Ɛnyɛlɔ
2 “Fundɛ ondjelo+ w’etshumanelo ka l’Ɛfɛsɔ+ wate: Ɔnɛ lokime tɔɔtɔ 7 lo lonya lande l’omi, ɔnɛ lakɛndakɛnda l’atei wa dikundji 7 di’atala dia paonyi+ kata ate: 2 ‘Dimi mbeyaka etsha ayɛ ndo olimu ayɛ ndo ekikelo kayɛ ndo ɔnɛ wɛ hakoke mbetawɔ anto wa kɔlɔ ndo ɔnɛ wɛ mbidjaka wanɛ wayata ɔnɛ apɔstɔlɔ+ mbewɔ l’ohemba, ko tete le vɔ bu apɔstɔlɔ ndo wɛ akawaɛnyi dia vɔ wekɔ akanga wa kashi. 3 Ndo nto, wɛ ekɔ lo nkɛnɛmɔla ekikelo ndo wɛ ekɔ lo ntetemala lo akambo efula l’ɔtɛ wa lokombo lami+ ndo wɛ atahekɔ.+ 4 Koko kɛnɛ kakonyangɛmi ele, wɛ ambotshika ngandji kaki la yɛ ntondo.
5 “‘Ɔnkɔnɛ, ohɔ lɛnɛ akayakɔ, yatshumoya+ ndo sala kɛnɛ kakayasalaka ntondo. Naka wɛ hasadi ngasɔ, dimi layoya le yɛ ko layoyonya ekundji kayɛ ka tala+ oma lo dihole diatɔ, onyake paka wɛ koyatshumoyisha.+ 6 Koko dui di’ɔlɔlɔ diasalayɛ ele, wɛ petshaka wanɛ wayela wetshelo wa yaato y’ɔtɛmwɛlɔ ya Nikɔla+ yahetshami ndo dimi. 7 Ɔnɛ lele l’atoyi wa mboka, ooke kɛnɛ katɛ nyuma tshumanelo:+ Dimi layosha ɔnɛ ladja otshumba+ diɛsɛ dia nde ndɛ elowa w’oma l’osongo wa lɔsɛnɔ+ wele lo paradiso ka Nzambi.’
8 “Fundɛ ondjelo w’etshumanelo ka la Simirnɛ wate: Ɔnɛ lele ‘la Ntondo ndo la Ndjihelo,’+ lakavu ndo lakayala la lɔsɛnɔ nto+ kata ate: 9 ‘Dimi mbeyaka asui ayɛ ndo wola ayɛ, koko wɛ ekɔ ɔngɔnyi.+ Dimi mbeyaka ntɛngɔ yakɔtɛnga wanɛ wayaelɛ ɔnɛ ase Juda ko tete le vɔ bu mɛtɛ ase Juda, koko wekɔ shinangɔnga yaki Satana.+ 10 Tokake asui wayangayɛ nsowa wɔma.+ Hokamɛ! Diabolo ayotetemala mbidja amɔtshi wa l’atei anyu lo lokanu dia nyu pembama tshɛ lo tshɛ ko nyu nyayonga la asui nshi 10. Onga la kɔlamelo polo ndo lo nyɔi, ko dimi layokosha dɛmbɔ dia nkoso dia lɔsɛnɔ.+ 11 Ɔnɛ lele l’atoyi wa mboka, ooke+ kɛnɛ katɛ nyuma tshumanelo: Ɔnɛ ladja otshumba,+ nyɔi+ ka 2 hatowosalɛ kɔlɔ.’
12 “Fundɛ ondjelo w’etshumanelo ka la Pɛrgamɛ wate: Ɔnɛ lele la lokuwa la ta l’otale la mpɛmɔ wedi 2+ kata ate: 13 ‘Dimi mbeyaka dihole diodjashiyɛ, mbuta ate lɛnɛ ele kiti ka lowandji kaki Satana, koko wɛ ekɔ lo ntetemala nkukutɛ lokombo lami+ ndo wɛ komanguna mbetawɔ kele la yɛ le mi+ oyadi kaanga lo nshi ya Atipa, ɔmɛnyi ami wa kɔlamelo+ wakadiakema+ suke la nyu lɛnɛ odjashi Satana.
14 “‘Koko, l’akambo angana anɛ mbakonyangɛmi: Nɛ dia lengo wɛ ekɔ la wanɛ wayela wetshelo wa Balama+ laketsha Balaka+ dia nkitsha otamba wa ntakanya la ntondo k’ana w’ase Isariyɛlɛ dia vɔ ndɛ diangɔ diakawalambola dikishi ndo dia vɔ nsala awui wa mindo wa dieyanelo.*+ 15 Woho akɔ waamɛ mbele, wɛ lawɔ ekɔ la wanɛ wayela wetshelo wa yaato y’ɔtɛmwɛlɔ ya Nikɔla.+ 16 Ɔnkɔnɛ yatshumoya. Naka wɛ hasadi ngasɔ, dimi lekɔ lo ndjaye le yɛ esadi ndo layɔlɔshana la wɔ la lokuwa la ta l’otale latomba oma l’onyɔ ami.+
17 “‘Ɔnɛ lele l’atoyi wa mboka, ooke kɛnɛ katɛ nyuma tshumanelo:+ Ɔnɛ ladja otshumba,+ dimi layowosha yema ya mana+ yakashɛma ndo layowosha lɔwɔkɔ la wɛma ndo laadiko dia lɔwɔkɔ lakɔ fundama lokombo l’oyoyo lele ndooko onto lalieya, onyake onto lalilongola.’
18 “Fundɛ ondjelo w’etshumanelo ka la Tiyatira+ wate: Ɔna Nzambi, ɔnɛ lele la washo wele oko loombe la dja+ ndo lele la ekolo wele oko nkonga ka pudipudi+ kata ate: 19 ‘Dimi mbeyaka etsha ayɛ ndo ngandji kayɛ ndo mbetawɔ kayɛ ndo olimu ayɛ ndo ekikelo kayɛ, ndo ɔnɛ etsha ayɛ wa nshi nyɛ wamboleka wa lo nshi ya ntondo.
20 “‘Koko, kɛnɛ kakonyangɛmi ele woho wetawɔyɛ womoto ongo, Jezabɛlɛ+ layaelɛ ɔnɛ omvutshi wa womoto ndo nde mbetshaka ndo minganyiyaka ekambi ami dia nsala awui wa mindo wa dieyanelo*+ ndo dia ndɛ diangɔ diakawalambola dikishi. 21 Dimi lakawosha etena ka nde ndjatshumoya, koko nde halange ndjatshumoya oma lo awui ande wa mindo wa dieyanelo.* 22 Hokamɛ! Dimi lekɔ suke la mbokitsha baka la hemɔ ndo wanɛ wasala loseka la nde, lekɔ suke la mbadja lo mfɔnu ka woke, onyake paka vɔ mboyatshumoyisha oma l’etsha ande. 23 Ndo dimi layodiaka anande la sui dia nyɔi, kele tshumanelo tshɛ kaweye dia dimi katɔsɛdingolaka tokanyi ta l’etei* ndo etema, ndo dimi layonyofuta onto l’onto lo ndjela etsha ande.+
24 “‘Koko, dimi lambonyotɛ nyu anto akina wa la Tiyatira, wanɛ tshɛ wahayele wetshelo waki Jezabɛlɛ, wanɛ waki kombeya elɛwɔ “akambo wa lotshimola wa Satana”+ nte: Dimi haanyahatanyɛ wotsho okina. 25 Koko nyokukute kɛnɛ kenyu la tɔ polo lam’ayomoya.+ 26 Ndo ɔnɛ ladja otshumba ndo layela etsha ami polo l’ekomelo, dimi layowosha lowandji la mbahemɛ wedja,+ 27 ko nde ayowalɔmbɔla la okalemba wa lowolo+ dia nde mbatshatsha wedja oko diangɔ dia diwomba, oko wakamalongola lowandji oma le Papa. 28 Ndo dimi layowosha yɔɔtɔ ya pindju.+ 29 Ɔnɛ lele l’atoyi wa mboka, ooke kɛnɛ katɛ nyuma tshumanelo.’