2 Nkumi ya dikanga

21 Manase+ aki l’ɛnɔnyi 12 lam’akandayala nkumekanga ndo nde akolɛ l’edja k’ɛnɔnyi 55 la Jɛrusalɛma.+ Nyango lokombo lande Hɛfiziba. 2 Nde akasalaka kɛnɛ kaki kɔlɔ lo washo wa Jehowa lo ndjela ditshelo dia wɔnɔnyi dia wedja+ wele Jehowa akawatshanya oma la ntondo k’ase Isariyɛlɛ.+ 3 Nde akayohika nto ahole wa la diko wakalanya+ Hɛzɛkiya wa she, nde akemɛ dilambwelo dikambo dia Baala ndo akasale kimɛta ka l’osongo,*+ oko wakasale Ahaba nkumekanga k’Isariyɛlɛ.+ Nde akakusamɛ alembe tshɛ wa l’olongo ndo akaakambɛ.+ 4 Ndo nto, nde akasale dilambwelo lo luudu la Jehowa+ lele Jehowa akate lo dikambo dialɔ ate: “Dimi layokitsha lokombo+ lami la Jɛrusalɛma.” 5 Nde akasalɛ alembe tshɛ wa l’olongo+ dilambwelo lo asɛkɛ 2 wa luudu la Jehowa.+ 6 Nde akatshumbe ɔnande lo dja, akasale awui wa maji, akasale awui w’alɔhɔ+ ndo akasɔnɛ wanɛ watɛkɛtsha dimu ndo waa wetshi.+ Nde akasale kɛnɛ kaki kɔlɔ lo washo wa Jehowa lo yɛdikɔ y’efula dia mbookiya nkɛlɛ.

7 Nde akadje ekishi ka kimɛta ka l’osongo*+ kakandasale lo luudu lele Jehowa akatɛ Davidɛ nde la ɔnande Sɔlɔmɔna lo dikambo dialɔ ate: “Dimi layodja lokombo lami pondjo+ lo luudu lɔnɛ ndo la Jɛrusalɛma, dihole diakamasɔnɛ l’atei wa waoho tshɛ w’Isariyɛlɛ. 8 Ndo dimi hansalaki nto pondjo dia ekolo w’ase Isariyɛlɛ mbekekɔ nto oma lo wodja wakamasha watshɛwɔ+ naka vɔ nkitanyiya la yambalo tshɛ kɛnɛ tshɛ kakamawadjangɛ,+ Ɛlɛmbɛ tshɛ wakawadjangɛ okambi ami Mɔsɛ dia vɔ ndjela.” 9 Koko vɔ kokitanyiya ndo Manase akatetemala mbanganyiya ndo akaakonya dia vɔ nsala kɔlɔ koleki ka wedja wele Jehowa akaashile oshiki oma la ntondo k’ase Isariyɛlɛ.+

10 Jehowa akatetemala ntɛkɛta lo tshimbo y’ekambi ande amvutshi+ ate: 11 “Manase nkumekanga ka Juda ambosala akambo wa wɔnɔnyi anɛ tshɛ. Nde ambosala akambo lo yoho ya kɔlɔ oleki ase Amɔra+ tshɛ waki la ntondo kande+ ndo nde ambokonya ase Juda dia nsala pɛkato la dikishi diande dia nyɛtɛɛtɛ.* 12 Ɔnkɔnɛ, Jehowa Nzambi k’Isariyɛlɛ kata ate: ‘Dimi layanga mbela mpokoso la Jɛrusalɛma+ ndo la Juda, ndo tɔ kayohahanya atoyi akɔ 2 w’onto tshɛ layokioka.+ 13 Ndo ɔkɔdi wa yɛdikɔ+ wakakambe la wɔ la Samariya,+ dimi layowosembola la Jɛrusalɛma ndo layokamba la ehomɔ kɛdikawɔ dia menda kana diangɔ nsembɔ lo luudu la Ahaba,+ ndo dimi layosola Jɛrusalɛma oko watosolaka onto dɔnga dia difuku, disola ko dikukumɛ.+ 14 Dimi layohɛ atshikadi w’etenyi kami k’okitɔ+ ndo layowakimɔ lo anya w’atunyi awɔ, ko vɔ wayondama ndo diangɔ diawɔ diayombama oma le atunyi awɔ tshɛ,+ 15 nɛ dia vɔ wakasale kɛnɛ kaki kɔlɔ lo washo ami ndo wakatetemala mbotshami nkɛlɛ oma ko lushi lakatombe watshɛwɔ oma l’Edjibito polo ndo ɛlɔ.’”+

16 Ndo nto, Manase akakɛdia dikila di’anto waha la onongo lo yɛdikɔ y’efula ka mamba polo nde dilodia lo Jɛrusalɛma oma lo koma nyɛ polo lo koma kina,+ aha la mbidja pɛkato kakandakonya Juda dia nsala lo nsala kɛnɛ kaki kɔlɔ lo washo wa Jehowa. 17 Lo kɛnɛ kendana l’etenyi kekina k’ɔkɔndɔ wa Manase, kɛnɛ tshɛ kakandasale ndo pɛkato yakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 18 Oma laasɔ, Manase aketama dia momuya kaamɛ la watshɛnde ndo wakookundɛ lo ekambɔ kaki suke la luudu lande, lo ekambɔ ka Uza.+ Ko ɔnande Amɔna akayala nkumekanga lo dihole diande.

19 Amɔna+ aki l’ɛnɔnyi 22 lam’akandayala nkumekanga ndo nde akolɛ l’edja k’ɛnɔnyi 2 la Jɛrusalɛma.+ Nyango lokombo lande Meshulɛmɛtɛ ɔna Haruza ose Jɔtiba. 20 Nde akatetemala nsala kɛnɛ kaki kɔlɔ lo washo wa Jehowa oko wakasale Manase ka she.+ 21 Nde akatetemala nkɛndakɛnda lo mboka tshɛ yakakɛndakɛndaka she ndo nde akatetemala kambɛ ndo kusamɛ dikishi dia nyɛtɛɛtɛ diele she akadikambɛ.+ 22 Ɔnkɔnɛ, nde akoke Jehowa Nzambi ka watshɛnde ɔkɔngɔ ndo nde kɔkɛndakɛnda lo mboka ka Jehowa.+ 23 L’ekomelo, ekambi waki Amɔna wakawɔtwɛ sheke, ko wakadiake nkumekanga lo luudu lande. 24 Koko ase wodja wakadiake wanɛ tshɛ wakɔtwɛ nkumekanga Amɔna sheke, ko waketɛ ɔnande Jɔsiya nkumekanga lo dihole diande.+ 25 Lo kɛnɛ kendana l’etenyi kekina k’ɔkɔndɔ wa Amɔna ndo kɛnɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 26 Ko wakookundɛ lo diombo diande diele lo ekambɔ ka Uza,+ ko ɔnande Jɔsiya+ akayala nkumekanga lo dihole diande.