Jɛrɛmiya
17 “Pɛkato ka Juda fundama la ofundɔ wa lowolo.
Tɔ fundama la shɔdi ya diyama lo pase di’etema awɔ
Ndo lo nseke ya lo dilambwelo diawɔ,
2 Etena kohɔ anawɔ w’apami dilambwelo diawɔ ndo dimɛta diawɔ dia l’esongo*+
Suke la osongo wele l’akatshi efula, lo tokonakona t’etale,+
3 Lo akona wa lo tongelongelo ta hwe.
Ekundji ayɛ, diangɔ diayɛ tshɛ dia nɛmɔ, dimi layodikimɔ oko ɛngɔ ka dimbo,+
Ɛɛ, ahole ayɛ wa la diko l’ɔtɛ wa pɛkato ka lo bɛtshi diayɛ dia nkɛtɛ tshɛ.+
4 La lolango layɛ hita, wɛ ayoshisha etenyi kayɛ k’okitɔ kakamakosha.+
Ndo dimi layosala dia wɛ kambɛ atunyi ayɛ lo wodja wahayeye,+
Tɔ kayotshumbaka tena tshɛ.”
5 Jehowa kata ate:
“Mananu le onto* lakitsha wɛkamu ande le anto w’anyanya,+
Ɔnɛ layaɛkɛ lo wolo w’ana w’anto,*+
Ndo lele otema ande mangana la Jehowa.
6 Nde ayonga oko osongo wele vɔamɛ lo laandja l’oswe.
Nde hɛɛna etena kayoya ɔlɔlɔ,
Koko nde ayodjasɛ lo ahole wa womu lo oswe wa shɛnga,
Lo nkɛtɛ ya lɛɛhɔ lɛnɛ ahakoke ndooko onto mbidjasɛ.
8 Nde ayonga oko osongo wonɛmi l’omamu w’ashi,
Watoma edio awɔ otsha l’ɔkɛdi w’ashi.
Vɔ hawoteya etena kawalɛ yanyi,+
Koko akatshi awɔ wayofukanɛka nshi tshɛ.
Lo ɔnɔnyi w’ɔwɔ, vɔ hawotokiyana,
Ndo vɔ hawototshika ntɔ elowa.
9 Otema ndeka diangɔ dikina tshɛ lokeso* ndo vɔ wekɔ kɔlɔ efula.*+
Akɔna akoka mbeeya?
10 Dimi Jehowa shishimaka otema,+
Sɛdingolaka tokanyi t’oma k’ɛse otema,*
Dia mfuta onto l’onto oko wele mboka yande,
Oko wele elowa w’oma l’elimu ande.+
Vɔ wayowotshika l’atei atei wa lɔsɛnɔ lande,
Ndo l’ekomelo nde ayonga ɛngɔ k’anyanya.”
12 Kiti ka lowandji ka lotombo kakadiyama oma ko etatelo,
Tɔ kele dihole dia tɛmpɛlɔ kaso k’ekila.+
13 Jehowa lele elongamelo k’Isariyɛlɛ le,
Wanɛ tshɛ wakɔsɛka wayoshama nsɔnyi.
Wanɛ watɔlɔkɔ oma le yɛ,* wayofundama nkombo lo ditshu,+
Nɛ dia vɔ wambɔsɛka Jehowa, kiɔkɔ y’ashi wa lɔsɛnɔ.+
14 Jehowa le, ɔnkɔnɔlɛ ko dimi layɔkɔnɔ.
Onshimbee, ko dimi layoshimbamɛ,+
Nɛ dia wɛ kele ɔnɛ latombolami.
15 Eenda, anto amɔtshi wekɔ lo mbutɛmi ɔnɛ:
“Lende ele ɔtɛkɛta wa Jehowa?+
Vɔ wakotshame, lam’alangayɛ!”
16 Koko le mi, dimi kotshika koyela oko olami w’ɛkɔkɔ,
Ndo dimi kokombola lushi la mpokoso.
Wɛ mbeyaka dimɛna awui tshɛ wakatɛkɛta ɛlɔmɔ ami;
Vɔ tshɛ wakatama la ntondo kayɛ!
17 Tongake ɛngɔ kambotsha wɔma.
Wɛ ekɔ eshamelo kami lo lushi la mpokoso.
18 Wanɛ wandɔsha washame nsɔnyi,+
Koko tetawɔke dia dimi mbishama nsɔnyi.
Vɔ wotshame wɔma,
Koko tetawɔke dia dimi mboka wɔma.
19 Jehowa akambutɛ ate: “Tshɔka kele temale lo soko dia ana w’ase wodja lɛnɛ ɔtɔ ndo atomba nkumi ya dikanga ya Juda, ndo lo asoko tshɛ wa Jɛrusalɛma.+ 20 Wɛ pombaka mbatɛ wate: ‘Nyohokame ɔtɛkɛta wa Jehowa, nyu nkumi ya dikanga ya Juda, ase Juda tshɛ, ndo anto tshɛ wadjasɛ la Jɛrusalɛma, wɔtɔ lo asoko anɛ. 21 Jehowa kata ate: “Nyoyalame nyuamɛ* ndo tanyɛmbake ndooko oshikɔ lushi la Sabato kana mbɔɔtshiya lo asoko wa Jɛrusalɛma.+ 22 Tanyotondjake ndooko oshikɔ oma lo mvudu yanyu lushi la Sabato; ndo hanyohombe nsala ndooko olimu.+ Nyetɛ lushi la Sabato ekila, oko wakamadjangɛ watshɛnyu.+ 23 Koko vɔ kompokamɛ kana mpokɛ atoyi awɔ ndo la ɛtɛ wolo tshɛ, vɔ wakatone* nkitanyiya kana mbetawɔ ohokwelo.”’+
24 “‘“Koko naka nyu kitanyiyami tshɛ lo tshɛ,” mbata Jehowa, “ndo naka hanyɔtshiyisha ndooko oshikɔ lo asoko w’osomba ɔnɛ lushi la Sabato, ndo naka nyu mbetɛ lushi la Sabato ekila aha la nkamba ndooko olimu lushi lakɔ,+ 25 kete nkumi ya dikanga ndo ewandji wadjasɛ lo kiti ka lowandji ka Davidɛ,+ vɔ la wɔ wayɔtɔ lo asoko w’osomba ɔnɛ, wahemi lo pusupusu ndo lo mfalasa, vɔ la ewandji awɔ, ase Juda ndo anto wadjasɛ la Jɛrusalɛma;+ ko anto wayodjasɛka lo osomba ɔnɛ pondjo pondjo. 26 Ndo anto wayoya oma lo esomba wa Juda, oma lo ahole wodingi Jɛrusalɛma, oma lo ɛtshi ka nkɛtɛ ka Bɛnjamina,+ oma lo ɛtshi ka nkɛtɛ kele l’okidi,+ oma lo lɛkɛ l’akona, ndo oma la Nɛngɛbɛ,* wayaye la elambo wa lotshumba w’etondo,+ elambo,+ elambo wa ntɔngɔ,+ tshɔ ya wɛma, ndo elambo wa eokelo ka losaka oya lo luudu la Jehowa.+
27 “‘“Koko naka nyu hanyonkitanyiya lo mbetɛ lushi la Sabato ekila, lo ntona mɛmba eshikɔ ndo mbaɔtshiya lo asoko wa Jɛrusalɛma lushi la Sabato, dimi layotshumba asoko ayɔ lo dja, ko yɔ mɛtɛ yayolongoya totshoto todingami la mpele ta la Jɛrusalɛma+ ndo yɔ hayotodimala.”’”+