyotetemale nɔmba.+ 18 Nyoshake losaka lo akambo tshɛ.+ Ɔsɔ kele lolango la Nzambi le nyu lo Kristo Yeso. 19 Tanyodimake dja ya nyuma.+ 20 Tanyɔnyɔlake+ prɔfɛsiya. 21 Nyɔsɛdingole akambo tshɛ,+ nyokukute kɛnɛ kele ɔlɔlɔ. 22 Nyotone weho tshɛ w’akambo wa kɔlɔ.+
23 Nzambi ka wɔladi ndamɛ anyokidia tshɛ lo tshɛ. Ndo analengo le, yimba yanyu, anima* anyu ndo alemba anyu nyu tshɛ walameme lo akambo tshɛ, aha la onongo lo woongelo wa Nkumɛso Yeso Kristo.+ 24 Ɔnɛ lanyelɛ ekɔ la kɔlamelo ndo nde mɛtɛ ayosala dikambo sɔ.
25 Analengo, nyotetemale nɔmba dikambo diaso.+
26 Nyosha anangɛso tshɛ mɔyɔ wa la bizɛ k’ekila.
27 Dimi lambonyodjangɛ la eshikikelo tshɛ lo lokombo la Nkumadiɔndjɔ dia nyu mbadiɛ anangɛso tshɛ mukanda ɔnɛ.+
28 Ɔlɔlɔ waheyama mbɛdika wa Nkumɛso Yeso Kristo wayale la nyu!