2 Samuɛlɛ
6 Davidɛ akatshumanya nto elui w’asɔlayi tshɛ woleki diewo wa l’Isariyɛlɛ, apami nunu akumi asato (30000). 2 Oma laasɔ, Davidɛ nde l’anto tshɛ waki kaamɛ la nde wakatshu otsha la Baalɛ-Juda dia toya la Ɔshɛtɛ wa Nzambi ka mɛtɛ+ oma lɛkɔ, wele la ntondo kawɔ mbakelɛka* anto lokombo la Jehowa kanga lolembelembe,+ ɔnɛ lodjashi lo kiti ka lowandji laadiko* dia akɛruba.+ 3 Koko vɔ wakahɛ Ɔshɛtɛ wa Nzambi ka mɛtɛ lo pusupusu k’oyoyo+ dia mbɛɛmba oma lo luudu la Abinadaba+ laki lo kionakona. Uza nde la Ahiyo, ana waki Abinadaba mbakayalɔmbɔlaka pusupusu kakɔ k’oyoyo.
4 Ɔnkɔnɛ, vɔ wakɛmbɛ Ɔshɛtɛ wa Nzambi ka mɛtɛ oma lo luudu la Abinadaba laki lo kionakona ndo Ahiyo akatakɛndakɛndaka la ntondo k’Ɔshɛtɛ. 5 Davidɛ nde la nkumbo k’otondo k’Isariyɛlɛ wakangɛnangɛnaka la ntondo ka Jehowa la weho tshɛ wa dihomahoma dia l’esongo wa dihake, nsɛsɛ,+ dihomahoma dikina di’eshinga, ngɔmɔ,+ asaka ndo nsɛmbalɛ.+ 6 Koko lam’akawakome lo dihole di’esuswelo dia Nakɔna, Uza akasembola lonya lande otsha lo Ɔshɛtɛ wa Nzambi ka mɛtɛ ndo akookimɛ,+ nɛ dia ngɔmbɛ yaki suke la mbɔkɔsha. 7 Ko nkɛlɛ ka Jehowa kadɔdɔ kakaye le Uza ndo Nzambi ka mɛtɛ akɔɔkɔmɔla laawɔ+ l’ɔtɛ wakandasale tshelo yaha la dilɛmiɛlɔ,+ ko nde akavu kaawɔ suke la Ɔshɛtɛ wa Nzambi ka mɛtɛ. 8 Koko Davidɛ akomala,* nɛ dia nkɛlɛ ka Jehowa kakatshulɔ le Uza, ndo dihole sɔ mbelamɛka ɔnɛ Pɛrɛzɛ-Uza* polo ndo ɛlɔ. 9 Ɔnkɔnɛ, Davidɛ akoke Jehowa+ wɔma efula lushi lɔsɔ, ko akate ate: “Ngande wayokoka Ɔshɛtɛ wa Jehowa nkoma le mi?”+ 10 Davidɛ konanga ntɔla Ɔshɛtɛ wa Jehowa lɛnɛ akinde l’Osomba wa Davidɛ.+ Koko Davidɛ akɔɔtɔlɛ otsha lo luudu laki Ɔbɛdɛ-Ɛdɔmɛ+ ose Ngiti.
11 Ɔshɛtɛ wa Jehowa wakatshikala lo luudu laki Ɔbɛdɛ-Ɛdɔmɛ ose Ngiti l’edja ka ngɔndɔ 3 ndo Jehowa akatshɔkɔlaka Ɔbɛdɛ-Ɛdɔmɛ nde l’ase luudu lande tshɛ.+ 12 Wakayotɛ nkumekanga Davidɛ ɔnɛ: “Jehowa ambɔtshɔkɔla luudu laki Ɔbɛdɛ-Ɛdɔmɛ ndo diangɔ diande tshɛ l’ɔtɛ w’Ɔshɛtɛ wa Nzambi ka mɛtɛ.” Ko Davidɛ akatshu dia tɛmba Ɔshɛtɛ wa Nzambi ka mɛtɛ oma lo luudu laki Ɔbɛdɛ-Ɛdɔmɛ oya l’Osomba wa Davidɛ la ɔngɛnɔngɛnɔ.+ 13 Lam’akatakola+ wanɛ wakayɛmbaka Ɔshɛtɛ wa Jehowa wanya 6, nde akalambola ngɔmbɛ ndo nyama ka wata.
14 Davidɛ akayanɔka lokombe ayatshimbe la ntondo ka Jehowa la wolo ande tshɛ. L’etena kɛsɔ, Davidɛ akalɔtɛ* efodɛ wa linɛnɛ.+ 15 Davidɛ nde la nkumbo k’otondo k’Isariyɛlɛ wakayayaka la Ɔshɛtɛ+ wa Jehowa, wayade ekoko w’ɔngɛnɔngɛnɔ+ ndo la wendjo wa wɔɔndjɔ.+ 16 Koko lam’akakome Ɔshɛtɛ wa Jehowa l’Osomba wa Davidɛ, Mikalɛ+ ɔna Saolo akalengɛ lo didishi ko akɛnyi nkumekanga Davidɛ ayalembɔlembɔ ndo ayanɔ lokombe lotshimba la ntondo ka Jehowa; ko nde akatatɛ mbɔɔnyɔla l’otema ande.+ 17 Ko vɔ wakaye l’Ɔshɛtɛ wa Jehowa ndo wakookitsha lo dihole diawɔ l’etei ka luudu la dipɛma lakake Davidɛ dikambo diawɔ.+ Oma laasɔ, Davidɛ akalambola elambo wa lotshumba+ ndo elambo w’osanga+ la ntondo ka Jehowa.+ 18 Lam’akashidiya Davidɛ nambola elambo wa lotshumba ndo elambo w’osanga, nde akatshɔkɔla anto lo lokombo la Jehowa kanga lolembelembe. 19 Ndo nto, nde akakahɛ anto tshɛ, olui w’otondo w’ase Isariyɛlɛ, pami tshɛ ndo womoto tshɛ mapa 1 w’obolonga, okate 1 wakasalema la mba ya datɛ* ndo okate 1 w’elowa wa vinyɔ, ko oma laasɔ, anto tshɛ wakatshu, onto l’onto otsha lo luudu lande.
20 Lam’akakalola Davidɛ dia ndjɔtshɔkɔla ase luudu lande, Mikalɛ+ ɔna Saolo akaye ndjohomana la nde. Nde akate ate: “Ande lotombo lamboyasha nkumekanga k’Isariyɛlɛ lam’ambondoyatondja ɛlɔ la ntondo ka mfumbe ya wamato y’ekambi ande oko watoyatondjaka pami k’anyanya lee!”+ 21 Ko Davidɛ akatɛ Mikalɛ ate: “Dimi lakangɛnyingɛnyi la ntondo ka Jehowa lakansɔnɛ lo dihole dia shɔ l’ase luudu lande tshɛ ndo lakambetɛ ɔnɔmbɔdi w’Isariyɛlɛ,+ wodja waki Jehowa. Ɔnkɔnɛ, dimi layɔngɛnangɛna la ntondo ka Jehowa, 22 ndo layoyakitshakitsha ndeka lanɛ, ko nyomoleka monga l’ɛse lo washo ami hita. Koko dimi layotombɔma le mfumbe ya wamato yakayatshi.” 23 Ɔnkɔnɛ, Mikalɛ+ ɔna Saolo kombota ndooko ɔna polo lushi lakandavu.