Rɔmɔ
11 Ɔnkɔnɛ, dimi lambombola nte: Nzambi kombikasha wodja ande, shi mɛtɛ?+ Keema! Nɛ dia dimi lawɔ lekɔ ose Isariyɛlɛ, kanula* ya Abrahama ya lo dioho dia Bɛnjamina. 2 Nzambi kombikasha anto ande wakandetawɔ ntondo.+ Onde nyu hanyeye kɛnɛ kata afundelo lo dikambo dia Elidja lam’akandasɛngasɛnga Nzambi lo ndjakiyanya l’ɔtɛ wa ase Isariyɛlɛ? 3 “Jehowa* le, vɔ wakadiake amvutshi ayɛ, vɔ wakahandjola dilambwelo diayɛ, lambotshikala dimɛ, ndo wonya ɔnɛ vɔ wekɔ lo nyanga lɔsɛnɔ* lami.”+ 4 Ko kakɔna kakawotɛ Nzambi? “Dimi lekekɔ l’apami nunu esambele (7 000) waki kokusɛ Baala+ adwe.” 5 Ɔnkɔnɛ, woho akɔ waamɛ mbele, l’etena kɛnɛ, ekɔ atshikadi+ amɔtshi lo ndjela ɔsɔnwɛlɔ lo ekimanyielo ka ɔlɔlɔ waheyama mbɛdika. 6 Ko naka lo ndjela ɔlɔlɔ waheyama mbɛdika,+ kete aya bu lo ndjela etsha.+ Naka aha ngasɔ, kete ɔlɔlɔ waheyama mbɛdika waya bu ɔlɔlɔ waheyama mbɛdika.
7 Ko ayotota na? Isariyɛlɛ kotana ɛngɔ kakinde lo nyanga dimɛna, koko ɛsɔnami wakakitane.+ Akina wakayonga la lonyu l’etema,+ 8 oko wakadiafundama ɔnɛ: “Nzambi ambowasha nyuma ka djɔ ya baku,+ washo wahɛnyi ndo atoyi wahoke polo ndo lushi l’ɛlɔ.”+ 9 Ndo nto, Davidɛ akate ate: “Mɛsa awɔ wayale ɔtɛyi, djonga, otamba wa ntakanya ndo dilanya le wɔ. 10 Washo awɔ wayale wodjima diaha vɔ mɛna ndo ɛkɔngɔ awɔ wakotamake nshi tshɛ kota.”+
11 Ɔnkɔnɛ, dimi lambombola nte: Onde vɔ wakatakana lo yoho ya nkɔ balakata? Ndooko! Koko oma lo otakanelo awɔ, panda kekɔ le ase wedja dia mbatshutshuya dia vɔ monga la kandjema.+ 12 Ko naka otakanelo awɔ nembetshiyaka ɛngɔnyi le andja ɔnɛ ndo ekitekitelo kawɔ nembetshiyaka ɛngɔnyi le ase wedja,+ kete hoke lofulo la tshɛ kawɔ!
13 Kakianɛ nyu ase wedja mbomotɛ. Lam’ele dimi lekɔ ɔpɔstɔlɔ w’ase wedja,+ dimi tombolaka olimu ami+ 14 dia menda kana lo yoho mɔtshi dimi layokoka ntshutshuya anto ami* dia vɔ monga la kandjema ndo nshimbɛ amɔtshi l’atei awɔ. 15 Nɛ dia naka woho wambowokashema+ nembetshiyaka andja nyomokana la Nzambi, ko kakɔna kayolembetshiya wetawɔmelo awɔ naka aha lɔsɛnɔ oma lo nyɔi? 16 Ndo nto, naka etenyi kɔsama oko ɔlɔnga kekɔ ekila, kete ndo tshɛ kotshikadi kekɔ ekila. Ndo naka edio wekɔ ekila, kete ndo ntahe yekɔ ekila.
17 Koko naka ntahe mɔtshi yakahembɔma, ko wɛ, kaanga mbeyɛ lotahe l’osongo w’ɔlivɛ wa l’okonda, wɛ akayɔsɔngama lo ntahe yawɔ ndo naka wɛ okondja ɛtɛtɔ kaya oma lo edio w’osongo w’ɔlivɛ, 18 toyalake la ofunu otsha le* ntahe. Ko naka wɛ monga la ofunu otsha le* yɔ,+ kete ohɔ dia aha wɛ mbasukɛ edio, koko edio mbakosukɛ. 19 Ko wɛ ayota wate: “Ntahe yakahembɔma dia dimi sɔngama l’osongo akɔ.”+ 20 Ekɔ ngasɔ! L’ɔtɛ wakiyɔ komonga la mbetawɔ, yɔ yakahembɔma,+ koko wɛ aakemadi l’ɔtɛ wa mbetawɔ+ kayɛ. Tongake la lotamanya, koko onga la wɔma. 21 Nɛ dia naka Nzambi kotshika ntahe ya mɛtɛ y’osongo akɔ, kete nde hatokotshika kaanga wɛ. 22 Ɔnkɔnɛ, sɛdingola ɔlɔlɔ w’otema wele la Nzambi+ ndo woho wende sso wolo. Nzambi ekɔ sso wolo le wanɛ wambɔkɔ,+ koko le yɛ, nde ekɔ la ɔlɔlɔ w’otema dia kokimanyiya dia wɛ ntshikala lo ɔlɔlɔ ande w’otema. Naka aha ɔsɔku, kete ndo wɛ ayohembɔma. 23 Ndo vɔ lawɔ, naka vɔ nyomonga la mbetawɔ, kete wayɔsɔngama l’osongo,+ nɛ dia Nzambi ekɔ la akoka wa mbasɔnga nto. 24 Dikambo naka wɛ akahembɔma oma l’osongo w’ɔlivɛ wa l’okonda ndo naka wɛ akasɔngama l’osongo w’ɔlivɛ wa lonɛ, dui diahasalemaka, kete hoke ntahe ya mɛtɛ y’oma l’osongo akɔ! Shi yɔ yayoleka sɔngama dimɛna l’osongo ayɔ hita w’ɔlivɛ?
25 Analengo, dimi nangaka dia nyu mbeya sheke y’ekila+ nyɛ diaha nyu ndjala akanga wa tomba lo washo anyu hita: Yema ya lonyu yambɔtɔ lo Isariyɛlɛ polo ndo lam’ayɔtɔ lofulo tshɛ l’ase wedja, 26 ndo lo yoho shɔ Isariyɛlɛ+ w’otondo wayoshimbamɛ. Oko wakadiafundama ɔnɛ: “Otshungodi* ayoya oma la Siɔna+ ndo ayonya ditshelo dia mindo oma le Jakɔbɔ. 27 Ndo ɔsɔ mbele sheke yayomodja la wɔ+ lam’ayomonya pɛkato yawɔ.”+ 28 Lo mɛtɛ, lo kɛnɛ kendana la lokumu l’ɔlɔlɔ, vɔ wekɔ atunyi l’ɔtɛ anyu; koko lo kɛnɛ kendana la ɔsɔnwɛlɔ waki Nzambi, vɔ wekɔ anangemi l’ɔtɛ wa watshɛwɔ.+ 29 Nɛ dia Nzambi hatonga la lonyangu l’ɔtɛ wa weshasha ande ndo wa leeta lande. 30 Dikambo oko wakinyu komonga l’okitanyiya ntondo le Nzambi,+ koko kakianɛ nde ambonyoka kɛtshi+ l’ɔtɛ wewɔ bu l’okitanyiya,+ 31 woho akɔ waamɛ mbele anto anɛ bu l’okitanyiya koko nyu nyambokama kɛtshi dia vɔ lawɔ mbokama kɛtshi kakianɛ. 32 Nɛ dia Nzambi akaadihe vɔ tshɛ kaamɛ lo ohedia+ dia nde mbaoka vɔ tshɛ kɛtshi.+
33 Ande efula ka ɔngɔnyi, ka lomba ndo ka ewo ka Nzambi lee! Dombwelo diande hadiomanema mfundo ndo mboka yande hayeyama mɛtɛ nɔnda! 34 Nɛ dia “akɔna ambeya yimba ya Jehowa* kana akɔna aya ondaki ande?”+ 35 Kana “akɔna akawosha ɛngɔ ntondo kahombande ndjookaloyatɔ?”+ 36 Nɛ dia oma le nde, lo tshimbo yande ndo lo dikambo diande mbele diangɔ tshɛ. Lotombo layale le nde pondjo pondjo. Aamɛɛ.