Ɛzɛkiyɛlɛ
13 Ɔtɛkɛta wa Jehowa wakaye le mi nto ɔnɛ: 2 “Ɔna onto, ta prɔfɛsiya lo dikambo dia amvutshi wa lo Isariyɛlɛ+ ndo tɛ wanɛ wakolonganya prɔfɛsiya*+ yawɔ hita wate: ‘Nyohokame ɔtɛkɛta wa Jehowa. 3 Nkum’Olongo Nkumadiɔndjɔ Jehowa kata ate: “Mananu le amvutshi wa dinginya wayela yimba yawɔ hita etena kahawɛnyi ndooko dui!+ 4 Isariyɛlɛ le, amvutshi ayɛ waya oko ɛkɛngɛ l’atei wa ahole wambolanyema. 5 Nyu hanyototshɔ lo ahole wakanyukɔ lo mpele dia ave dia towaka nto dikambo dia luudu la Isariyɛlɛ,+ dia Isariyɛlɛ ntetemala memala lo ta lo lushi la Jehowa.”+ 6 “Vɔ wakɛnyi waɛnɛlɔ wa kashi ndo wakate akambo wahataye wa kashi, wanɛ wata vate: ‘Ɔtɛkɛta wa Jehowa ele,’ etena kele Jehowa ndamɛ kombatoma ndo vɔ wakakonge dia ɔtɛkɛta awɔ kotshama.+ 7 Shi ɛnɛlɔ ka kashi mbakanyɛnyi ndo akambo wahataye wa kashi mbakanyate lam’akanyate nyate: ‘Ɔtɛkɛta wa Jehowa ele,’ etena kakimi kombuta ndooko dui?”’
8 “‘Ɔnkɔnɛ Nkum’Olongo Nkumadiɔndjɔ Jehowa kata ate: “‘Lam’ele nyu nyakate kɛnɛ kele kashi ndo waɛnɛlɔ anyu wekɔ kashi, dimi layanga nyɔlɔsha,’ mbata Nkum’Olongo Nkumadiɔndjɔ Jehowa.”+ 9 Lonya lami layanga ndɔshana la amvutshi wɛna waɛnɛlɔ wa kashi ndo wata akambo wahataye wa kashi.+ Vɔ hawotonga l’atei wa anto washolɛmi toseke; vɔ hawotofundama lo dibuku dia luudu la Isariyɛlɛ; ndo vɔ hawotokalola lo wodja wa Isariyɛlɛ; ko nyayohomba mbeya dia dimi kele Nkum’Olongo Nkumadiɔndjɔ Jehowa.+ 10 Awui asɔ tshɛ wekɔ nɛ dia vɔ wambonganyiya anto ami lo mbuta vate: “Wɔladi wekɔ!” etena kele wɔladi keema.+ Etena kambohikama yɛtshi ya ehele ya kɔlɔ, vɔ kishingolaka mpɛmbɛ.’*+
11 “Tɛ wanɛ washingola mpɛmbɛ lɔkɔ dia tɔ kayonyukɔ. Mvula ngembe kayɔlɔ, mbɔkɔ ya mvula* yayɔkɔ ndo lɔpɛpɛ la wolo layokinyukola.+ 12 Ndo lam’ayonyukɔ ehele kakɔ wayonyombola ɔnɛ: ‘Lende ele kɛnɛ kakanyashingola?’+
13 “Ɔnkɔnɛ Nkum’Olongo Nkumadiɔndjɔ Jehowa kata ate: ‘Dimi layosala dia lɔpɛpɛ la wolo mpɛpa l’ɔtɛ wa yɛnyi yami ndo dia mvula ngembe ndɔ l’ɔtɛ wa nkɛlɛ kami, ndo dia mbɔkɔ ya mvula nkita l’ɔtɛ wa odudu ami walanya. 14 Dimi layonyukola ehele kakanyakite mpɛmbɛ ndo layokikɔsha la nkɛtɛ, ndo etshina katɔ kayotomba sɛkɛ. Lam’ayonyukɔ osomba, nyu nyayolanyema l’etei kawɔ; ko nyayohomba mbeya dia dimi kele Jehowa.’
15 “‘Lam’ayomohongola nkɛlɛ kami tshɛ lo ehele ndo le wanɛ wakakikite mpɛmbɛ, dimi layonyotɛ nte: “Ehele kakɔ kaya bu ndo wanɛ wakikita mpɛmbɛ waya bu.+ 16 Amvutshi wa lo Isariyɛlɛ wambotshɔ, wanɛ watɛ Jɛrusalɛma prɔfɛsiya ndo wanɛ wɛna waɛnɛlɔ dikambo diayɔ, etena kele wɔladi bu,”’+ mbata Nkum’Olongo Nkumadiɔndjɔ Jehowa.
17 “Koko wɛ ɔna onto, ɛdiya elungi kayɛ otsha le ana wa wamato w’anto ayɛ wakolonganya prɔfɛsiya yawɔ hita, ndo ta prɔfɛsiya lo dikambo diawɔ. 18 Tɛwɔ wate: ‘Nkum’Olongo Nkumadiɔndjɔ Jehowa kata ate: “Mananu le wamato watɛla bɛtshi di’ahɔndɔ dikambo dia anya tshɛ* ndo wasala tambala dikambo dia ɛtɛ wa weho tshɛ dia mbitsha wenga wa nsɛnɔ* ya anto! Onde nyu nyotsha wenga wa nsɛnɔ* ya anto ami ko nyu nyangaka dia nkokɛ nsɛnɔ* yanyu hita? 19 Onde nyayɔmɔnyɔla l’atei wa anto ami l’ɔtɛ wa diwambo dia asami ndo l’ɔtɛ wa tɛtshi ta mapa,+ lo ndjaka wanɛ* wahahombe mvɔ ndo lo ntshika la lɔsɛnɔ wanɛ* wahahombe nsɛna, lo nsala ngasɔ lo nkesa anto ami wahokamɛ kashi+ yanyu?”’
20 “Ɔnkɔnɛ Nkum’Olongo Nkumadiɔndjɔ Jehowa kata ate: ‘Wamato le, dimi layanga ndɔshana la bɛtshi dianyu di’ahɔndɔ diakamba la nyu dia mbitsha anto* wenga wate kana oko vɔ wekɔ tofudu, ndo dimi layonyɔkɔsɔladiɔ oma lo anya anyu ndo layotshungola wanɛ watshanyu wenga oko tofudu. 21 Dimi layonyɔkɔsɔla tambala dianyu ndo layotshungola anto ami oma lo anya anyu, ko vɔ hawotonga nto ɛngɔ kakokanyu minda lo wenga; ko nyayohomba mbeya dia dimi kele Jehowa.+ 22 Nɛ dia nyu nyakaate asolo w’onto ɔlɔlɔ la kashi kanyu+ etena kakimi kombosoya,* ndo nyu nyakakeketsha anya wa kanga kɔlɔ,+ ko nde kokadimɔ oma lo mboka kande ka kɔlɔ dia nde ntshikala la lɔsɛnɔ.+ 23 Ɔnkɔnɛ, nyu wamato hanyotɛna waɛnɛlɔ wa kashi nto ndo hanyotosala diendja+ nto; dimi layotshungola anto ami oma lo anya anyu, ko nyayohomba mbeya dia dimi kele Jehowa.’”