Isaya
5 Lam’alanganyu, dimi nte membee olangemi ami
Osambo wendana la ɔnɛ lalangami ndo ekambɔ kande ka vinyɔ.+
Olangemi ami aki la ekambɔ ka vinyɔ lo nkɛtɛ y’ɛtɛtɔ yele l’omamu wa kionakona.
2 Nde akakifuse ndo akanya ave oma lɔkɔ.
Nde akonɛ vinyɔ ya beela yoleki dimɛna lɔkɔ,
Akake tshoto l’atei atɔ,
Ndo akasale diamula di’elowa lɔkɔ.+
Oma laasɔ, nde akalongamɛka dia tɔ kayotondja elowa wa vinyɔ w’amɛna,
Koko tɔ kakatondja paka elowa wa kɔlɔ eto.+
3 “Kakianɛ, nyu ase Jɛrusalɛma ndo apami w’ase Juda,
Lam’alanganyu, nyosambole lam’asami la ekambɔ kami ka vinyɔ.+
4 Kakɔna nto kakamakoke salɛ ekambɔ kami ka vinyɔ
Kemi talashile nsala?+
Etena kakamalongamɛka elowa wa vinyɔ w’amɛna,
Lande na kakatatondja elowa wa kɔlɔ eto?
5 Lam’alanganyu, dimi nte nyote
Kɛnɛ kayomosalɛ ekambɔ kami ka vinyɔ:
Dimi layonya lokombo la lɔkɔ,
Ndo tɔ kayotshumbama.+
Dimi layotola ehele k’ave ka lɔkɔ,
Ndo tɔ kayɔhɔtshahɔtshama.
6 Dimi layokietɛ nkɛtɛ ya shɛnga+;
Tɔ hatokandjɔma ndo hatokambema.
7 Nɛ dia luudu l’Isariyɛlɛ+ kele ekambɔ ka vinyɔ ka Jehowa kanga lolembelembe;
Apami wa la Juda mbele ekambɔ* kakandalange efula.
Nde akalongamɛka sambo k’ɔlɔlɔ,+
Ko eenda, aki paka awui wele bu la losembwe ato;
Ndo losembwe,
Ko eenda, paka ekoko w’asui ato.”+
8 Mananu le wanɛ wamamatanya luudu lɔmɔtshi la luudu lokina+
Ndo wanɛ wasanganya ekambɔ kɛmɔtshi la ekambɔ kekina+
Edja ndo dihole diaya bu
Ndo nyambodjasɛ nyuamɛ lo wodja!
9 Jehowa kanga lolembelembe akatshibe lo atoyi ami
Dia mvudu efula, kaanga mbeyɔ weke ndo amɛna,
Yɔ yayonga ɛngɔ ka diɔnyɔ,
Kaha l’onto ladjasɛ.+
10 Nɛ dia akrɛ* 10 wa ekambɔ ka vinyɔ wayotondja bata 1 oto ka yɛdikɔ*,
Ndo hɔmɛra 1 wa yɛdikɔ* ya woho wayotondja paka efa* 1 oto.+
11 Mananu le wanɛ wetɔ la pindju ka pɛɛ dia nnɔ wanu wadjoya,+
Wanɛ watshikala edja polo la dikɔlɔ di’otsho polo ndo wanu wambowadjoya!
12 Vɔ wekɔ la lɔsɛsɛ ndo la ehomahoma k’eshinga,
Ngɔmɔ, mpolo ndo wanu lo fɛtɛ yawɔ;
Koko vɔ hawɔsɛdingola elimu wa Jehowa,
Ndo vɔ hawɛnyi olimu w’anya ande.
13 Ɔnkɔnɛ anto ami wayotshɔ lo lɔhɔmbɔ
L’ɔtɛ wewɔ bu la ewo;+
Anto awɔ wa lotombo wayodiɛnɛ la ndjala,+
Ndo anto awɔ tshɛ wayoma to la mposa k’ashi.
14 Ko Diombo* diakanune dɔamɛ*
Ndo diakasɛ onyɔ adiɔ hwe aha la ekomelo;+
Ndo lɔnɛnɛ la Jɛrusalɛma,*
londjo la nyemba yayɔ y’anto ndo ambidji wa mindjo
Wayoholɔ mɛtɛ otsha lɔkɔ.
15 Ndo onto ayɔkɔlama,
Onto ayoholoyama,
Ndo washo wa kanga otako wayoholoyama.
16 Jehowa kanga lolembelembe ayodiyama la elombwelo* kande;
Nzambi ka mɛtɛ, Ɔnɛ lele Ekila,+ ayoyakidia oma lo losembwe.+
17 Ana w’ɛkɔkɔ wayɔlɛ adiyo oko l’ɛtshi kawɔ ka nkɛtɛ;
Angɛndangɛnda wayɔlɛ lo ahole wambolanyema wa nyama yaleshawɔ dimɛna.
18 Mananu le wanɛ wakotola onongo awɔ la ɛkɔdi wa lokeso
Ndo pɛkato kawɔ la ɛkɔdi wa pusupusu,
19 Wanɛ wata vate: “Nde asale di’olimu ande kambema la shamanya;
Vɔ waye esadi kele toyowɛnyi.
20 Mananu le wanɛ wata vate ɔlɔlɔ ekɔ kɔlɔ ndo kɔlɔ ekɔ ɔlɔlɔ,+
Wanɛ wakadimola wodjima osase ndo osase wodjima,
Wanɛ wɔsa ololo ɔnɛ mpɛ ndo mpɛ ɔnɛ ololo!
21 Mananu le wanɛ wayaɔsa akanga wa lomba lo washo awɔ hita
Ndo akanga wa kɛsɔ lo washo awɔ hita!+
22 Mananu le wanɛ wele akanga wa nkudu lo nɔshi dia wanu
Ndo le anto wele pidii lo nɔshi dia wanu wa lɔsɔhanya,+
23 Wanɛ wayindja kanga kɔlɔ l’ɔtɛ w’etshimba+
Ndo wadima onto ɔlɔlɔ losembwe!+
24 Ɔnkɔnɛ, oko watotshumbaka shase ya dja nsɔdu
Ndo watolongolaka adiyo wamboma lo loombe la dja,
Edio awɔ hita wayɔhɔnda,
Ndo alɛmbɔlɛmbɔ awɔ wayohandjɔ oko ofushi,
Dikambo vɔ wakasɛkɛ ɛlɛmbɛ* wa Jehowa kanga lolembelembe
Ndo kɔnɛmiya ɔtɛkɛta wa l’Ekila la Isariyɛlɛ.+
25 Diakɔ diele nkɛlɛ ka Jehowa kambodɔdwɛ anto ande,
Ndo nde ayosembola lonya lande otsha le wɔ dia mbakɔmɔla.+
Akona wayodidima,
Ndo edo awɔ wayonga oko diangɔ dia nyɛtɛɛtɛ lo toshinga.+
L’ɔtɛ wa akambo asɔ tshɛ, nkɛlɛ kande katakitakita,
Koko lonya lande laakasembwe tsho dia nkɔmɔla.
26 Nde akemɛ djembetelo* le wodja w’etale;+
Nde akawadɛ hionge dia vɔ ndja oma lo tokoma ta nkɛtɛ;+
Ndo vɔ wekɔ lo ndjaye esadi esadi.+
27 Ndooko onto l’atei awɔ lambɔlɛmba kana latakana.
Ndooko onto lanyingɔnyingɔ kana lalala djɔ.
Oya wele lo lokende lawɔ hawɔtɛwɔ,
Ndo ɛkɔdi wa sabata yawɔ hawohembɔ.
28 Mpito yawɔ tshɛ yekɔ ɛsɔdi,
Ndo eta awɔ tshɛ minɛma.*
Nsabɔ ya mfalasa yawɔ yekɔ oko dive dia silɛksɛ,
Ndo etshimbi wa pusupusu yawɔ wekɔ oko lɔpɛpɛ la wolo.+
Vɔ wayodikita ndo wayonda nyama
Ndo wayotshɔ la tɔ ko ndooko onto layokitshungola.
30 Lushi lɔsɔ vɔ wayodikita
Oko dikita dia ndjale.+
Onto tshɛ layenda wodja akɔ ayɛna wodjima washa wɔma;
Kaanga osase waya wodjima l’ɔtɛ wa wange.+