2 Nkumi ya dikanga
24 Lo nshi yakolɛka Jɛhɔyakima, Nɛbukadinɛza+ nkumekanga ka Babilɔna akaye ndjɔɔlɔsha, ko Jɛhɔyakima akayala okambi ande l’edja k’ɛnɔnyi 3. Koko nde akookadimwɛ ndo akatɔmbɔkɔ. 2 Ko Jehowa akatatɛ mbotomɛ elui wa dengalenga di’ase Kaladiya,+ di’ase Suriya, di’ase Mɔaba ndo di’ase Amɔna. Nde akatetemala mbatoma dia ndɔsha Juda ndo ndjilanya lo ndjela ɔtɛkɛta wa Jehowa+ wakandate lo tshimbo y’ekambi ande amvutshi. 3 Lo mɛtɛ, lo ndjela didjango dia Jehowa mbakasalema akambo asɔ la Juda dia mbanya oma lo washo ande+ l’ɔtɛ wa pɛkato tshɛ yakasale Manase,+ 4 ndo l’ɔtɛ wa dikila di’anto waha la onongo diakandatshola,+ nɛ dia nde akalodia Jɛrusalɛma la dikila di’anto waha la onongo ndo Jehowa kombetawɔ mbodimanyiya.+
5 Lo kɛnɛ kendana l’etenyi kekina k’ɔkɔndɔ wa Jɛhɔyakima ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?+ 6 Oma laasɔ, Jɛhɔyakima aketama dia momuya kaamɛ la watshɛnde,+ ko ɔnande Jɛhɔyakina akayala nkumekanga lo dihole diande.
7 Nkumekanga k’Edjibito kosombɔ ntomba oma lo wodja nto, nɛ dia nkumekanga ka Babilɔna akɔshi kɛnɛ tshɛ kaki la nkumekanga k’Edjibito,+ oma l’Okidi w’ashi* wa l’Edjibito+ polo lo Ɔkɛdi w’Efaratɛ.+
8 Jɛhɔyakina+ aki l’ɛnɔnyi 18 lam’akandayala nkumekanga ndo nde akolɛ l’edja ka ngɔndɔ 3 la Jɛrusalɛma.+ Nyango lokombo lande Nehushita ɔna Elɛnatana ose Jɛrusalɛma. 9 Nde akatetemala nsala kɛnɛ kaki kɔlɔ lo washo wa Jehowa lo ndjela kɛnɛ tshɛ kakasale she. 10 L’etena kɛsɔ, ekambi waki Nɛbukadinɛza nkumekanga ka Babilɔna wakaye ndjɔlɔsha Jɛrusalɛma ko wakadinge osomba.+ 11 Nɛbukadinɛza nkumekanga ka Babilɔna akaye lo osomba etena kakandingaka ekambi ande osomba akɔ.
12 Jɛhɔyakina nkumekanga ka Juda akatshu kaamɛ la nyango, ekambi ande, ewandji ande ndo ɛnɛnɛ+ ande le nkumekanga ka Babilɔna.+ Ko nkumekanga ka Babilɔna akawetɛ mfumbe l’ɔnɔnyi wa 8 w’ɛlɔmbwɛlɔ kande.+ 13 Oma laasɔ, nde akɔshi diangɔ dia nɛmɔ tshɛ diaki lo luudu la Jehowa ndo diangɔ dia nɛmɔ diaki lo luudu* la nkumekanga+ oma lɛkɔ. Nde akahendjahendja diangɔ tshɛ dia paonyi diakasale Sɔlɔmɔna nkumekanga k’Isariyɛlɛ lo tɛmpɛlɔ ka Jehowa.+ Dui sɔ diakasalema paka oko wakate Jehowa. 14 Nde akatshu la ase Jɛrusalɛma tshɛ, ewandji+ tshɛ, andɔshi wa ta wa wolo tshɛ, etshudi tshɛ ndo etshudi wa yaandjo*+ lo lɔhɔmbɔ, nde akatshu l’anto nunu dikumi (10 000) lo lɔhɔmbɔ. Ndooko onto lakatshikala, onyake wanɛ wakaleke wola lo wodja.+ 15 Ɔnkɔnɛ nde akatshu la Jɛhɔyakina+ lo lɔhɔmbɔ la Babilɔna.+ Nde akatshu ndo la nyango nkumekanga, wadi wa nkumekanga, ɛnɛnɛ ande ndo tosakasaka ta lo wodja; nde akatshu la wɔ oma la Jɛrusalɛma otsha lo lɔhɔmbɔ la Babilɔna. 16 Ndo nto, nkumekanga ka Babilɔna akatshu la andɔshi wa ta tshɛ otsha lo lɔhɔmbɔ la Babilɔna, anto nunu esambele (7 000) kaamɛ la etshudi ndo etshudi wa yaandjo* kinunu (1 000), vɔ tshɛ waki apami wa wolo ndo weya ta. 17 Nkumekanga ka Babilɔna aketɛ Mataniya kose aki she Jɛhɔyakina+ nkumekanga lo dihole diande, ndo akatshikitanya lokombo lande, ko akawɔlɛ Zɛdɛkiya.+
18 Zɛdɛkiya aki l’ɛnɔnyi 21 lam’akandayala nkumekanga ndo nde akolɛ l’edja k’ɛnɔnyi 11 la Jɛrusalɛma. Nyango lokombo lande Hamutala+ ɔna Jɛrɛmiya ose Libina. 19 Nde akatetemala nsala kɛnɛ kaki kɔlɔ lo washo wa Jehowa lo ndjela kɛnɛ tshɛ kakasale Jɛhɔyakima.+ 20 Awui asɔ wakasalema la Jɛrusalɛma ndo la Juda l’ɔtɛ wa nkɛlɛ ka Jehowa polo nde mbanya lo washo ande.+ Ko Zɛdɛkiya akatɔmbɔkwɛ nkumekanga ka Babilɔna.+